Björk Stefánsdóttir á Reykhólum er verulega ósátt vegna fýluferðar í Lyfju í Búðardal í dag og líka vegna þess að ekki skuli vera hægt að hafa algengustu og nauðsynlegustu lyf tiltæk á Heilsugæslustöðinni á Reykhólum. „Ég ætlaði í Lyfju, en nei, vegna manneklu er lokað þar eftir hádegi bæði í dag og á morgun. Mér finnst allt í lagi þar sem Lyfja í Búðardal á að þjónusta þetta svæði, að senda kannski eitt lítið dreifibréf eða henda upp auglýsingu í búðinni hérna eða koma þessu á Reykhólavefinn sem er einfaldast, þetta er „ekki nema“ 150 kílómetra keyrsla fram og til baka,“ segir hún.

Frá Kinnarstaðarétt / ÞÓ.

« 1 af 10 »

Réttað var á Kinnarstöðum í Reykhólasveit í dag í þurru og þægilegu veðri. Réttarstjóri var Jónas Samúelsson á Reykhólum. Þórarinn Ólafsson í Stekkjarlundi skrapp í réttirnar og tók fjölda svipmynda eins og stundum áður. Hér fylgja nokkur sýnishorn en hartnær hundrað myndir er að finna undir Ljósmyndir, myndasöfn - Myndasyrpur - Kinnarstaðarétt 2013 í valmyndinni hér vinstra megin.

Grettislaug / ÁG.

Á það skal minnt, að vegna réttanna verður Grettislaug á Reykhólum opin frá klukkan tvö til fimm (kl. 14-17) í dag, sunnudag. Annars er hún opin kl. 13-16 á sunnudögum þegar vetrartími er í gildi.

Hið árlega smalapartí verður haldið í skemmunni í Fremri-Gufudal annað kvöld, laugardag, og hefst fagnaðurinn klukkan 21. Þar verða trúbador, færeysk söngkona og fullt af skemmtilegu fólki eins og venjulega við þetta tækifæri. „Við hlökkum til að sjá ykkur,“ segir Jóhanna Ösp Einarsdóttir í Fremri-Gufudal.

Frá markaðnum í Nesi / HK.

Opið verður hjá Handverksfélaginu Össu í Kaupfélagshúsinu í Króksfjarðarnesi kl. 13 til 18 á morgun, laugardag. Heitt á könnunni, nýbakaðar vöfflur í boði og markaðurinn opinn. Tilvalið tækifæri að sýna sig og sjá aðra. Þetta er í síðasta sinn á þessu sumri sem opið er hjá Össu í Nesi og verður ekki opnað á ný fyrr en þegar jólasalan verður.

María Játvarðardóttir.

María Játvarðardóttir hefur nú tekið við starfi félagsmálastjóra Stranda og Reykhólahrepps. Hún verður með viðveru og viðtalstíma í Stjórnsýsluhúsinu við Maríutröð á Reykhólum á mánudögum kl. 10-15 og skal vakin athygli á því, að þetta er ekki sami dagur vikunnar og verið hefur. Fyrsti viðtalstími Maríu á Reykhólum verður núna á mánudaginn. Æskilegt er að hringja í hana í síma 842 2511 og panta tíma til að komast hjá bið.

« 1 af 4 »

Tvær syrpur af myndum frá heimsókn Ólafs Ragnars Grímssonar í Reykhólahrepp í fyrradag eru komnar hér inn á vefinn. Annars vegar eru 69 myndir frá hátíðinni þegar forsetinn opnaði formlega saltvinnslu Norður & Co við Reykhólahöfn að miklum fjölda fólks viðstöddum og hins vegar 42 myndir frá Bjarkalundi. Þar hófst hin opinbera heimsókn með því að sveitarstjórn og sveitarstjóri tóku á móti forseta og fylgdarmönnum og snæddu með þeim hádegisverð.

Tónleikar verða haldnir í Reykhólaskóla í fyrsta kennslutímanum í fyrramálið, föstudag, klukkan hálfníu. Foreldrar eru velkomnir, en tónleikarnir eru á vegum stofnunar sem ber heitið Skólatónleikar á Íslandi - tónlist fyrir alla. Allt frá árinu 1995 hefur stofnunin staðið fyrir tónleikum í grunnskólum landsins þar sem skemmtun og menntun haldast í hendur. Leitast er við að bjóða upp á fjölbreytta tónlist í hæsta gæðaflokki í flutningi atvinnufólks.

Forsetinn klippir á borðann með aðstoð félaganna Garðars og Sørens.

Fjöldi fólks kom í saltvinnsluna ...

... til að samgleðjast frumkvöðlunum og hitta forsetann.

Ólafur Ragnar ásamt sveitarstjórn og sveitarstjóra fyrir dyrum Bjarkalundar.

Ingibjörg Birna sveitarstjóri, Ólafur Ragnar og Andrea oddviti sveitarstjórnar.

Í Bjarkalundi var margt girnilegt á hlaðborði.

Auðvitað var sungið fyrir forsetann þegar hann kom í Reykhólaskóla.

Dísa Sverrisdóttir, Ólafur Ragnar, Steinunn Rasmus og Anna Greta skólastjóri.

Forsetinn heilsaði upp á æsku héraðsins ...

... og strax á eftir heimsótti hann gamla fólkið.

Nóg var að spjalla og nóg með kaffinu í Barmahlíð.

Forsetinn og Örnólfur Thorsson forsetaritari (hægra megin) á Báta- og hlunnindasýningunni ásamt bátamönnunum Sigurði Bergsveinssyni og Eggert Björnssyni (skinnklæddum) og Ingibjörgu Birnu sveitarstjóra.

« 1 af 12 »

Heimsókn Ólafs Ragnars Grímssonar forseta Íslands í Reykhólahrepp í gær tókst með ágætum. Myndirnar sem hérna fylgja tók Jón Þór Kjartansson hvar sem forsetinn kom og birtast hér fyrst þær síðustu í röðinni – þrjár myndir frá opnunarhátíð saltvinnslunnar á Reykhólum, sem var ástæða þess að forsetinn kom í heimsókn í héraðið einmitt núna. Þar klippti Ólafur Ragnar á borða með aðstoð eigendanna og frumherjanna Garðars Stefánssonar og Sørens Rosenkilde að fjölda gesta viðstöddum og lýsti vinnsluna formlega tekna til starfa.

Eins og endranær verður Grettislaug á Reykhólum opin á öðrum tímum núna um réttarhelgina en endranær. Bæði á föstudag og laugardag verður hún opin kl. 19-22 en á sunnudag kl. 14-17.