Fulltrúar Umf. Aftureldingar í Reykhólahreppi hlaupa í fyrramálið, laugardag, upp á Arnkötludal til móts við fulltrúa Héraðssambands Strandamanna. Hóparnir hittast hjá vinnubúðum vegagerðarmanna við Þröskuld og skiptast á vinakveðjum og fagna nýja veginum sem opnaður verður seinna í haust. Strandamenn ætla að koma saman við afleggjarann upp á Arnkötludal (við Hrófá) kl. 10 og fylgja fjórum vönum hlaupurum og fjölda barna í fánaprýddri fjárkerru. Af hálfu fólks í Reykhólahreppi munu fjórir krakkar hlaupa síðasta kílómetrann.

 

Við Þröskuld taka verktakinn Ingileifur Jónsson og kona hans á móti hlaupurunum og bjóða þeim hressingu áður en hóparnir snúa aftur heim og halda hvor sína hátíðina í heimabyggð.

 

Reykhólahreppingar munu jafnframt færa Strandamönnum hleðslustein til að eiga hlut í framtíðarvörðu sem hlaðin verður við hátíðlega viðhöfn við Félagsheimilið á Hólmavík.

 

Vinakveðjunum sem skipst verður á er m.a. ætlað að minna á þá samgöngubót sem nýi vegurinn verður. Ekki síst er þeim ætlað að minna á að vegurinn mun opna fjölda tækifæra til fjölbreyttra atvinnu- og menningarsamskipta milli Strandamanna og íbúa Reykhólahrepps.