Vigdís forseti gróðursetur tré í Reykhólasveit
Myndin sem hér fylgir birtist fyrir nokkrum dögum á Facebooksíðu Skógræktarfélags Íslands og jafnframt á síðu Ástu Þórarinsdóttur, tengdadóttur Jens heitins Guðmundssonar skólastjóra á Reykhólum. Nú skal spurt: Hvar og hvenær var þessi mynd tekin og hvert er fólkið sem er með Vigdísi forseta á myndinni?
Í gær voru á Reykhólum eins og um allt land gróðursettar þrjár trjáplöntur í virðingarskyni við Vigdísi Finnbogadóttur í tilefni þess að 35 ár eru liðin frá því að hún var kjörin forseti Íslands. Skógrækt er meðal margra hugðarefna Vigdísar. Það sýndi hún víða í verki þar sem hún fór á embættistíð sinni og gróðursetti þrjú tré á hverjum stað.
Hér inn á vefinn má fljótlega búast við myndum sem teknar voru við gróðursetninguna á Reykhólum í gærkvöldi. Og kannski einhverjum fróðleiksmolum til viðbótar.
Þrymur Sveinsson, sunnudagur 28 jn kl: 14:40
Myndin var tekin þar sem stoppað var á Barmahlíð á leið Vigdísar Finnbogadóttur og föruneytishennar frá borðhaldi í Hótel Bjarkalundi sem henni var haldið til heiðurs af sýslunefnd Austur Barðastrandarsýslu áleiðis út að Reykhólum þegar Vigdís heimsótti Vestfirði síðla í júnímánuði 1983. Samkvæmt dagskrá heimsóknarinnar sem má sjá í 133 tölublaði Morgunblaðsins 15.06 1983 var ferðatilhögun Vigdísar eftirfarandi. "Á hádegi þriðjudagsins 21. júní tekur sýslumaður á móti forsetanum á sýslumörkum A-Barðastrandarsýslu í Gilsfjarðarbotni. Borðhald verður í Bjarkarlundi í boði sýslunefndar A-Barðastrandarsýslu. Síðdegis er fyrirhugað að heimsækja Þörungavinnsluna og síðan haldið til Flateyjar. Það var haldið kaffisamsæti í Reykhólaskóla þar sem Vigdís gekk meðal veislugesta og heilsaði hverjum og einum. Mig minnir að Vigdís hafi verið leyst út með ljóðum og gjöfum m.a frá Bjargeyju Arnórsdóttur á Hofsstöðum og Lilju Þórarinsdóttur á Grund. Konan sem stendur fjærst heitir Herdís Þorsteinsdóttir hárgreiðslukona sem var í fylgdarliði Vigdísar. Næstir koma sýslunefndarmennirnir Hafsteinn Guðmundsson í Flatey og Sveinn Guðmundsson á Miðhúsum. Fremst eru Vigdís Finnbogadóttir og ungir aðstoðarmenn við plöntunina sem ég ber ekki kennsl á. Fremstur er Jens Guðmundsson kennari á Reykhólum.