„Refastofninn hefur augljóslega stækkað mikið síðustu ár þrátt fyrir að töluverð vinna sé lögð í að halda stofninum í skefjum. Það er alveg ljóst að ef grenjavinnsla leggst af verður gríðarleg sprenging í fjölgun refa með mjög alvarlegum afleiðingum fyrir náttúruna. Menn hafa í aldaraðir haldið þessu í jafnvægi og mikilvægt er að þessu starfi sé haldið áfram“, segir Guðmundur Steinar Björgmundsson, bóndi á Kirkjubóli í Valþjófsdal í Önundarfirði.

 

„Það eru ekki eingöngu hagsmunir bænda sem skipta hér máli. Innan bæjarmarka Ísafjarðarbæjar er eitt stærsta æðavarp heimsins og mikil fjölgun refa myndi hafa í för með sér mikið fjárhagslegt tjón fyrir þessa atvinnustarfsemi. Þá er fjölskrúðugt fuglalíf ekki eingöngu skemmtileg prýði heldur felast í því sóknarfæri í ferðaþjónustu.“

 

Þetta kemur fram á fréttavefnum bb.is á Ísafirði.