Hjúkrunarfræðingur verður ekki með viðveru á heilsugæslunni á Reykhólum á fimmtudaginn, 6. nóvember. Þetta kemur fram í tilkynningu frá starfsfólki Heilbrigðisstofnunar Vesturlands (HVE), Búðardal og Reykhólum.
...
Hæstiréttur kvað á fimmtudag upp dóm í máli Ólínu Kristínar Jónsdóttur, eiganda jarðarinnar Miðhúsa í Reykhólasveit, gegn íslenska ríkinu, varðandi landamerki Miðhúsa og Barma, sem eru í eigu ríkisins. Á landskikanum sem um var deilt er malarnáma og hefur Ólína talið sig eiga rétt á greiðslu fyrir malarefni sem þar er tekið enda sé það hennar eign. Niðurstaða Hæstaréttar féll Ólínu í vil: Landskikinn sem deilt var um, og þar með malarnáman, tilheyra samkvæmt dómnum Miðhúsum en ekki Börmum.
...
Meðal þekktustu verka Björns Th. Björnssonar heitins listfræðings er Virkisvetur, söguleg skáldsaga þar sem sviðið er Reykhólar, auðugasta höfuðból landsins á sínum tíma. Í síðustu Kilju kom Egill Helgason í heimsókn á Reykhóla og gerði þessari frásögn dálítil skil.
...
Vegna hins ótrygga veðurútlits hefur verið ákveðið að fresta kaffihússfagnaði leikfélagsins Skruggu, sem átti að halda í íþróttahúsinu á Reykhólum annað kvöld, laugardag, fram á fimmtudagskvöldið 20. nóvember. Annað óbreytt.
...
Rjúpnaveiði og önnur skotveiði er stranglega bönnuð í landareignum þeirra jarða í Reykhólahreppi sem taldar eru hér fyrir neðan. Fylgst er með því eins og kostur er hvort gegn banninu er brotið. Ef eigendur eða umráðamenn vilja tilkynna hér um veiðibann á fleiri jörðum í hreppnum má senda tölvupóst í netfangið vefstjori@reykholar.is eða hringja í síma 892 2240. Þá verður þessi listi uppfærður jafnóðum.
...
Allir sauðfjárbændur á svæðinu frá Reykjanesskaga til Vestfjarða eiga að hafa fengið bréf snemma í október þar sem þeim er boðið að taka þátt í námskeiðinu Sauðfjárskólanum sem Ráðgjafarmiðstöð landbúnaðarins á Hvanneyri gengst fyrir. Skráningar standa yfir og hefur skráningarfrestur verið framlengdur til mánudagsins 3. nóvember. Í Sauðfjárskólanum eru haldnir sjö fræðslufundir sem dreifast á u.þ.b. eitt ár. Fundirnir verða haldnir á virkum dögum og standa kl. 13-17 hverju sinni. Fjöldi fundastaða á svæðinu fer eftir þátttökunni en vonast er til að hægt verði að halda Sauðfjárskólann á a.m.k. fjórum stöðum á þessu svæði næsta árið.
...
Stjórn Fjórðungssambands Vestfirðinga lýsir miklum vonbrigðum með þá stöðu sem komin er upp á Vestfjörðum, með fækkun opinberra starfa á undanförnum árum og almennan samdrátt í fjárveitingum til stofnana á Vestfjörðum. Öll þjónustu- og atvinnusvæði á Vestfjörðum hafa tapað störfum og fundið fyrir lækkun þjónustustigs vegna minni umsvifa í starfsemi ríkisins. Framboð starfa minnkar og fábreyttni atvinnulífs eykst.
...
Umbúðir Norðursalts á Reykhólum hlutu á föstudag hin virtu Red Dot verðlaun í Berlín fyrir einstaka hönnun. Meðal þeirra sem hlotið hafa verðlaun Red Dot í gegnum tíðina eru fyrirtæki á borð við Nike, Apple og Pepsi. Auglýsingastofan Jónsson & Le’macks sá um hönnun á umbúðum og merkjum Norðursalts í náinni samvinnu við Norður & Co, framleiðendur Norðursalts. Nú þegar hafa umbúðirnar hlotið Lúðurinn frá ÍMARK og FÍT-verðlaunin ásamt því að hafa verið tilnefndar til Silfurljónsins í Cannes.
...
„Endilega taka laugardagskvöldið frá,“ segir Solla Magg (Sólveig Sigríður Magnúsdóttir), formaður leikfélagsins Skruggu. „Þetta verður frábær skemmtun, leikþættir og söngur, grín og gleði, og kaffi og meðlæti í hléinu.“ Þarna er hún að tala um kaffihússkvöld sem efnt verður til í íþróttahúsinu á Reykhólum núna þann 1. nóvember. Fagnaðurinn hefst kl. 20.30 en húsið verður opnað hálftíma fyrr.
...
Meðal félagsmanna í Félagi vestfirskra listamanna er fólk í Reykhólahreppi en fleiri liðsmenn eru vel þegnir. Félagið gefur út ársrit með heitinu List á Vestfjörðum og núna hefur ritstjórinn sent frá sér pistilkorn varðandi næsta hefti, sem hér er birt. Sérstök athygli skal vakin á eftirfarandi klausu: „Umfjöllun í List á Vestfjörðum er góð leið til að kynna sjálfan sig og verkin sín, blaðið er með góða dreifingu og lifir lengi. Við höfum alltaf lagt áherslu á að allt svæðið fái að njóta sín og leggjum kapp á að svo verði áfram. Til þess að fá umfjöllun í blaðið þarft þú að vera í Félagi vestfirskra listamanna.“ Pistilkornið í heild er á þessa leið:
...
