Ferðamálastofa auglýsir eftir umsóknum um styrki til smærri verkefna til úrbóta í umhverfismálum á ferðamannastöðum. Áhersla er á verkefni tengd uppbyggingu og vöruþróun gönguleiða og hjólaleiða, bættu aðgengi og öryggi ferðamanna og söguferðamennsku. Hámarksupphæð hvers styrks verður kr. 800 þúsund og er hann ætlaður fyrir efniskostnaði og/eða hönnun.
...
Viðar Guðmundsson, organisti í Reykhólaprestakalli og á Ströndum, heldur afmælistónleika í Reykholti í Borgarfirði í kvöld og síðan í Hólmavíkurkirkju á laugardag. Ásamt honum koma fram fjórir kórar og fjöldi einsöngvara. Tilefnið er þrítugsafmæli Viðars sem var núna á mánudaginn, 20. febrúar. Hann er ásamt stórfjölskyldu búsettur í Miðhúsum í Kollafirði á Ströndum og starfar sem bóndi, kennari, kórstjóri og organisti, rétt eins og hann gerði áður en hann kom úr Borgarfirðinum og settist að í Strandasýslu.
...
„Við óskum Ágústu Ýri Sveinsdóttur til hamingju með þær viðurkenningar sem hún hlaut á nýsveinahátíð Iðnaðarmannafélags Reykjavíkur fyrir að hafa náð bestum árangri allra nemenda á sveinsprófi í rafvirkjun síðastliðið sumar“, segir í auglýsingu frá Rio Tinto Alcan í Morgunblaðinu í dag. „Metnaður Ágústu er okkur öllum hvatning.“
...
Ungmenni í ýmsum gervum (og á ýmsum aldri) komu í dag í Hólakaup á Reykhólum og sungu fyrir húsráðendur í tilefni öskudagsins. Gestirnir fengu góðar viðtökur eins og jafnan á liðnum árum og sneru hvorki tómhentir né tómmynntir heim. Hér fylgja nokkrar myndir en miklu fleiri er að finna undir Ljósmyndir > Myndasyrpur > Öskudagur 2012 (valmyndin vinstra megin).
...
Yfirlit um helstu hátíðir í Reykhólahreppi á þessu ári er smátt og smátt að taka á sig mynd. Hér skulu nokkrum þeirra gerð fyrstu skil. Það eru Barmahlíðardagurinn á sumardaginn fyrsta, útivistarhelgin Gengið um sveit um Jónsmessuna, Bátadagarnir fyrstu helgina í júlí, Reykhóladagarnir síðast í júlí og messudagurinn í Flatey, sem er hluti af Flateyjardögum.
...
Full ástæða er til þess að halda áfram stuðningi ríkisins við refa- og minkaveiðar, að mati þingmannanna Einars K. Guðfinnssonar og Sigmundar Ernis Rúnarssonar. Málið var rætt á Alþingi í síðustu viku, en stjórnvöld hafa fellt niður ríkisframlag til niðurgreiðslu á kostnaði við refaveiðar. Einar sagði ljóst að mikil fjölgun refa hafi haft veruleg áhrif á lífríkið, meðal annars fuglalífið. Hann spurði jafnframt Svandísi Svavarsdóttur umhverfisráðherra hvort ekki ætti að fylgja eftir þeirri stefnu stjórnvalda, að dregið yrði úr tjóni af völdum refs, og taldi að það verði ekki gert nema m.a. með veiði. Ráðherra svaraði því til að það væri stefna yfirvalda að draga úr tjóni af völdum refs en ekki að útrýma honum.
...
Öskudagsskemmtun verður haldin í íþróttahúsinu á Reykhólum á morgun, öskudag, og hefst klukkan 15. Kötturinn verður sleginn úr „kassanum“ en síðan verður diskótek með leikjum og fjöri. Kaffisala verður á vegum 8.-10. bekkjar og kostar 500 kr. fyrir fullorðna og 300 kr. fyrir 6-16 ára. Ekki er ætlast til að nemendur mæti í búningum í skólann en gefinn verður tími í lok skóladags til að gera sig klára fyrir skemmtunina. Foreldrafélag Reykhólaskóla vill minna á að vopn (!) eru ekki leyfð á skemmtuninni.
...
Þórir Bergmundsson háls-, nef og eyrnalæknir verður með móttöku á heilsugæslustöðinni í Búðardal mánudaginn 27. febrúar. Guðrún J. Guðmundsdóttir augnlæknir verður með móttöku fimmtudaginn 1. mars. Tímapantanir hjá báðum í síma 432 1450. Erling Valdimarsson tannlæknir er með móttöku á heilsugæslustöðinni í Búðardal á fimmtudögum og föstudögum. Tímapantanir í síma 434 1445 / gsm 695 7742. Erling er einnig með stofu á Hólmavík, sími 432 1403.
...
Fjórðungssamband Vestfirðinga lýsir ánægju með þær yfirlýsingar ráðamanna að ástand samgöngumála í fjórðungnum kalli á verulegar úrbætur umfram aðra landshluta. Vestfirðir eru nú eini landshlutinn sem ekki hefur fengið nútímalegar vegabætur á milli helstu þéttbýlisstaða eða til að tengja öll byggðarlög aðalþjóðvegakerfi landsins. Ný samgönguáætlun, sem ástæða er til að fagna að loks hafi verið lögð fram, verður að taka mið af þessari staðreynd, ef stjórnvöld vilja uppfylla markmið um greiðar samgöngur og jafnræði þegna landsins. Með því að verkefnin á Vestfjörðum verði sett í forgang í samgönguáætlun má best tryggja að orðum um forgang Vestfjarða í samgöngumálum fylgi efndir.
...
Verðlaunaritgerðir þeirra Elínborgar Egilsdóttur og Fanneyjar Sifjar Torfadóttur, nemenda í Reykhólaskóla, eru komnar hér inn á vefinn. Eins og fram kom deildu þær efsta sæti í samkeppni Landsbyggðarvina í Reykjavík og nágrenni um hugmyndir til góðs fyrir heimabyggðina. Elínborg lagði fram hugmyndir um ylströnd við Þörungaverksmiðjuna en Fanney Sif um ferðaþjónustu í héraðinu allan ársins hring.
...
