Steinunn Lilja, Ásdís Birta og Védís Fríða: Sigruðu í skólanum sínum, urðu í þriðja sæti í keppninni hjá Húsaskjóli.

Húsið sem hér um ræðir.

Frétt í Kópavogsblaðinu.

« 1 af 3 »

Vinkonurnar Ásdís Birta, Védís Fríða og Steinunn Lilja í Reykhólaskóla urðu í þriðja sæti í piparkökuhúsakeppni Húsaskjóls í Kópavogi, eins og fram kemur fram á vef skólans. Nemendur bökuðu margvísleg hús fyrir fullveldishátíð Reykhólaskóla í byrjun mánaðarins og sigruðu þær stöllur í keppninni innan skólans. Í keppninni hjá Húsaskjóli var kosið um innsend hús á Facebook en síðan var bakarameistari fenginn til að ráða úrslitum. Í verðlaun fengu stelpurnar gjafabréf í Smáralind.

Hús HVE á Reykhólum. Búið að læsa hjúkrunarfræðinginn í Barmahlíð úti.

„Sögurnar af Ingibjörgu eru margar, og því ótrúlegri sem þær eru, þeim mun líklegri eru þær að vera sannar,“ segir Sigurbjörn Sveinsson læknir. Þar talar hann um Ingibjörgu Kristjánsdóttur hjúkrunarfræðing í Garpsdal við Gilsfjörð. Hann segir hana hugaða og mikinn ferðamann, „sem komst yfirleitt allt sem hún ætlaði sér, hvort sem hún var á Bens eða jeppa. Og aldrei var Hafliði langt undan, úrræðagóður og rólegur með sína hjálpandi hönd.“

Minnt skal á tvo viðburði á Reykhólum á morgun, Þorláksmessu. Annars vegar skötumessu Lions um og eftir hádegið og hins vegar kaffihúsið á Báta- og hlunnindasýningunni um kvöldið. Skötuveislan árvissa verður í borðsal Reykhólaskóla milli kl. 12 og 14. Saltfiskur í boði fyrir þá sem treysta sér ekki í sjálft lostætið. Allir eru velkomnir, alveg sama þó að þeir tengist Lions ekki neitt. Á kaffihúsinu verður fagnaður frá kl. 18 til 21 og jafnframt hægt að kaupa jólalegt góðgæti og síðustu gjafirnar.

Reykhólakirkja / hþm.

Sr. Elína Hrund Kristjánsdóttir sóknarprestur á Reykhólum verður með guðsþjónustur víða í prestakalli sínu um jólin, allt vestan frá Gufudal og suður á Skarð á Skarðsströnd. Organisti er Viðar Guðmundsson og félagar í kór Reykhólaprestakalls syngja. Dagskráin um jólin er á þessa leið:

Skrifstofa Reykhólahrepps verður lokuð frá Þorláksmessu og fram til 5. janúar vegna vinnu við launaútreikninga, eins og hér hefur komið fram. Hún verður opin á venjulegum tíma (kl. 10-14) á morgun, Þorláksmessu, en síðan ekki fyrr en mánudaginn 5. janúar.

Heilsugæslustöðin á Reykhólum.

Heilsugæslustöðin á Reykhólum verður lokuð mánudaginn 29. desember, samkvæmt tilkynningu frá Heilbrigðisstofnun Vesturlands (HVE), Búðardal og Reykhólum. Hún er hins vegar opin í dag, 22. desember, eins og venjulega á mánudögum.

21. desember 2008 kl. 13.13 / hþm.

Vetrarsólstöður (vetrarsólhvörf) ber að þessu sinni upp á daginn í dag, 21. desember, eins og algengt er, en þær geta þó verið dagana fyrir og eftir þessa dagsetningu. Þá er sólin lægst á lofti og sólargangur stystur, en strax á morgun fer daginn að lengja um hænufet. Rétt hádegi hér á landi, þegar sólin er í hásuðri og hæst á lofti, er milli klukkan eitt og tvö „eftir hádegi“, þ.e. eftir hádegið á klukkunni, sem stemmir alls ekki við rétt hádegi. Hér sem annars staðar byrjar rétt hádegi austast á landinu og færist svo vestur um eftir snúningi jarðar.

Á það skal minnt, að afgreiðsla Landsbankans á Reykhólum verður opin á morgun, mánudag, í stað venjubundins afgreiðsludags á miðvikudag, sem er aðfangadagur. Afgreiðsla bankans á Reykhólum er í Barmahlíð kl. 11.30-12 og húsnæði Reykhólahrepps við Maríutröð kl. 13-16.

Eins og endranær verða tilfærslur og breytingar á þjónustu af ýmsu tagi um jólin og áramótin. Hér fyrir neðan er samantekt um það sem tilkynnt hefur verið um og birt hér á vefnum að undanförnu. Bætt verður við þessar upplýsingar og þær uppfærðar jafnharðan þegar umsjónarmanni vefjarins kann að verða tilkynnt um slíkt. Ef til þess kemur, þá sendið póst í netfangið vefstjori@reykholar.is eða hringið í síma 892 2240 (Hlynur Þór Magnússon).

Jóladagatalið á sviði á sínum tíma. Skjáskot af YouTube.

Núna á aðventunni kemur á netið í leiklesinni útgáfu einn þáttur á dag úr Jóladagatalinu, leikriti sem félagar í Leikfélagi Hólmavíkur flytja. Þættirnir eru þrettán rétt eins og jólasveinarnir og birtist sá síðasti á aðfangadag eins og hann Kertasníkir. Leikritið sömdu fimm manns í leikfélaginu árið 1989 eða fyrir aldarfjórðungi. Það hefur tvisvar verið sýnt á Hólmavík, 1989 og 2000, og líka hafa leikfélög og skólahópar annars staðar á landinu tekið það til sýningar.