Bæir í Gufudal heita Gufudalur og Fremri Gufudalur en það hefur ekki verið venja að auðkenna þá með 1 og 2.
Á Kletti í Kollafirði var stutt-löng-stutt.
Takk fyrir samantektina, gaman að þessu.
Kveðja, Hrafnhildur

Ég þykist muna. að hringingin til Gilsfjarðarbrekku sé rétt. Einnig má koma fram, að neyðarhringing var 5 stuttar.
Kærar þakkir. Dalli.

Var ekki sími á Hallsteinsnesi?

jú, búin að fá það í pósti að það hafi verið 3 langar á Hallsteinsnesi

Á Höllustöðum var löng stutt stutt. kv Ingvar

Viðbætur, leiðréttingar og lagfæringar hafa verið settar (og verða settar ef fleiri berast) inn í töfluna hér fyrir ofan og eru auðkenndar með rauðum lit.

Melbær 2 langar 3 stuttar.

Enginn bær í Geiradal heitir Stekkjarhóll, hann heitir Stekkjarholt

Miðhús vestan Djúpadals er talið í bæjatali Póststjórnarinnar 1885, 1915, vantar 1930, finnst ekki í 1951 og 1961. Samkvæmt Jóni á Skáldsstöðum var ábúð þar til ársins 1893 og svo árin 1930 - 1931 - þannig að það er spurning hvenær símalínan var lögð vestur og hvenær hún var tengd á alla bæina vestra og hvort Miðhús hafi verið tengd við símalínuna miðað við þá stuttu ábúð sem er þar á fyrrihluta 20 aldarinnar. Þetta hljóta gamlir Gufsarar að vita.
Rétta bæjarröðin frá Múla í Þorskafirði var Hjallar, Þórisstaðir, Gröf, Hallsteinsnes, Barmur Djúpidalur, Miðhús, Gróunes( þar er búið til 1927), Brekka, Fremri Gufudalur, Neðri Gufudalur, Hofsstaðir, Skálanes, Kleifarstaðir, Galtará, Sveinungseyri, Kálfadalur (fór í eyði 1944), Múli, Fjarðarhorn, Seljaland (fór í eyði 1953), Klettur.
Frá Kletti liggur leiðin vestur í Múlasveit og byrjaði á Bæ á Bæjarnesi, Kirkjuból, Kvígindisfjörður, Svínanes, Illugastaðir, Vattarnes, Skálmardalur, Skálmarnesmúli, Ingunnarstaðir, Hamar, Deildará, Fjörður, Litlanes.
Júlíus Sigurðsson bóndi á Litlanesi hafði umsjón með svokallaðri eftirlitssímsstöð, þriðja flokks símsstöð allt þar til hann lést síðla árs 1961. Svo er hugsanlegt að Salbjörg eiginkona Júliusar hafi haldið áfram þar til hún og Þorvarður sonur hennar fluttu burt og Litlanes fór í eiði. Litlanes er vestasti bær sýslunnar.
Bæjarröðin birtist eins og Bæjatal Póst og Símamálastjórnarinnar leggur út.

Mér er sagt að það þegar símalínan var lögð út Reykjanesið voru símtæki ekki sett í fyrstu á hvern bæ. Heldur hafi verið sett upp símtæki Kinnastöðum, Reykhólum og á Skerðingsstöðum. Svo voru send skilaboð út á bæina frá þessum símstöðvum þegar svo þurfti. Hvenær símtæki urðu svo á hverjum bæ leikur mér forvitni á að vita.

Þórður Andrésson bjó á Hjöllum í Gufudalssveit frá 1934 - 1947. Veit einhver hvort þar var lagt fyrir síma og hvaða hringing var á Hjöllum?

Þetta er skemmtilegt framtak, ein smá leiðrétting, á Hofsstöðum við Þorskafjörð var hringingin: 2 langar stutt og löng, en ekki löng 2 stuttar og löng.

Það hefur ekki komið fram að Laugaland var á línu með Gufudalssveitinni fyrrum. Hanna systir minnti mig á þetta. Hringingin mun hafa verið löng löng stutt, (eða tvær langar og stutt eins og alltaf var sagt heima). Ég talaði við Guðmund Theodórsson frá Laugalandi til að staðfesta að hringingin væri rétt. Hann mundi þetta nú ekki, enda löngu burtfluttur, en minntist þess að skipt hefði verið um hringingu, og minnti helst að sú nýja hringing hefði verið stutt stutt löng stutt (tvær stuttar löng og stutt). Þessi breyting hefur að líkindum orðið þegar stauralína var lögð fyrir nesið frá Stað eða Árbæ inn að Laugalandi. Guðmund minnti að það hefði verið um 1967 sem hún var lögð. Áður var sem sé tengingin um sæstreng frá Hallsteinsnesi, (úr Grenitrésnesinu, líklega lagður um 1949).
Annar sæstrengur var yfir fjörðinn, frá Kinnarstöðum að Þórisstöðum. Þessir strengir, og þá sérstaklega Þórisstaðastrengurinn, voru oft til bölvaðra vandræða. Þegar ís var á firðinum, sem var held ég í flestum árum meðan sveitasíminn var við lýði, plægðu jakarnir kapalinn upp úr leirnum og rifu einangrunina sem var utanum vírinn. Við það komst raki í strenginn sem orsakaði sambandsrof eða truflanir á línunni. Þetta var einkum þegar kom framá og ísinn losnaði frá löndunum. Jakarnir sem eftir voru á fjörunni voru þá á sífelldri hreyfingu við sjávarföllin. Pabbi (Guðmundur í Gröf) fékk oft smjörþefinn af þessu, en hann var lengi viðgerðarmaður símans í vestanverðum Þorskafirði. Ekki var nú lagt mikið til af viðgerðarefni, og varð hann oftast að tjasla við þetta til bráðabirgða með dekkslöngugúmmíi og vír.

Ég held að ég geti fullyrt að það var aldrei sími á Hjöllum og engin stauralína var milli Múla og Þórisstaða.

Eitt fyrirbæri sveitasímans var afhringing, ein stutt. Það var til að láta vita að símtali væri lokið. Ekki þurftu nú allir að treysta á hana!

Fleiri hringingar í Króksfjarðarnesi? Hvað með Gerði, Ólafshús, Addi og Sóley, kaupfélagsstjórahús, kaupfélag og skrifstofa, banki (Samvinnu-), sláturhúsið?

Líka eitthvað af miðaldra húsum á Reykhólum, Hellisbraut 6,8,10 og fleiri hús?

LEIÐRÉTTING !!!
Ég setti kolvitlausa hringingu að Laugalandi í póstinum hér á undan, hef litið á skakkt blað. Hið rétta er að meðan Laugaland var á Gufsulínunni var hringingin LÖNG STUTT STUTT, (löng og tvær stuttar). Ég biðst forláts á vitleysunni.

Ég vil þakka Dísu frá Gröf fyrir þessar greinargóðu upplýsingar.
Hvernig var það; Hverjir voru línuverðirnir? Ég man eftir Guðmundi Jónssyni frá Mýrartungu aka Gimma, og Sigvalda Guðmundssyni á Hafrafelli sem leystu flest vandamál. Símstöðvarstjórar í Króksfjarðarnesi. Jón Ólafsson, Haukur Friðriksson, Guðllaug Guðmundsdóttir ? Starfsfólk símstöðvarinnar og annað sem fólki kemur í hug varðandi símamálin frá Gilsfjarðarbotni og vestur í Litlanes.

Þegar ég sá hér á vefnum þessa stórskemmtilegu hugmynd þeas.að safna gömlu símhrihgingunum á svæðinu, rifjaðist upp fyrir mér að ég ætti í fórum mínum "hringingaplan" fyrir"Innsveit" og Reykjanes. Ég hafði gjarnan þá áráttu sem unglingur að skrifa hjá mér hitt og þetta án tillits til notagildis. Þetta mun ég hafa skrifað uþb. 1956-1958. Læt "planið" fylgja hérmeð:
Árbær ..../ Ás _ /Berufjörður _ _ ./Bjarkalundur _.._ /Borg ._ _. /Bær . _ _ /Garðshorn (Jón Guðm.) _ _ . /Gillastaðir . . . /Grund . . . _ _ /Hafrafell _ _ /Hamarland _ . _ . /Hlíð _ _ _ . Hofstaðir _ _ . _ / Hólar . . / Hyrningsstaðir_ ._ _ /Höllustaðir _ . . /Kambur. . _ / Hríshóll . . . _ / Kinnarstaðir . _ / Klukkufell _ _ . . / Kollabúðir _ _ _ / Króksfjarðarnes _ . _ / Læknir _ . / Miðhús . . _ . / Miðjanes (skemmd í handriti) Munaðstunga . . _ _ / Múli (Múlakot) . . . . / Mýratunga _ . . / Prestshús . _ . / Reykhólar . . . / Seljanes . . _ . . / Staður . . _ / Skáldstaðir _ . . . / Skerðingsstaðir . . / Skógar _ / Sæmundarhús _ . . . _ / Tilraunastöð _ _ / Tröð (Jens) . _ . . /

Skemmtilegar pælingar.
Vona að einhverjir séu enn að skoða þetta þótt ár sé senn liðið frá útgáfu.
Var aldrei sími á Seljalandi í Kollafirði? Samkv. Kleifastaðasímaskránni hennar Kötu, og þessari líka, virðist það hafa orðið eitthvað útundan.
Mig minnir það hafi verið skipt um hringingu í Djúpadal þegar símstöðin á Brekku lagðist af. Það mátti ekki vera sama hringing og á símstöðina í Króksfjarðarnesi.
Held að það hafi gerst ´73, en gæti skakkað ári.
Man ekki fyrir víst hvaða hringingu Djúpidalur fékk í staðinn. Gott samt ef það var ekki Barmshringingin?
Svari nú þeir sem vita.

Smá viðbót um líftíma þesssara hringinga:
Úti á Múlanesi hékk línan uppi og var notuð þar milli bæja í mörg ár eftir að hún opinberlega var aflögð.
Ég er alls ekki viss hversu lengi, en gott ef það var ekki fram undir aldamót.
Ég var síðast að þvælast þarna í þangi eða tófu ´97 og ´98 og held hún hafi enn verið notuð þá. Er samt alls ekki viss og vonandi veit einhver betur.