Ráðgjafarþjónusta Krabbameinsfélagsins boðar til örráðstefnu um karla og krabbamein kl. 16.30-18 á fimmtudag, 12. mars, í húsi félagsins að Skógarhlíð 8 í Reykjavík. Krabbameinsfélag Breiðfirðinga er meðal aðildarfélaga Krabbameinsfélags Íslands. Allir eru velkomnir.
...
Bókasafnið á Reykhólum (Héraðsbókasafn Reykhólahrepps) verður ekki opið á morgun, miðvikudag. Á föstudag, 13. mars, verður það aftur á móti opið lengur en venjulega, eða frá kl. 9 til 13.
...
Veður var gott í Reykhólasveit í gær, sjaldan slíku vant þessar umhleypingasömu vikur. Fólk sammæltist á feisinu að skreppa áleiðis upp á Þorskafjarðarheiði um hádegisbilið til að njóta blíðunnar og snævarins og útiverunnar í hægri sunnanátt og hita rétt undir frostmarki. Margar fjölskyldur komu saman uppi í Töglunum með skíði og sleða og fleira til að renna sér á og sumir voru með vélsleða eða fjórhjól og allir skemmtu sér vel. Að sjálfsögðu var kakó og kaffi með í för og a.m.k. einn hundur.
...
„Nei, við áttum alls ekki von á svona góðri aðsókn,“ segir Harpa Eiríksdóttir á Báta- og hlunnindasýningunni á Reykhólum, þar sem Svavar Knútur var með tónleika í gærkvöldi og las auk þess upp úr ljóðabókum. Brandaraljóðabókum, eins og einhver sagði. „Það var setið á öllum stólum, hátt í fimmtíu manns sem mættu,“ segir Harpa. Auk tónlistar og ljóða var kaffihlaðborð eins og sjá má á myndunum sem hér fylgja og Gústaf Jökull Ólafsson tók.
...
Dóra og Tóta í Barmahlíð á Reykhólum verða með kynningu á snyrtivörum og hreinlætisvörum í handavinnustofunni á efri hæðinni í Barmahlíð milli kl. 13 og 16 á morgun, sunnudag. Um er að ræða vörur frá fyrirtækinu Federico Mahora (FM).
...
Eins og hér kom fram voru víkingarnir og Sturlungaöldin viðfangsefni árshátíðar Reykhólaskóla, sem haldin var í íþróttahúsinu á Reykhólum núna í kvöld. Nemendur bæði leikskólans og grunnskólans fluttu atriði sem tengdust þessu.
...
Núna á sunnudag (8.3.) verður sögustund á Byggðasafni Dalamanna á Laugum í Sælingsdal eins og verið hefur marga sunnudaga í vetur. Að þessu sinni segir Sveinn Ragnarsson á Svarfhóli í Geiradal frá mannlífi og sögu í Austur-Barðastrandarsýslu. Þessar sögustundir hafa verið í umsjá Valdísar Einarsdóttur safnvarðar, þar sem bæði hún og gestir hafa sagt frá áhugaverðum hlutum sem tengjast Dalahéraði fyrr og nú.
...
Liðin tíu sem tengjast Vestfjarðakjálkanum eru öll fallin úr leik í Spurningakeppni átthagafélaganna. Í átta liða úrslitum í gærkvöldi fóru leikar þannig: Svarfdælingar og Dalvíkingar unnu Dýrfirðinga 8:7, Vestmannaeyingar unnu Djúpmenn 9:8, Húnvetningar unnu Breiðfirðinga 13:6 og Siglfirðingar unnu Norðfirðinga 10:5. Úrslitin ráðast svo á fimmtudagskvöldið í næstu viku. Fyrst keppa í undanúrslitum Svarfdælingar og Dalvíkingar við Siglfirðinga og Vestmannaeyingar við Húnvetninga og síðan keppa sigurliðin í þeim rimmum til úrslita.
...
Svavar Knútur verður með tónleika á Báta- og hlunnindasýningunni á Reykhólum núna á laugardagskvöldið, 7. mars. Húsið verður opnað kl. 20. Tónleikarnir eru í samvinnu við Sparisjóð Strandamanna. Léttar veitingar innifaldar í verði.
...
Vegna árshátíðar Reykhólaskóla verður Grettislaug á Reykhólum opin milli kl. 15 og 18 á morgun, föstudag, en ekki milli kl. 16 og 20 eins og verið hefði að öllu venjulegu.
...
