Reykhólakirkja / hþm.

Eins og hér kom fram var sr. Elína Hrund Kristjánsdóttir á Reykhólum fyrir nokkru skipuð í embætti sóknarprests í Oddaprestakalli syðra frá 1. október. Í stað hennar hefur sr. Jóhanna Sigmarsdóttir verið sett til að sinna þjónustu í Reykhólaprestakalli fram að áramótum. Hún var áður sóknarprestur og prófastur á Eiðum á Fljótsdalshéraði. Ekki liggur fyrir hvenær Reykhólaprestakall verður auglýst laust til umsóknar.

Starfsemi vinnustofu í útskurði í tré er að fara í gang á Reykhólum á vegum Félagsþjónustunnar. Rebekka Eiríksdóttir á Stað mun sjá um vinnustofuna, sem verður í smíðastofu Reykhólaskóla á fimmtudögum milli klukkan 16 og 18.30. Í fyrstu verður Rebekka með efni og útskurðarhnífa en síðan getur fólk keypt verkfæri að eigin vali. Eldri borgarar ganga fyrir en annars eru allir velkomnir.

Heilsugæslustöðin við Hellisbraut.

Hjúkrunarfræðingur býður upp á inflúensubólusetningu á heilsugæslustöðinni á Reykhólum kl. 13-15 á morgun, fimmtudag. Tímapantanir í síma 432 1450. Sjá nánar hér:

Ásta Roth með nokkrum nemendum sínum. Ljósm. Vísir/GVA.

Greint er frá grunnskólanum Reykjavík International School og rætt við skólastjórann Ástu Roth á fréttavefnum visir.is í dag. Því er þessa sérstaklega getið hér, að Ásta er dóttir Guðnýjar Jónsdóttur á Reykhólum (frá Skálanesi) og Aðalsteins Valdimarssonar (Steina Vald), sem síðasta hluta ævinnar var búsettur á Reykhólum og sinnti þar hugðarefni sínu, varðveislu og viðhaldi og endursmíði breiðfirskra súðbyrðinga. Í Reykjavík International School læra nemendur samkvæmt alþjóðlegri námskrá. Ásta skólastjóri segir eftirspurn eftir alþjóðlegu námi aukast ár frá ári. Fram til 2012 hafi allir grunnskólar hérlendis þurft að vinna námskrá sína samkvæmt aðalnámskrá.

Torfi og Reynir Þór fyrir búðardyrum.

Hér má glögglega sjá nýja litinn ...

... og hérna gamla litinn.

« 1 af 3 »

Verslunin Hólabúð á Reykhólum er að taka stakkaskiptum þessa dagana. Torfi Sigurjónsson á Reykhólum er að mála húsið og var áður búinn að háþrýstiþvo viðinn undir málningu. Þrátt fyrir rigninguna í dag hélt hann sínu striki, málaði einfaldlega suðurgaflinn í skjóli fyrir norðaustanáttinni. Á fyrri myndunum tveimur má sjá nýja litinn, þarna eru líka þeir Torfi og Reynir Þór Róbertsson kaupmaður. Þriðja myndin af húsinu var tekin fyrir fáum árum þegar búðin bar nafnið Hólakaup og birt hér til samanburðar.

Ráðstefna með yfirskriftinni Skólaþing – hvernig komum við skólunum á Vestfjörðum í fremstu röð? verður haldin í Félagsheimilinu á Patreksfirði á fimmtudag, 1. október. Þar verða flutt erindi um ýmis málefni og síðan verða pallborðsumræður. Þingið er öllum opið.

Arnar, Dalli, Gunnbjörn og Hjalli.

Gunnbjörn Óli, Unnsteinn Hjálmar og Fergusoninn meira en hálfsjötugi.

« 1 af 2 »

Gunnbjörn Óli Jóhannsson verktaki frá Kinnarstöðum í Reykhólasveit (Kolur ehf. í Búðardal) fór núna fyrir helgina með tæki sín frá Reykhólum að loknum ýmsum verkum kringum Reykhólaskóla í sumar og haust, sem hér verður innan tíðar greint frá í máli og myndum. Með í för á flutningavagninum var dráttarvél sem var að fara í skemmuna á Kinnarstöðum til vetursetu eftir sumardvöl í dráttarvélahópnum mikla á Grund og þátttöku í Reykhóladögum. Unnsteinn Hjálmar Ólafsson (Hjalli á Grund) kom akandi á henni ofan frá Grund og beint upp á vagninn þar sem myndirnar voru teknar.

« 1 af 2 »

Fyrsta opna hús vetrarins hjá Handverksfélaginu Össu (stofnað 1994) verður í Vogalandi í Króksfjarðarnesi á miðvikudaginn, 30. september kl. 20, og síðan á hverju miðvikudagskvöldi fram í desember. Allir eru hjartanlega velkomnir að vera með. Ekki þarf að ganga í félagið til að mega koma, sýna sig og sjá aðra, eins og stundum er sagt. Það sem fengist er við er prjón, hekl, saumur, kortagerð og spil eða þá bara spjall og margt fleira.

Frá prjónakaffi haustið 2013 / bf.is.

Haust- og vetrarstarf Breiðfirðingafélagsins er óðum að komast í gang. Bridgekvöldin byrjuðu um síðustu helgi, félagsvistin hefst á morgun, sunnudag, og prjónakaffið lifnar af sumardvalanum á mánudagskvöld. Allt fer þetta og margt annað fram í Breiðfirðingabúð, félagsheimilinu við Faxafen í Reykjavík.

Dæmi eru um mikla samþjöppun í mjólkurframleiðslu og í raun eru orðin til verksmiðjubú, t.d. í Flatey á Mýrum þar sem einkahlutafélagið Selbakki í eigu útgerðarfélagsins Skinneyjar-Þinganess á Höfn er að reisa stærsta fjós landsins með rými fyrir 300 kýr. Ætlunin er að tvöfalda mjólkurframleiðsluna úr 1 millj. lítra í 2 millj. lítra á ári. Ég spyr: Er eðlilegt að útgerðarrisar og fjárfestar komi með mikið fjármagn inn í mjólkurframleiðsluna og fái síðan beingreiðslur til jafns við aðra? Er réttlætanlegt að ríkisstuðningur renni til eins stærsta útgerðarfélags landsins? Varla getur það fallið undir eitt af markmiðum búvörusamningsins.