Gásakaupstaður við Eyjafjörð hefur samið við Hjalta Hafþórsson bátasmið á Reykhólum um að tveir bátar sem hann hefur smíðað verði hluti af leikmynd Gásahátíðar sem haldin er árlega og stendur í nokkra daga. Þar verði þeir bæði til sýnis og notkunar. Um er að ræða endurgerð Vatnsdalsbátsins frá 10. öld og bátinn Króka-Ref sem er endurgerð báta frá 14.-15. öld.
...
KM þjónustan í Búðardal óskar eftir bifvélavirkja til starfa eða manni með góða reynslu í bílaviðgerðum. Æskilegast er að viðkomandi hafi meirapróf fyrir dráttarbíla. Upplýsingar gefur Kalli í síma 895 6677.
...
Markaðsstofur landshlutanna halda vinnufundinn Mannamót fyrir samstarfsfyrirtæki sín í Reykjavík 23. janúar kl. 13-17 í flugskýli flugfélagsins Ernis á Reykjavíkurflugvelli. Fundurinn er hugsaður sem kynningarvettvangur ferðaþjónustunnar á landsbyggðinni og tækifæri til að koma á fundum fagaðila í greininni. Tilgangurinn er að kynna landsbyggðarfyrirtæki fyrir ferðaþjónum í Reykjavík. Mannamót hjálpa til við að mynda tengsl frá höfuðborginni á landsbyggðina, segir í tilkynningu. Gestum gefst kostur á kynna sér það sem einstakir landshlutar bjóða með áherslu á vetrarferðamennsku.
...
Vilhjálmur Sigurðsson frá Straumi við Hafnarfjörð, fyrrum bóndi og oddviti á Miðjanesi í Reykhólasveit, andaðist 2. janúar, 81 árs að aldri. Hann lætur eftir sig eiginkonu og fjögur börn. Vilhjálmur og Halldóra Játvarðardóttir (Lóa á Miðjanesi) gengu í hjónaband í árslok 1963 og tóku árið eftir við búi á Miðjanesi af foreldrum Lóu. Börn þeirra eru Sigrún Rósa (f. 1964), Hjördís Dröfn (f. 1969) og Játvarður Valdimar (f. 1970). Fyrir átti Vilhjálmur soninn Hörð Vigni (f. 1958) með Sólbjörtu Kristjánsdóttur. Eftirlifandi eiginkona Vilhjálms er Sunna Guðmundsdóttir. Þau voru búsett í Hveragerði.
...
„Það hefur lengi verið vandamál að fá fólk til starfa fyrir félagið,“ segir Snæbjörn Kristjánsson, formaður Breiðfirðingafélagsins, í nýjasta fréttabréfi þess. Til staðfestingar tilfærir hann eftirfarandi úr fréttabréfinu í febrúar fyrir þrettán árum: Það er mikið í húfi fyrir sérhvert félag að til forystu sé valin sterk og framsækin stjórn, sem hefur vakandi auga fyrir vilja hins almenna félaga ... Það sem að mínu mati háir félaginu mest er skortur á yngra fólki til starfa og stjórnunar. Hér á ég við fólk á aldrinum 25 til 50 ára.
...
Gulleggið er ein vinsælasta frumkvöðlakeppni sem haldin er á Íslandi og öllum heimilt að taka þátt í henni, segir í fréttatilkynningu. Fyrirmyndin er frá MIT-háskólanum í Bandaríkjunum og VentureCup á Norðurlöndum. Meginmarkmiðið er að skapa vettvang fyrir athafnafólk til að öðlast þjálfun og reynslu í mótun nýrra viðskiptahugmynda og rekstri fyrirtækja. Þannig er keppnin orðin gæðastimpill á viðskiptahugmyndir og fyrir frumkvöðla sem munu á næstu árum laða að enn fleiri fjárfesta, skapa ný störf og verðmæti fyrir íslenskt þjóðfélag, segir í tilkynningunni.
...
Á þrettándanum eru síðustu forvöð að kaupa - og nota - flugelda að þessu sinni. Björgunarsveitin Heimamenn í Reykhólahreppi selur flugelda í húsi sínu við Suðurbraut á Reykhólum frá kl. 16 til 20 í dag, mánudaginn 6. janúar. Þrettándinn er jafnframt síðasti dagurinn þegar almenn notkun flugelda er heimil. Hins vegar eru ekki nein tímamörk hvenær styrkja má björgunarsveitir.
...
Reykhólahreppur auglýsir eftir umsjónarmanni félagsstarfs barna og unglinga á Reykhólum. Um er að ræða tólf klukkutíma á mánuði eða þar um bil. Starfið felst í umsjón með opnu húsi barna og unglinga tvo fimmtudaga í mánuði og utanumhaldi með félagsstarfi unglinga utan skólans. Nýr umsjónarmaður þarf að geta tekið við starfinu núna í febrúar.
...
Saltgerðarmennirnir Garðar Stefánsson og Søren Rosenkilde hjá Norðursalti (Norður & Co.) á Reykhólum hafa ekki farið varhluta af byrjunarörðugleikum frekar en aðrir frumkvöðlar sem nota nýja hönnun og nýja tækni. „Við reiðum okkur á tæknina til að fá sem allra mest afköst ásamt því að gæðin séu eins mikil og nokkur kostur er. Þarna höfum við lent í ýmsum vandamálum, eins og með heita vatnið og saltsuðupönnurnar. Við lentum í því rétt fyrir formlega opnun að önnur pannan gaf sig vegna galla. Það þurfti að hanna pönnurnar upp á nýtt og auðvitað olli þetta töfum. Við þurftum að senda þær suður sitt í hvoru lagi til að við gætum þó haldið framleiðslunni áfram með annarri,“ segir Garðar.
...
Tvö börn, systrabörn, fæddust í hóp fólksins í Fremri-Gufudal á nýliðnu ári og nú eru þar tvær Svandísir og tveir Einarar. Afi og amma barnanna ungu eru Svandís Berglind Reynisdóttir frá Gufudal og Einar Hafliðason frá Hafrafelli, eldri búendurnir í Fremri-Gufudal. Einar Valur Styrmisson fæddist 10. júní eins og hér hefur verið greint frá, en foreldrar hans eru Jóhanna Ösp Einarsdóttir og Styrmir Sæmundsson í Kaplaskjóli í Fremri-Gufudal. Svandís Björg Jóhannsdóttir fæddist síðan 21. nóvember, en foreldrar hennar eru Hafrós Huld Einarsdóttir (systir Jóhönnu) og Jóhann Freyr Guðmundsson í Fremri-Gufudal.
...
