Gróðurkort af Íslandi / lmi.is.

Ef þessi tollasamningur gengur fram óbreyttur mun það valda mikilli byggðaröskun í landinu. Þetta mun ekki bara bitna á þeim bændum sem þarna eiga í hlut, heldur hefur þetta áhrif á svo margt annað sem fylgir þessari atvinnustarfsemi í hliðargreinum í landbúnaðargeiranum. Ég held að menn ættu að hugsa sig tvisvar um áður en þeir skera í raun og veru upp herör gagnvart byggð í landinu, sem verið er að gera með þessum tollasamningi. Það er verið að ógna byggð um landið með þessum samningi. Það er með ólíkindum að þetta eigi að fara sisona í gegn, án þess að afleiðingar af þessum samningi verði skoðaðar ofan í kjölinn.

Vestfirsku göngukortin sjö.

Eitt af göngukortunum sjö sem spanna allan Vestfjarðakjálkann (kort nr. 2, Ísafjarðardjúp til Dýrafjarðar) er uppselt hjá útgefandanum, Ferðamálasamtökum Vestfjarða. Verið er að undirbúa endurprentun sem fyrst og þess vegna er óskað eftir ábendingum um það hvaða leiðir á kortinu hafa ekki reynst nógu heppilegar og annað sem máli kann að skipta. Þeir ferðaþjónar sem vilja auglýsa á kortinu eru beðnir að hafa samband við Hörpu Eiríksdóttur.

Stöðugt fjölgar þeim sem fá fréttabréf Breiðfirðingafélagsins í tölvupósti. Það er töluverður sparnaður fyrir félagið, því að póstburðargjöld, pappír og ljósritunarkostnaður fara stöðugt hækkandi. Til að fá fréttabréfið í tölvupósti er þægilegast að senda póst gegnum þar til gert form á vef félagsins. Á undanförnum árum hefur fréttabréfið komið út sex sinnum á ári. Fjórða tölublaðið á þessu ári var að koma út.

Reynir Þór og Sveinn Borgar við nýja sameiginlega skiltið sitt.

Núna á sunnudaginn komu þeir Reynir Þór Róbertsson kaupmaður í Hólabúð og Sveinn Borgar Jóhannesson gistiheimilisrekandi (í hinu gamalkunna húsi Álftalandi nýuppgerðu) þessu myndarlega skilti fyrir við vegamótin þar sem beygt er af Vestfjarðavegi 60 inn á spottann niður að Reykhólum (bundið slitlag alla leið).

Reykhólahreppur beinir þeim eindregnu tilmælum til fólks að gæta fyllstu aðgæslu varðandi hunda þegar ungar eru að komast á legg og vera alls ekki á ferð með lausa hunda. Jafnframt er fólk beðið að gæta þess að ómerktir og bjöllulausir kettir séu ekki á fuglaveiðum. Svæðið kringum Reykhólaþorp er eitt allsherjar varpland, eins og reyndar Reykhólahreppur allur. Hvort sem litið er til lands eða eyja er héraðið fjölbreyttasta búsvæði fugla hérlendis og fuglalífið ein af helstu dásemdum þess.

Grettislaug / ÁG.

Sundlaugarvörð vantar að Grettislaug á Reykhólum nú þegar. Umsækjandi þarf að hafa náð 18 ára aldri. Nánari upplýsingar í síma 434 7738 þegar laugin er opin og á skrifstofu Reykhólahrepps í síma 430 3200.

Reykhólaskóli / ÁG.

Reykhólaskóli óskar eftir að ráða grunnskólakennara. Annars vegar vantar umsjónarkennara með miðstigi. Um er að ræða kennslu í bóklegum greinum, íslensku, stærðfræði, samfélagsfræði, upplýsingamennt o.fl. Hins vegar vantar verkgreinakennara. Um er að ræða kennslu í smíði, myndmennt og heimilisfræði.

Heilsugæslustöðin á Reykhólum.

Guðrún J. Guðmundsdóttir augnlæknir verður með móttöku á heilsugæslustöðinni á Reykhólum á fimmtudag, 2. júní. Tímapantanir í síma 432 1450.

Þörungaverksmiðjan / ÁG 2013.

Aðalfundur Þörungaverksmiðjunnar hf. verður haldinn miðvikudaginn 8. júní á skrifstofu félagsins, Karlsey, Reykhólum, og hefst kl. 14. Á dagskránni verða aðalfundarstörf skv. fyrri samþykktum.

Hægt verður að fá að máta UDN-íþróttaföt á Reykhólum annað kvöld, fimmtudag. Mátunin fer fram í Reykhólaskóla eftir skólaslitin, eða um kl. 20.45. UDN er skammstöfun fyrir Ungmennasamband Dalamanna og Norður-Breiðfirðinga, en Umf. Afturelding í Reykhólahreppi er meðal aðildarfélaga þess. Hér fyrir neðan er listi yfir fatnaðinn sem er í boði og verðið á honum.