Kirkjurnar tvær á Reykhólum árið 1959. Sjá nánar í meginmáli.

Sr. Agnes M. Sigurðardóttir biskup Íslands predikar og þjónar fyrir altari ásamt sr. Elínu Hrund Kristjánsdóttur sóknarpresti við hátíðarguðsþjónustu á Reykhólum á sunnudaginn eftir viku, 8. september, þegar minnst verður hálfrar aldar vígsluafmælis Reykhólakirkju. Kirkjan er helguð minningu Þóru Einarsdóttur í Skógum við Þorskafjörð, móður þjóðskáldsins sr. Matthíasar Jochumssonar.

Auglýsingin í atvinnukálfi Fréttablaðsins í dag.

Í atvinnuauglýsingakálfi Fréttablaðsins í dag auglýsir Reykhólahreppur laus störf í mötuneyti hreppsins (sameiginlegu mötuneyti Reykhólaskóla og Barmahlíðar). Ekkert atvinnuleysi er skráð í sveitarfélaginu og verður það að teljast gleðilegt en á móti kemur að afar illa gengur að fá fólk. Á undanförnum misserum hefur margoft verið auglýst eftir fólki til hinna og þessara starfa á Reykhólum en viðbrögð hafa yfirleitt verið sáralítil og í héraðinu hafa þau verið nánast engin.

Einar Sveinn Ólafsson.

Einar Sveinn Ólafsson framkvæmdastjóri Þörungaverksmiðjunnar hf. á Reykhólum hefur verið ráðinn framkvæmdastjóri Íslenska kalkþörungafélagsins ehf. á Bíldudal frá 1. nóvember. Einar Sveinn hóf störf hjá Þörungaverksmiðjunni haustið 2011 og segir hann að tíminn á Reykhólum hafi verið mjög góður og verkefnin skemmtileg. Ekki hefur verið gengið frá ráðningu í starf framkvæmdastjóra verksmiðjunnar á Reykhólum en stjórn félagsins mun fara yfir þau mál á næstu vikum.

Halldór Jóhannesson.

Halldór Jóhannesson skipstjóri biður vefinn að koma því á framfæri að hann vill selja íbúðargám sem núna er á Hyrningsstöðum í Reykhólasveit en flytja má hvert á land sem er. „Þetta er 20 feta gámur, innréttaður og mjög vel einangraður. Í honum eru tvö svefnherbergi og snyrting með salerni, vaski og sturtu.“

„Lokaverkefnið mitt í mastersnáminu í upplifunarfræðum var saltframleiðsla og þannig kviknaði áhuginn á að fara út í framleiðslu á íslensku salti,“ segir Garðar Stefánsson í viðtali í Fréttablaðinu í gær um saltvinnsluna sem risin er á Reykhólum. Þar kemur fram, að þeir félagarnir Søren Rosenkilde og Garðar kjósi að kalla verksmiðjuna Upplifunarfabrikkuna.

Kjaranefnd Landssambands eldri borgara (LEB) krefst þess að eldri borgarar njóti sömu kjara og samið verður um á almennum vinnumarkaði í viðræðum aðila vinnumarkaðarins sem eru framundan. Jafnframt hvetur nefndin ríkisstjórnina til að standa við gefin loforð um lagfæringu á kjörum eldri borgara og að þær skerðingar sem settar voru á árið 2009 verði allar dregnar til baka.

Þorskeldiskvíar. Ljósm. Matís.

Atvinnuþróunarfélag Vestfjarða (Atvest) í samvinnu við Fiskeldisklasa Vestfjarða efnir í byrjun október til tveggja daga ráðstefnu á Patreksfirði um tækifæri og ógnanir í fiskeldi við strendur Íslands. Fyrirlesarar verða margir, bæði innlendir og erlendir sérfræðingar. „Það er von okkar sem stöndum að þessari ráðstefnu að hún verði til að efla samstarf stjórnsýslu, rannsóknastofnana og fyrirtækja svo að þróun fiskeldis geti orðið farsæl hér eins og hjá nágrannaþjóðum okkar,“ segir Magnús Ólafs Hansson, verkefnastjóri á Patreksfirði.

Guðlaug á Tindum.

Guðlaug Guðmundsdóttir á Tindum í Geiradal varð áttræð í fyrradag, 27. ágúst. Hún dvelst um þessar mundir á Heilsustofnun NLFÍ í Hveragerði. Eiginmaður Guðlaugar var Grímur Arnórsson, bóndi á Tindum og oddviti Geiradalshrepps, síðar heiðursborgari Reykhólahrepps.

Hótel Bjarkalundur.

Hótel Bjarkalundur í Reykhólasveit óskar eftir starfsfólki fram eftir hausti eða í einn og hálfan til tvo mánuði. Um er að ræða almenna afgreiðslu og annað sem til fellur. Upplýsingar gefur Kolbrún Pálsdóttir hótelstýra í síma 894 1295 eða 434 7762.

Þórir Bergmundsson háls-, nef- og eyrnalæknir verður með móttöku á Heilsugæslustöðinni í Búðardal á föstudag, 30. ágúst. Tímapantanir í síma 432 1450.