Koltvísýringsbólur, reyndar ekki í Breiðafirði heldur í gosdrykk.

„Við erum að aðstoða Hrönn Egilsdóttur hjá Háskóla Íslands, sem rannsakar súrnun sjávar við Ísland,“ segir Jón Einar Jónsson líffræðingur, forstöðumaður Rannsóknaseturs Háskóla Íslands á Snæfellsnesi. „Leitað er að stöðum þar sem koltvísýringsgas flæðir af hafsbotni og birtast þá loftbólur upp úr sjónum, stöðugt streymi eða loftbólur á stangli. Í Breiðafirði eru heimildir um þessi svokölluðu bólustreymi, sérstaklega norðanmegin. Við spyrjum: Kannast menn við staði þar sem loftbólur birtast upp úr sjó?“

Skálmarnesmúlakirkja sumarið 1959. Hún var vígð árið eftir og hafði verið hátt í áratug í smíðum.

« 1 af 2 »

Finnbogi Jónsson frá Skálmarnesmúla í Múlasveit í Austur-Barðastrandarsýslu (nú Reykhólahreppi hinum nýja) lést í lok síðasta mánaðar, hálfsjötugur að aldri. Hann var jarðsunginn í Guðríðarkirkju syðra en síðan jarðsettur á bænum þar sem hann fæddist og ólst upp, kirkjustaðnum Skálmarnesmúla. Margvísleg ritstörf munu halda nafni hans á lofti um ókomna tíð, en veigamesta verkið í þeim efnum er ritið mikla Hjalla meður græna, Austur-Barðastrandarsýsla 1900-2012, sem út kom árið 2014.

« 1 af 5 »

Hafnar eru framkvæmdir á lóð Dvalarheimilisins Barmahlíðar á Reykhólum, allt upp undir gatnamótin við Hólabúð. Ætlunin er að gera þar gönguleiðir með áningarsvæðum þar sem hægt verður að tylla sér niður í góðu veðri til skrafs og ráðagerða. „Hugmyndavinna var að stærstum hluta unnin á Barmahlíð af starfsfólki og íbúum heimilisins, ásamt vel þegnum ábendingum frá fólki hér á Reykhólum,“ segir Hjalti Hafþórsson, umsjónarmaður fasteigna Reykhólahrepps. Hann segir að vonandi verði hægt að klára gönguleiðir í sumar og koma niður fallegum gróðri. Síðast en ekki síst verði lagður mikill metnaður í að endurskapa Birnulund, verk Birnu Norðdahl heitinnar, skákmeistara og frumkvöðuls í kvennaskák hérlendis.

Óskað er eftir starfsmanni 20 ára eða eldri í 50-75% stöðu á Báta- og hlunnindasýningunni á Reykhólum í sumar. Vinnutími kl. 10.45-17.30 og einhver kvöld. Mikilvægt er að umsækjendur séu jákvæðir, duglegir og samviskusamir, hafi gaman af samskiptum við fólk og séu kunnugir Reykhólahreppi og því sem hann hefur að bjóða. Jafnframt er kunnátta í erlendum tungumálum mikilvæg, sérstaklega ensku. Reynsla af þjónustustörfum er kostur.

Jóhannes Páll Halldórsson.

Útför Jóhannesar Páls Halldórssonar, sem andaðist 16. maí, kominn á tíræðisaldur, verður í Reykhólakirkju kl. 14 á morgun, mánudaginn 23. maí. Erfisdrykkja verður í íþróttahúsinu á Reykhólum að jarðarför lokinni. Jóhannes fæddist á Patreksfirði 21. júlí 1924, sonur Margrétar Sigríðar Hjartardóttur og Halldórs Jóhannessonar. Eiginkona hans var Guðrún Þórunn Árnadóttir frá Hyrningsstöðum í Reykhólasveit. Hún andaðist á liðnu sumri og var einnig jarðsett á Reykhólum.

Þjónustubíllinn nýi sem fer um landið.

Heyrnar- og talmeinastöð Íslands (HTÍ) er heilbrigðisstofnun ríkisins sem annast þjónustu við heyrnarskerta og heyrnarlausa um land allt. Stöðin er nú á ferð um landið og verður í Búðardal mánudaginn 30. maí. Móttaka heyrnarfræðings HTÍ verður við heilsugæsluna í Búðardal þann dag milli kl. 9 og 12. Heyrnarmælingar, ráðgjöf um heyrnartæki, aðstoð og stillingar heyrnartækja og fleira.

Rauðhærða tígrisdýrið rólynda.

Kötturinn Eldibrandur sem hér var lýst eftir er kominn í leitirnar eftir viku á vergangi. Eftir að greint var frá hvarfi hans hafði fólk samband og kvaðst hafa séð til ferða hans á Reykhólum. „Hann virðist hafa hitt annan kött í nágrenni við Reykjabrautina en þeim ekki komið vel saman. Þess vegna hefur hann sennilega forðað sér alveg hinumegin í þorpið þar sem nokkrir sáu til hans núna síðustu daga,“ segir Una Ólöf Gylfadóttir.

Reykhólahreppur ætlar að taka þátt í Hreyfiviku Ungmennafélags Íslands dagana 23.-29. maí, eða frá mánudegi og fram á sunnudag. Frítt á alla viðburði. Dagskráin er þessi:

Drykkurinn Íslandus.

Matís stendur fyrir vinnufundi á fimmtudag þar sem farið verður gegnum praktíska þætti í þróun matvöru og hvernig vel skipulögð matarhönnun getur gert vöru einstaka og eftirsóknarverða, eins og segir í tilkynningu. Allar hugmyndir þar sem matur er helsta viðfangsefnið eru velkomnar. Þetta getur snúist um framleiðslu, framreiðslu eða matarupplifun. „Að þessu sinni höfum við sérstaklega mikinn áhuga á sjávartengdu hráefni en að sjálfsögðu eru allir með góðar matarhugmyndir velkomnir.“

Ungmennafélag Íslands (UMFÍ) hefur undanfarin fjögur ár tekið þátt í evrópskri lýðheilsuherferð undir nafninu Now We Move. Hér á landi kallast hún Hreyfivika UMFÍ. Markmiðið er að fá hundrað milljón fleiri Evrópubúa til að hreyfa sig reglulega áður en árinu 2020 er náð. Hreyfivika UMFÍ snýst öðru fremur um það að kynna kostina sem felast í virkri hreyfingu og íþróttum. UMFÍ tekur verkefnið sem langhlaup og hvetur alla til að finna sína uppáhaldshreyfingu og stunda hana reglulega eða a.m.k. í 30 mínútur daglega.