Eins og hér kom fram fyrir skömmu auglýsir Reykhólahreppur eftir áhugasömum aðila til að annast Reykhóladagana í sumar sem haldnir verða 25.-28. júlí. Viðkomandi verður að hafa náð 18 ára aldri. Starfið felst bæði í undirbúningi hátíðarinnar og umsjón með framkvæmd hennar.
...
Guðrún J. Guðmundsdóttir augnlæknir verður með móttöku á Heilsugæslustöðinni í Búðardal fimmtudag 4. apríl. Tímapantanir í síma 432 1450.
...
Klárað var fyrir helgi að steypa síðasta hluta plötunnar í vinnsluhúsi Íslenska saltfélagsins ehf. við Reykhólahöfn, en hún var steypt í áföngum. Fimm menn voru þarna að störfum fyrir utan Guðlaug Theódórsson sem kom með reglulegu millibili á steypubílnum með nýja hræru. Jafnframt því sem tekið var við steypunni var verið að slípa þann hluta plötunnar sem steyptur hafði verið daginn áður.
...
Um hálftíuleytið í gærkvöldi bættist í hóp vorboða í Reykhólahreppi þegar tvílembingar sáu dagsins ljós á Gróustöðum, en móðir þeirra er ær nr. 638 hjá Signýju M. Jónsdóttur. Þetta eru hrútur og gimbur sem þegar í stað voru nefnd Heppinn Snær og Lukka Mjöll. Ærin hefur fengið um mánaðamótin október-nóvember (meðganga sauðkindar er áætluð 143 dagar). Þá var ekki búið að taka ær á hús á Gróustöðum.
...
Vel var mætt á aðalfund Félags eldri borgara í Dalabyggð og Reykhólahreppi sem haldinn var í Króksfjarðarnesi í gær. Eftir fundinn var kaffi í boði Bjarkar Bárðardóttur og Guggu í Gautsdal, farið var í vísnaleik og vefaradans og kórinn söng. Í skýrslu Þrúðar Kristjánsdóttur formanns félagsins kom fram, að starfið er stöðugt að eflast. Hér fara á eftir nokkrir punktar varðandi félagsstarfið og það sem félagsfólki stendur til boða.
...
Félag eldri borgara í Dölum og Reykhólasveit lýsir yfir ánægju með að farið sé að texta meira af innlendu efni í sjónvarpi RÚV, m.a. fréttir. Það kemur sér vel fyrir marga sem eru heyrnarskertir. Við viljum þó jafnframt benda á annað sem truflar verulega talað mál í sjónvarpi eða útvarpi, og það er þegar tónlist er notuð í bakgrunni talaðs máls. Við bendum á að eldri borgarar eru traustur hlustenda- og áhorfshópur hjá RÚV og hafa margir félagar okkar kvartað yfir þessu.
...
Í átta liða úrslitum Spurningakeppni átthagafélaga í fyrrakvöld hafði lið Breiðfirðingafélagsins betur gegn liði Árnesingafélagsins. Liðið skipuðu að þessu sinni Elís Svavarsson, Páll Guðmundsson og Karl Hákon Karlsson. Af þeim er Páll sá eini sem var í sigurliði félagsins í sextán liða úrslitum. Þess má geta, að einn af liðsmönnum félagsins þá, Grétar Sæmundsson, keppir í kvöld til úrslita í Gettu betur þegar MR og MH eigast við.
...
Dymbilvikan er í þann veginn að ganga í garð og á eftir henni kemur páskavikan. Eins og endranær verða breytingar frá hinum venjulega afgreiðslutíma í versluninni Hólakaupum á Reykhólum. Opið og lokað verður sem hér segir:
...
„Viðbrögðin eru langt fram úr væntingum“, segir Viktoría Rán Ólafsdóttir, verkefnastjóri hjá Atvinnuþróunarfélagi Vestfjarða, aðspurð um svörun í netkönnuninni (atvinnulífskönnuninni) sem kynnt var hér á vefnum fyrir skömmu. Í morgun höfðu liðlega sextíu svör borist. Þar af voru tæplega þrír fjórðu (73%) með búsetu í póstnúmeri 380 (Reykhólahreppi), en eins og tekið hefur verið fram er líka óskað eftir svörum frá brottfluttum. Könnun þessi tekur til Reykhólahrepps og sveitarfélaganna á Ströndum.
...
Pokar undir lífrænan úrgang til moltugerðar eru komnir á nokkur heimili á Reykhólum. Eftir páska munu allir geta fengið slíka poka í Hólakaupum. Þessir pokar eru sjálfir úr náttúruefni og verða að moltu eins og innihaldið. Við hliðið á gámasvæðinu neðan við Reykhóla eru komnar tunnur þar sem fólk skilar pokunum með lífræna úrganginum.
...
