Aðalfundur Skógræktarfélags Íslands sem haldinn var á Ísafirði um síðustu helgi beindi því til Háskólaseturs Vestfjarða og Náttúrustofu Vestfjarða að koma á fót plöntusteingervingasetri á Vestfjörðum, enda er þar að finna merkilegar leifar fornra skóga Íslands. Í greinargerð með þessum tilmælum segir:

Rannsóknir á plöntuleifum úr íslenskum jarðlögum má rekja aftur til áranna 1750-1760 þegar Eggert Ólafsson ferðaðist um landið. Frá þeim tíma hafa innlendir og erlendir fræðimenn rannsakað plöntusteingervinga hér á landi. Þekktustu svæði þessara plöntuleifa er að finna á Vestfjörðum. Rannsóknir á plöntusteingervingum geta varpað ljósi á þróun gróðurfars Íslands og loftslagsbreytingar í fortíð og nútíma.

Tegundir sem þrifust hér á landi fyrir fimmtán milljónum ára eru nú útdauðar en sambærilegar og náskyldar tegundir lifa á suðlægari breiddargráðum. Uppbygging á aðstöðu til skoðunar á plöntusteingervingum getur orðið mikið aðdráttarafl fyrir ferðamenn. Skógræktarfélag Íslands er tilbúið til að styðja við verkefni af þessu tagi.