Hólabúð á Reykhólum verður opin kl. 13-16 á morgun, mánudag, annan dag hvítasunnu.

Dvalarheimilið Barmahlíð á Reykhólum.

Farið var yfir tillögur að göngustígum og umhverfisbótum við Dvalarheimilið Barmahlíð á síðasta fundi skipulagsnefndar Reykhólahrepps. Vegna ríkjandi vindáttar gerði nefndin athugasemdir við staðsetningu gróðurhúss. Einnig taldi hún að rétt gæti verið að búa til skjól fyrir vindi við suðausturhorn hússins. Auk þess var eftirfarandi bókað:

Samþykkt var á síðasta fundi menningarmálanefndar og staðfest í sveitarstjórn, að vegna lítillar aðsóknar yfir sumartímann verði Héraðsbókasafn Reykhólahrepps lokað í sumar. Fólk sem er með bækur í láni er beðið að skila þeim sem fyrst. Hins vegar verður hægt að fá aðgang að safninu eftir þörfum með því að hafa samband við Herdísi Ernu bókavörð eða Ástu Sjöfn skólastjóra.

Guðbjörg og Sveinn Borgar í stofunni, tilbúin að taka á móti gestum. Mynd: hþm.

Stöðin á Reykhólum 1949-1950. Eigandi myndar: Örn Elíasson frá Reykhólum.

Skilti sem Sveinn skrúfaði á húsið í gær.

« 1 af 3 »

Í tilefni af opna húsinu hjá Sveini Borgari og Guðbjörgu núna í dag, hvítasunnudag, á gistiheimilinu nýstandsetta í húsinu á Reykhólum sem á síðari árum hefur borið nafnið Álftaland, skal hér birt mynd af þessu sama húsi sem tekin var um 1949-1950 (mynd nr. 2). Húsið var lengi framan af kallað Stöðin, af skiljanlegum ástæðum; íbúðarhús og bækistöð Tilraunastöðvar landbúnaðarins í sauðfjárrækt.

Sveinn Borgar og Guðbjörg á Reykhóladögum fyrir fáeinum árum.

Sveinn Borgar Jóhannesson og Guðbjörg Tómasdóttir verða með opið hús núna á sunnudag milli kl. 16 og 18 á gistiheimilinu á Reykhólum, sem um langt árabil bar heitið Álftaland og mun gera það áfram. „Vonumst til að sjá sem flesta,“ segja þau. Léttar veitingar verða í boði, auk þess sem hægt verður að sjá það sem þarna er búið að framkvæma á undanförnum mánuðum.

Hluti myndar á forsíðu ársskýrslu OV fyrir árið 2015.

Hagnaður varð af venjubundnum rekstri Orkubús Vestfjarða á síðasta ári, ellefta árið í röð. Framleiðsla vatnsaflsvirkjana Orkubúsins var góð eða um 93 GWh og jókst um rúm 10% frá fyrra ári. Samt er afkoma OV ekki viðunandi, hvort sem horft er til fjárfestingarþarfar fyrirtækisins eða ávöxtunar eigin fjár, þrátt fyrir nokkurn hagnað. Afkoman er nokkuð lakari en áætlanir gerðu ráð fyrir og skýrist af kostnaðarauka OV vegna launahækkana og óveðurstjóna á háspennulínum.

Í tilefni hvítasunnunnar verður Hótel Bjarkalundur með pítsutilboð núna frá og með föstudeginum og fram á mánudagskvöld. Afslátturinn er allt að 20% frá verðinu í fyrra. Við bjóðum sveitunga okkar velkomna til okkar um hvítasunnuna, segir í tilkynningu frá Bjarkalundi.

Skráning fermingarbarna fyrir veturinn 2016-2017 fer nú fram í Reykhólaprestakalli. Foreldrar væntanlegra fermingarbarna eru vinsamlegast beðnir að senda sr. Hildi Björk Hörpudóttur tölvupóst á netfangið hildur.horpudottir@kirkjan.is eða hringja í síma 699-5779. „Fermingarfræðslan næsta vetur verður með skemmtilegasta móti, en við byrjum á að fara í fimm daga í Vatnaskóg 22. ágúst.“

Nokkur eintök af nýútkomnum Breiðfirðingi eru komin til sölu í Hólabúð á Reykhólum. Þetta er 64. árgangur Breiðfirðings og annar árgangurinn undir ritstjórn Svavars Gestssonar eftir að ritið var vakið af nokkrum dvala. Hefti þetta er hin veglegasta bók, á þriðja hundrað síður með fjölda mynda.

Breiðfirðingur, ársrit Breiðfirðingafélagsins, kom út í gær og var kynntur til leiks í mannfagnaði í Breiðfirðingabúð. Þetta er 64. árgangur Breiðfirðings, en annar árgangurinn undir ritstjórn Svavars Gestssonar eftir að ritið var vakið af blundi. Í fyrra var orðið Nýr haft fyrir framan heitið en núna þarf þess ekki lengur. Hefti þetta er hin veglegasta bók, á þriðja hundrað síður með fjölda mynda. Í inngangsorðum gerir Svavar skilmerkilega grein fyrir efni ritsins og fara þau hér á eftir.