Nokkurra stiga frost var í Reykhólahreppi um miðnætti og í alla nótt og því er sagt að vetur og sumar hafi frosið saman. Reyndar var svo um allt land. Þjóðtrúin segir það vita á gott sumar, hvað svo sem vísindamenn hafa um það að segja. Þegar vetur og sumar frjósa saman hefur verið talið að þá verði sumarið betra undir bú en ekki endilega hlýrra en ella. Frost í sumarbyrjun merkir að nýgræðingurinn verður seinna á ferðinni og ferskari og kjarnbetri við sauðburð og eftir hann en annars væri.

 

Rétt er að taka fram, að meðfylgjandi mynd, þar sem ísbrjótur ryður flutningaskipi braut, er ekki tekin á Breiðafirði núna að morgni sumardagsins fyrsta. Myndin sem er fengin af Wikipediu er tekin við Suðurskautslandið og fjallið er hreint ekki Snæfellsjökull.

 
Gleðilegt sumar!