Að lokinni árlegri lundaveiðiferð Aðalsteins Valdimarssonar á Reykhólum út í Breiðafjarðareyjar.

„Að okkar mati er friðun þessara fuglategunda á öllu landinu allt of harkaleg aðgerð, einkum þegar horft er til þess hversu takmarkaðar rannsóknir liggja að baki tillögunni,“ segir í bréfi Drangeyjarfélagsins í Skagafirði til þingmanna. Tillögum starfshóps umhverfisráðuneytisins um algera friðun fimm svartfuglastofna er mótmælt harðlega.

Félagar í Drangeyjarfélaginu setja spurningarmerki við forsendur tillagna starfshóps ráðuneytisins. „Ég sé ekki að það séu vísindaleg rök á bak við þetta veiðibann. Ég hef ekki hitt nokkurn mann sem telur að stofninum hafi hrakað hér,“ segir Viggó Jónsson, formaður Drangeyjarfélagsins, í samtali við Morgunblaðið. Hann er í hópi manna sem lengi hafa sigið eftir eggjum í björgum Drangeyjar og háfað lunda. Hann nefnir lundastofninn sem dæmi og segir að varp hafi verið í góðu meðallagi í fyrra.

„Maður spyr sig, af hverju á að banna veiðar hér fyrir Norðurlandi, þegar lægð er í stofninum á Suðurlandi,“ segir Viggó. Hann nefnir fleiri eyjar, meðal annars Vigur í Ísafjarðardjúpi, þar sem lunda hefur verið að fjölga.

Drangeyjarfélagið gagnrýnir að við vinnslu skýrslunnar hafi ekkert verið leitað í þekkingarbrunn þeirra sem best þekki til. „Við erum þegnar þessa lands og höfum nytjað þessi hlunnindi í áratugi,“ segir Viggó.

Hérlendis má veiða fimm tegundir af svartfugli - álku, langvíu, stuttnefju, teistu og lunda. Hins vegar eru þær allar friðaðar innan ESB. Starfshópur á vegum umhverfisráðherra lagði til núna í ársbyrjun að allar þessar tegundir verði friðaðar hér á landi að minnsta kosti næstu fimm ár. Þau áform hafa vakið hörð viðbrögð Bændasamtaka Íslands (fulltrúi þeirra sagði sig úr starfshópnum), einstakra hlunnindabænda og samtaka skotveiðimanna (Skotvís).

Sjá einnig á Reykhólavefnum 18. janúar 2012: Svartfugli fjölgar stöðugt með hverju ári