Vinna við nýjan veg ætti að geta hafist á þessu ári
Vegagerðin birti í gær frummatsskýrslu vegna endurbyggingar og lagningar nýs Vestfjarðavegar frá Eiði í Vattarfirði um Kerlingarfjörð og Mjóafjörð að Þverá í Kjálkafirði. Um er að ræða 16,5-19,2 km langa vegagerð, að langmestu leyti í Reykhólahreppi en allra vestasti hlutinn tilheyrir Vesturbyggð. Mörk sveitarfélaganna tveggja eru við Skiptá í Kjálkafirði. Núverandi vegur sem hinn nýi skal leysa af hólmi er 24,3 km. Lengd hinnar nýju veglínu fer eftir leiðarvali í Mjóafirði og á Litlanesi. Byggðar verða tvær nýjar brýr, önnur á Mjóafjörð en hin á Kjálkafjörð.
Stefnt er að því að undirbúningi framkvæmda ljúki og framkvæmdir geti hafist á þessu ári. Áætlaður framkvæmdatími verksins getur stystur orðið tvö ár, að mati Vegagerðarinnar.
Til þess að forðast misskilning skal tekið fram, að hér er alls ekki um að ræða hina umdeildu leið austar í Reykhólahreppi þar sem Teigsskógur við Þorskafjörð hefur verið helsta deiluefnið.
Frummatsskýrsluna og margvísleg fylgigögn er að finna hér. Eitt fylgiskjalanna er þó merkt Trúnaðarskjal - ekki birt á vefnum. Það fjallar um erni í Kerlingarfirði, Kjálkafirði og Vatnsfirði.