Eins og væntanlega flestir hér vita elti Gísli Einarsson fréttamaður RÚV Eyva í Hólakaupum í bolluflutningnum sunnan úr Borgarnesi og vestur á Reykhóla. Hér er tengill á myndskeiðið í fréttum Sjónvarps í kvöld (byrjar a.m.k. eins og nú standa sakir á sjö sekúndna niðurlagi fréttar um selveiði).

Ólína Kristín Jónsdóttir frá Mýrartungu í Reykhólasveit.

„Þetta er tilvalið tækifæri að hitta gamla sýslunga og rifja upp gömul kynni jafnt sem ný“, segir Ólína Kristín Jónsdóttir, ritari Barðstrendingafélagsins í Reykjavík, um fagnað sem félagið heldur í Breiðfirðingabúð við Faxafen 10. mars. Þarna er um að ræða skemmtun og bingó og síðan ball með Láru og gullfiskunum. „Við höfum haldið bingó síðustu ár, sem hefur vakið mikla lukku. Við höfum getað boðið upp á veglega vinninga þar sem mörg fyrirtæki, ekki síst þau sem tengjast Barðastrandarsýslum, hafa af rausnarskap gefið okkur vinninga“, segir Ólína.

Frá aðalfundinum fyrir þremur árum.

Aðalfundur Ungmennafélagsins Aftureldingar í Reykhólahreppi verður haldinn í matsal Reykhólaskóla kl. 20 annað kvöld, þriðjudag. Venjuleg aðalfundarstörf. Félagar eru eindregið hvattir til að sitja fundinn og nýtt fólk velkomið. Stjórn Aftureldingar skipa Guðrún Guðmundsdóttir formaður, Herdís Erna Matthíasdóttir gjaldkeri og Kolfinna Ýr Ingólfsdóttir ritari.

« 1 af 11 »

Fyrir jól var bætt við auglýsingaplássi ofan við efstu frétt hér á vefnum. Þetta pláss er til afnota fyrir fólk, félög og fyrirtæki í Reykhólahreppi - án endurgjalds. Jafnframt eru auglýsingaborðar útbúnir ef þess er óskað, líka án endurgjalds. Undir borðunum er hægt að tengja í hvaðeina sem birtist þegar á þá er smellt, hvort heldur það eru fréttir hér á vefnum sem hafa frekari upplýsingar að geyma, efni á öðrum vefjum, skjöl sem vistuð eru hér á vefnum en birtast ekki að öðru leyti, myndskeið o.s.frv.

Kátt Skruggufólk í Bjarkalundi.

Opinn framhaldsfundur (umræðufundur) hjá Leikfélaginu Skruggu verður haldinn í anddyri íþróttahússins á Reykhólum kl. 20 annað kvöld, mánudagskvöld. Þar verða kynntar hugmyndir að áhugaverðum verkefnum fram til vorsins. Sautján manns komu á fundinn fyrir viku og kom sá fjöldi þægilega á óvart. Gulla í Árbæ og Hanna hans Gylfa (mjööög óformlegt orðalag) sáu um kaffi og úrvals meðlæti. Sólveig Sigríður Magnúsdóttir (Solla Magg), formaður Skruggu, segir að núna verði líka „eitthvað“ með kaffinu. Allir sem vilja kynna sér starfið eru velkomnir, alveg sama hvort þeir hyggjast taka þátt í því eða ekki. Hugmyndir að verkefnum eru vel þegnar. Minnt er á, að hin og þessi störf eru kringum leiksýningu önnur en að koma fram á sviði.

Að lokinni árlegri lundaveiðiferð Aðalsteins Valdimarssonar á Reykhólum út í Breiðafjarðareyjar.

„Að okkar mati er friðun þessara fuglategunda á öllu landinu allt of harkaleg aðgerð, einkum þegar horft er til þess hversu takmarkaðar rannsóknir liggja að baki tillögunni,“ segir í bréfi Drangeyjarfélagsins í Skagafirði til þingmanna. Tillögum starfshóps umhverfisráðuneytisins um algera friðun fimm svartfuglastofna er mótmælt harðlega.

Smellið á kortið til að stækka.

Vegagerðin auglýsti núna í vikunni útboð á nýlögn og endurlögn Vestfjarðavegar milli Eiðis í Vattarfirði og Þverár í Kjálkafirði. Um er að ræða tæplega 16 km langan veg auk brúa yfir mynni Mjóafjarðar inn af Kerlingarfirði og yfir Kjálkafjörð sem er á vesturmörkum Reykhólahrepps. Langmestur hluti hins nýja vegar verður innan Reykhólahrepps. Vegna þverunar fjarðanna styttist leiðin um átta kílómetra. Ætlunin er að verkinu verði að fullu lokið haustið 2015.

Grunnur af vef Landmælinga Íslands.

Samkvæmt tölum Hagstofu Íslands hefur fólki í Reykhólahreppi fækkað um 64 síðustu fjórtán árin, úr 335 í 271 eða um 19,1%. Á sama tíma hefur fólki á Reykhólum fækkað um 15 manns, úr 136 í 121 eða um 11%. Á þessum tíma hefur fólki á Vestfjarðakjálkanum fækkað um 1.601, úr 8.556 í 6.955 eða um 18,7%. Enda þótt fækkunin frá upphafi til loka þessa tíma sé hlutfallslega nánast hin sama í Reykhólahreppi og á Vestfjarðakjálkanum í heild er munurinn sá, að hún hefur verið nokkuð örugg og jöfn ár frá ári á Vestfjarðakjálkanum (nema 2008-2009) en ójöfn í Reykhólahreppi, þar sem naumast er um fækkun að ræða síðasta áratuginn tæpan. Í þorpinu á Reykhólum voru núna í ársbyrjun jafnmargir íbúar og árin 2000, 2001 og 2004 og fyrir einu ári voru þeir jafnmargir og árið 1999. Sjá töflurnar hér fyrir neðan.

Grettir í Reykhólahöfn. Sjá nánar í meginmáli. Ljósm. Þórarinn Ólafsson.

Þörungaverksmiðjan hf. á Reykhólum er annað árið í röð meðal þeirra fyrirtækja sem uppfylla skilyrði Creditinfo til að fá viðurkenningu sem „framúrskarandi fyrirtæki“. Af rúmlega 32.000 fyrirtækjum sem skráð eru í hlutafélagaskrá reyndust 245 eða langt innan við eitt prósent uppfylla skilyrðin. „Vottun af þessu tagi þekkist víða erlendis en á stærri mörkuðum er algengara að skilyrði vottunar séu ekki eins ströng og ákveðið var að setja hér á landi“, segir á vef Creditinfo.

Kristín Sigurrós Einarsdóttir, verkefnastjóri Fræðslumiðstöðvar Vestfjarða á Hólmavík, vekur athygli á námskeiðum frá Endurmenntun Háskóla Íslands, sem fáanleg verða á fjarfundum á Hólmavík og Reykhólum ef næg þátttaka verður. Yfirleitt er gerð krafa um þrjá til fjóra á hverjum stað. Skráningarfrestur á þessi námskeið rennur út tíu dögum áður en þau hefjast, sem er óvenjulangur fyrirvari. Nánari upplýsingar fást með því að smella á tenglana neðan við hvert námskeið.