Andrea og Egill í leikritinu Afi kemur í heimsókn. Nánar í meginmáli.

Aðalfundur Leikfélagsins Skruggu í Reykhólahreppi verður í matsal Reykhólaskóla annað kvöld, föstudagskvöld, og hefst kl. 19.30. Fram fer kosning formanns og stjórnar og rætt verður um verkefni félagsins í vetur. Allir sem vettlingi geta valdið eru hvattir til að koma á fundinn, sama hvort þeir eru félagsmenn eða ekki. „Nýir félagar eru hjartanlega velkomnir,“ segir Sólveig Sigríður Magnúsdóttir (Solla Magg), sem hefur gegnt formennsku í Skruggu frá endurreisn hennar.

Ljósm. Rebekka Eiríksdóttir.

« 1 af 4 »

Rebekka Eiríksdóttir á Stað í Reykhólasveit tók núna í morgun meðfylgjandi myndir af fugli sem hún telur að sé gráhegri og getur ekki talist algeng sjón hérlendis. Mynd nr. 1 er mjög stækkuð út úr mynd nr 2 (sem sjálf er stækkuð úr upphaflegu myndinni). Myndir nr. 3 og 4 eru líka mikið stækkaðar vegna fjarlægðarinnar og þess vegna ekki mjög skýrar.

UPPFÆRT Rjúpnaveiðitíminn þetta árið hefst á föstudag. Að þessu sinni verða veiðidagar alls tólf talsins, þrír í senn (föstudagur, laugardagur og sunnudagur) fjórar helgar í röð. Undanfarin ár hefur rjúpnaveiði og önnur skotveiði verið bönnuð á allmörgum jörðum í Reykhólahreppi eins og kynnt hefur verið hér á vefnum hverju sinni. Á síðasta ári var óskað eftir því að tilkynnt væri um bann við skotveiði á landareignum 16 jarða hér á Reykhólavefnum.

Eyvindur í Hólakaupum með saltið.

Í Hólakaupum á Reykhólum seldist í gær hundraðasti pakkinn af flögusaltinu nýja frá Norðursalti á Reykhólum. Saltið kom í Hólakaup 1. október eins og hér kom fram og var verslunin (af skiljanlegum ástæðum) fyrsta búðin til að fá það í sölu. „Fólk frá Patró, Hólmavík og Búðardal og að sunnan hefur komið og keypt allt upp í fimm pakka í einu til að gefa vinum og ættingjum, og eins útlendingar sem fannst alveg magnað að geta keypt þetta svona nánast beint úr sjónum,“ segir Eyvindur Magnússon kaupmaður.

Árlegur haustfagnaður Félags sauðfjárbænda í Dölum (FSD) verður komandi föstudag og laugardag, 25.-26. október, með fjölbreyttri sauðfjártengdri dagskrá að hætti heimamanna. Einstakir liðir verða á ýmsum stöðum en byrjað verður á lambhrútasýningu í Laxárdal um hádegi á föstudag. Sviðaveisla verður á Laugum í Sælingsdal á föstudagskvöld en á laugardag verður mikið umleikis í Reiðhöllinni í Búðardal. Fagnaðinum lýkur með grillveislu og stórdansleik. Nánar:

Samtök um söguferðaþjónustu efna til félagsfundar og opins málþings að Vogi á Fellsströnd í Dalabyggð á föstudag og laugardag. Formaður samtakanna, Rögnvaldur Guðmundsson, hvetur fólk sem áhuga hefur á sögutengdri ferðaþjónustu til koma um kl. ellefu á laugardag og sitja fyrst fund um þróunar- og nýsköpunartækifæri í söguferðaþjónustu í Dölum og við Breiðafjörð og síðan að loknum hádegisverði málþing um eflingu slíkrar ferðaþjónustu.

Stjórn Orkubús Vestfjarða hefur nú öðru sinni ákveðið að veita styrki til samfélagsverkefna á Vestfjörðum. Til ráðstöfunar eru að þessu sinni kr. 4.200.000. Umsóknir um styrkina þurfa að berast Orkubúi Vestfjarða fyrir 15. nóvember. Stefnt er að því að þeim verði úthlutað í desember.

Helgi Pálsson, sjúkraþjálfari hjá Sjúkraþjálfun Vestfjarða á Ísafirði, mun frá og með 22. október sinna sjúkraþjálfun tvisvar í viku við Heilbrigðisstofnun Vesturlands á Hólmavík. Hægt er að bóka tíma hjá Heilbrigðisstofnun Vesturlands á Hólmavík í síma 432 1400 á afgreiðslutíma heilsugæslu eða hjá Helga Pálssyni í síma 869 5145.

Þar sitja systur ...

« 1 af 3 »

Systurnar Unnur Halldórsdóttir á Kambi í Reykhólasveit og Guðrún Halldórsdóttir á Patreksfirði (Unna og Gunna) hittust í dag í Barmahlíð á Reykhólum þar sem Unnur dvelst og voru það fagnaðarfundir. Guðrún kom í heimsókn frá Patreksfirði þar sem þær eru fæddar og uppaldar og ekki þótti þeim systrum lakast þegar Hrefna Hugosdóttir smellti af þeim meðfylgjandi myndum.

Árleg bólusetning gegn inflúensu er að hefjast á Heilbrigðisstofnun Vesturlands í Búðardal og á Reykhólum. Sóttvarnalæknir mælir með inflúensubólusetningu fyrir neðantalda forgangshópa. Þeim stendur bóluefni til boða sér að kostnaðarlausu en greiða þarf komugjald á heilsugæslustöð.