Mynd: bbl.is.

Tafla: Morgunblaðið.

« 1 af 2 »

Heldur færri lömbum var slátrað í haust en á árinu 2014 og meðalvigt var aðeins minni. Það veldur því að kindakjötsframleiðslan verður um 110 tonnum minni en í fyrra. Upplýsingar kjötmats Matvælastofnunar um sauðfjárslátrun í ágúst til október 2015 sýna að 531.481 lambi var slátrað á þessu tímabili. Er það liðlega fimm þúsund lömbum færra en á sama tímabili í fyrra. Jafnframt kemur fram að út úr slátruninni hefur komið liðlega 150 tonnum minna af kjöti en árið áður.

Samninganefnd bænda er þessa dagana að fara yfir athugasemdir sem fram hafa komið við drög að nýjum búvörusamningi. Sérstaklega er verið að athuga hvort hægt sé að bregðast við ótta sumra bænda við að afnám kvótakerfis leiði til offramleiðslu og verðfalls, sérstaklega í mjólkurframleiðslunni.

Vegna veðurs og færðar frestast sorphirða í Reykhólahreppi, sem að öllu venjulegu átti að vera í dag, fram á fimmtudag, 3. desember.

Frjáls eins og fuglinn ...

... og með magnað útsýni.

« 1 af 2 »

Á vefnum heilsutorg.is birtist fyrir nokkrum dögum ítarlegt og skemmtilegt viðtal við Ágústu Ýri Sveinsdóttur frá Skálanesi í Reykhólahreppi undir fyrirsögninni Ágústa Ýr stundar svifvængjaflug af fullum krafti og hér segir hún okkur frá sportinu. Í viðtalinu er hún reyndar spurð út í sitthvað fleira en sportið. Fram kemur m.a. að núna er hún í námi til BA-prófs í fjölmiðlafræði við Háskólann á Akureyri ásamt því að vinna sem rafvirki. Svifvængjaflugið er hennar helsta áhugamál, en því fylgir ferðabaktería og mikill áhugi á mismunandi menningu og siðum. Líka kveðst hún elska að prjóna og lesa góðar bækur, helst með heitan tebolla.

Spáð er mjög slæmu veðri í nótt og fyrri hluta dags á morgun. Hér hægra megin á síðunni eru komnir þrír nýir tenglar á upplýsingar um veður og færð. Undir þeim efsta birtist kort Vegagerðarinnar um færð á vegum og veður á ýmsum stöðum við þjóðvegi. Undir næsta tengli er kort Veðurstofunnar um veður við Breiðafjörð ásamt upplýsingum frá veðurstöðinni á Reykhólum. Þriðji nýi tengillinn er á myndavélar Vegagerðarinnar sem eru víða við þjóðvegi, t.d. á Svínadal, tveimur stöðum á Þröskuldaleið og á Hjallahálsi, Ódrjúgshálsi og Klettshálsi.

Jólaglögg og laufabrauð verður í boði fyrir (h)eldri borgara héraðsins í Barmahlíð á Reykhólum klukkan hálfátta annað kvöld, mánudag. Jóhanna Ösp Einarsdóttir í Kaplaskjóli í Fremri-Gufudal kemur með gítarinn og leikur nokkur vel valin jólalög. Allir (h)eldri borgarar velkomnir!

Sr. Jóhanna I. Sigmarsdóttir, sóknarprestur í Reykhólaprestakalli, verður með aðventukvöld, helgistundir og sunnudagaskóla á ýmsum stöðum í prestakalli sínu á aðventunni, eins og hér segir:

Viðhorfskönnun sem Mjólkursamsalan hefur gert meðal bænda bendir til að mjólkurframleiðsla gæti aukist um 20 milljónir lítra á næstu árum. Framleiðslan er nú nokkuð umfram það sem þörf er á innanlands. Forstjóri MS telur mikilvægt að halda framleiðslunni í betra jafnvægi við innlenda eftirspurn en nú virðist stefna í.

Borkó frá Bæ í Árneshreppi á Ströndum (Hrútaskráin 2015-16).

„Það er ljóst að við erum búin að ná ótrúlegum framförum með íslensku sauðkindina í gegnum ræktunarstarfið. Árangurinn er samanburðarhæfur við bestu kjötkyn annars staðar í heiminum, til dæmis hvað varðar þykkt bakvöðva,“ segir Eyþór Einarsson, ábyrgðarmaður í sauðfjárrækt hjá Ráðgjafarmiðstöð landbúnaðarins. Við uppgjör sláturtíðar og útgáfu Hrútaskrár fara ráðunautar yfir stöðu ræktunarstarfsins með bændum á Hrútafundum.

Heilbrigðisráðherra hefur skipað starfshóp sem móta á stefnu og aðgerðaáætlun til að efla fjarheilbrigðisþjónustu. Markmiðið er að auka getuna til þess að bjóða landsmönnum, óháð búsetu, fjölbreytta, skilvirka og örugga heilbrigðisþjónustu. Hópurinn er skipaður í samræmi við ályktun þess efnis sem samþykkt var á Alþingi í sumar.