Frá opnun bókasafnsins í nýjum húsakynnum í Reykhólaskóla í vetur.

Á Héraðsbókasafni Reykhólahrepps á Reykhólum hefur verið ákveðið að reyna nýjung sem er fyrir hendi a.m.k. á flestum bókasöfnum á höfuðborgarsvæðinu, en það er útleiga á myndefni. „Til að þessi skemmtilega hugmynd geti orðið að veruleika er leitað til sveitunga. Ef einhverjir eiga myndbönd eða DVD-diska sem þeir vilja að komist í góðar hendur og muni leiða gott af sér fyrir sveitina, þá endilega að gefa bókasafninu þetta“, segir Harpa Eiríksdóttir bókavörður.

„Núna er tilvalið að taka til í myndbanda- og DVD-safninu og láta gott af sér leiða. Nú þegar er búið að gefa til safnsins nokkrar spólur og diska og margt smátt gerir eitt stórt“, segir hún.

Þeir sem vilja koma spólum eða diskum til safnsins ættu að hringja í Hörpu í síma 894 1011.

Lágt útleiguverð verður á spólum og diskum til að geta safnað til kaupa á nýjum diskum. Fræðsluefni er frítt eftir sem áður.

Bókasafnið er til húsa í gamla leikfimisalnum í Reykhólaskóla. Opið er mánudaga kl. 15-17 og miðvikudaga kl. 13-15. Auk þess er opið fyrsta laugardag í hverjum mánuði kl. 10-12 og lesið fyrir börnin kl. 11.

18.01.2012  Bókasafnið á Reykhólum: Sjálfboðaliðar óskast

01.12.2011  Bókasafnið opnað í gamla leikfimisalnum - myndir