Ólafur Ragnar Grímsson, forseti Íslands.

Dagskrá opinberrar heimsóknar Ólafs Ragnars Grímssonar forseta Íslands í Reykhólahreppi hefst kl. 13 í dag þegar sveitarstjórn og sveitarstjóri taka á móti honum í Bjarkalundi og snæða með honum hádegisverð þar á hótelinu. Síðdegis heimsækir forsetinn Reykhólaskóla, Hjúkrunar- og dvalarheimilið Barmahlíð og Báta- og hlunnindasýninguna á Reykhólum. Loks opnar hann formlega saltvinnslu Norður & Co við höfnina og situr þar veislu þangað sem fyrirtækið býður öllum íbúum Reykhólahrepps.

„Vestfirðingar ánægðir með lífsgæði sín“ er yfirskrift umræðna um stöðu og horfur á Vestfjörðum sem birtast í Morgunblaðinu í dag. „Aukið sjálfstraust einkennir viðhorf fólks á Vestfjörðum. Fólki finnst að það þurfi ekki lengur að réttlæta búsetu sína þar. Það er ánægt með lífsgæði sín og stolt af samfélaginu. Bölmóðurinn sem litaði umræður um málefni fjórðungsins um langt árabil og skapaði Vestfjörðum neikvæða ásýnd er horfinn. Þetta helst í hendur við uppgang í atvinnulífinu. Samgöngubætur undanfarin ár skipta ekki síður máli; þær hafa lagt grundvöll að nýjum tækifærum til eflingar byggðunum“, segir í inngangsorðum.

Sumarferð Breiðfirðingafélagsins var farin í Borgarfjörð um Jónsmessuleytið.

Ekki er ráð nema í tíma sé tekið: Nú þegar er hafinn undirbúningur vegna 75 ára afmælis Breiðfirðingafélagsins sem verður eftir rúma tvo mánuði, en félagið var stofnað 17. nóvember 1938. Þetta kemur fram í Fréttabréfi Breiðfirðingafélagsins, 5. tölublaði þessa árs, sem var að koma út. Greint er frá því, að á fundi átthagafélaganna sem stóðu að spurningakeppninni á liðnum vetri hafi verið ákveðið að halda hana á ný núna í vetur og verður hún í Breiðfirðingabúð eins og áður.

Norður & Co býður öllum íbúum Reykhólahrepps í opnunarhóf eða risgjöld saltvinnslunnar við Reykhólahöfn þriðjudaginn 17. september kl. 17. Efnt verður til matarveislu þar sem gestum býðst að bragða á fjölbreyttum réttum ásamt Norður salti, fyrstu afurð fyrirtækisins. Forseti Íslands, Ólafur Ragnar Grímsson, mun heiðra samkomuna og opna vinnsluna formlega. Þá taka við svolítil ræðuhöld og síðan verður almenn skemmtidagskrá.

Bókasafnsdagurinn 2013 er í dag, mánudaginn 9. september, og skal minnt á, að Héraðsbókasafn Reykhólahrepps, sem er til húsa í Reykhólaskóla, er opið í dag klukkan 16-18. Þangað eru nú komnar um fimm hundruð nýjar bækur, þar af hátt í hundrað barna- og unglingabækur. Þessi viðbót er uppskera Kópavogsferðar Hörpu Eiríksdóttur bókavarðar, sem hér var greint frá.

Myndir: Þórarinn Ólafsson.

« 1 af 10 »

Ingvar Samúelsson frá Höllustöðum í Reykhólasveit varð sextugur fyrir nokkru. Eins og hér kom fram efndi hann af þessu tilefni til samveru eða pöbbakvölds í Bjarkalundi í gærkvöldi og þrátt fyrir arfavonda veðurspá komu eithvað um fimmtíu manns til að samgleðjast honum. Fagnaðurinn heppnaðist afar vel. Myndirnar sem Þórarinn Ólafsson tók fyrir Reykhólavefinn tala sínu máli í þeim efnum.

Reykhólakirkja snemma að morgni páskadags árið 2011. Ljósm. hþm.

Kirkjan í smíðum í júlí 1959. Myndir nr. 2-7 eru úr skjalasafni Húsameistara ríkisins á Þjóðskjalasafni Íslands.

Kirkjurnar tvær á Reykhólum í júlí 1959.

Kirkjan í smíðum í júlí 1959.

Inni í kirkjubyggingunni sumarið 1961.

Inni í kirkjubyggingunni sumarið 1961.

Enn á smíðastigi árið 1962.

Reykhólakirkja snemma að morgni páskadags árið 2011. Ljósm. hþm.

« 1 af 8 »

Messan í tilefni af 50 ára vígsluafmæli Reykhólakirkju hefst kl. 14 á morgun, afmælisdaginn 8. september. Sr. Agnes M. Sigurðardóttir biskup Íslands prédikar og þjónar fyrir altari ásamt sr. Elínu Hrund Kristjánsdóttur sóknarpresti. Kirkjukór Reykhólaprestakalls leiðir söng undir stjórn Viðars Guðmundssonar organista, Hildur Heimisdóttir leikur á selló, Michael Roger Wågsjö leikur á trompet og Hrefna Jónsdóttir spilar og syngur ljúfa sálma. Að messu lokinni verður kirkju- og afmæliskaffi í borðsal Reykhólaskóla.

« 1 af 5 »

Ungmennasamband Dalamanna og Norður-Breiðfirðinga (UDN) gerði upp sumarið á lokahófi í Reykhólaskóla í gærkvöldi. Veittar voru viðurkenningar fyrir góða mætingu á æfingar og mót, fyrir árangur í sumar og fyrir mestar framfarir milli ára. Allir fengu plagg með árangrinum í hinum ýmsu greinum og samanburði við síðasta ár.

Laust er starf bókavarðar við Héraðsbókasafn Reykhólahrepps á Reykhólum. Starfið felst í umsjón með safninu og þeirri þjónustu sem slíku fylgir. Á dagskrá er að skrá safnið og nútímavæða það. Um er að ræða 10% hlutastarf, tvo tíma í senn tvö kvöld í viku og kl. 11-13 einn laugardag í mánuði. Starfið er laust frá 15. september. Skilyrði er að hafa náð 20 ára aldri.

Ingvar Samúelsson.

Minnt skal á samverustundina (pöbbakvöldið) sem Ingvar Samúelsson efnir til í Bjarkalundi annað kvöld, laugardagskvöldið 7-9-13, í tilefni þess að hann er orðinn sextugur. Húsið verður opnað klukkan níu (fyrsti kúturinn frír) en síðan sér Ólafur Bragi Halldórsson frá Gilsfjarðarmúla um tónlistina frá klukkan tíu og fram til eitt.