Jói krafsar dún með klút fyrir vitum.

Ungir sem aldnir fylgjast með Jóa ríða net - riða net, eins og það heitir á gamalli og góðri breiðfirsku.

Guðmundur Snorrason tengdasonur Jóa kann þetta líka. Hvað ungur nemur, gamall temur, var eitt sinn sagt.

Ekki vantaði athyglina hjá afkomendum fólksins sem á sínum tíma bjó í Skáleyjum á Breiðafirði.

Séð yfir dvalarsvæðið vinsæla fyrir ættamót við Reykhólaskóla.

« 1 af 5 »

Enn eitt ættarmótið var haldið á Reykhólum núna um helgina enda eru Reykhólar einhver vinsælasti ættamótastaður landsins. Að þessu sinni var það Skáleyjafólk, afkomendur Sigurborgar Ólafsdóttur (f. 1904, d. 1984), og Gísla Einars Jóhannessonar (f. 1901, d. 1984) búenda í Skáleyjum á Breiðafirði sem komu saman á Reykhólum. Kristín dóttir þeirra hjóna, sem búsett er á Ísafirði, sagði að mannskapurinn á mótinu hefði ekki verið talinn en líklega væru þetta eitthvað kringum hundrað manns enda eru afkomendurnir orðnir margir.

Séð yfir Króksfjarðarnes og Gilsfjörð. Mynd: Árni Geirsson. Sjá Ljósmyndir > Ýmis myndasöfn í valmyndinni til vinstri.

Haldinn verður „sveitamarkaður“ í kaupfélaginu í Króksfjarðarnesi sunnudaginn 24. júlí kl. 13-18. Fólki sem áhuga hefur á að hafa sölubás á markaðnum er bent á að hafa samband við Hörpu á netfangið info@reykholar.is eða í síma 894 1011 fyrir 20 júlí. Allt mögulegt er hægt að hafa í sölu nema handverk þar sem þetta er á sama stað og handverksfélagið Assa er að selja handverk frá félagsmönnum sínum. Seldar verða vöfflur eins og vaninn er hjá Össu alla daga í sumar.

Félagsfundur í Leikfélaginu Skruggu í Reykhólahreppi verður haldinn mánudagskvöldið 11. júlí kl. 20 í matsal Reykhólaskóla. Félagar eru hvattir til að koma á fundinn.

Aðalsteinn Óskarsson, Gústaf Jökull Ólafsson, Magnús Valur Jóhannsson og Ögmundur Jónasson í Bjarkalundi. / jt.

Málin rædd í Teigsskógi. / jt.

« 1 af 2 »

Ögmundur Jónasson ráðherra samgöngumála tilkynnti á fundi í Bjarkalundi í Reykhólasveit í gær, að hann hefði ákveðið að skipa samráðshóp sem leggja skal fram sem fyrst tillögur um leiðarval fyrir hinn umdeilda framtíðarveg um Gufudalssveit og Múlasveit í Austur-Barðastrandarsýslu (Reykhólahreppi). Hópurinn samanstandi af fulltrúum frá Reykhólahreppi, Vesturbyggð, Tálknafjarðarhreppi, Fjórðungssambandi Vestfirðinga (FV), ráðuneyti samgöngumála, náttúruverndarsamtökum og Vegagerðinni. Hópnum verður ætlað að skoða hlutina upp á nýtt með opnum huga og skoða allar leiðir, jafnt þær sem þegar liggja á borðinu og aðrar, að sögn Ingibjargar Birnu Erlingsdóttur, sveitarstjóra Reykhólahrepps.

Tíu af ferðafélögunum tólf á brautarendanum á Reykhólum í kvöld.

„Stórflott að koma hér og geta tekið bensín og komist í sjoppu, alveg dúndurgott“, sagði Hálfdán Ingólfsson flugmaður sem ásamt félögum sínum kom aftur við á Reykhólum núna um kvöldmatarleytið á leið í Húsafell í Borgarfirði (sjá næstu frétt hér á undan). Hann lét líka mjög vel af flugbrautinni - alveg þrælgóð af malarbraut að vera, sagði hann. Fyrir tveimur árum var lagt nýtt slitlag á flugbrautina og var hún þó alls ekki slæm fyrir. Auk þess liggur hún nákvæmlega rétt við ríkjandi vindátt.

Sérkennileg biðröð eftir því að fá bensín í Hólakaupum á Reykhólum.

Hálfdán Ingólfsson og vélin heimasmíðaða við búðina á Reykhólum.

« 1 af 2 »

Níu fisvélar með tólf mönnum lentu á flugvellinum á Reykhólum síðdegis í gær. Þetta eru félagar í Fisfélagi Reykjavíkur í hinni árlegu stóru ferð sinni út um land. Bensín var tekið við verslunina Hólakaup enda ekki langt að fara því að búðin er innan við hundrað metra frá enda flugbrautarinnar. Ekki getur talist algengt að biðröð flugvéla sé við bensíntankinn á Reykhólum en það hefur þó gerst áður.

Hildur Jakobína Gísladóttir, félagsmálastjóri Stranda og Reykhólahrepps, verður í fríi frá 11. júlí til 2. ágúst. Símarnir hjá henni þangað til eru 451 3510 og 842 2511 en ekki verður hægt að ná í hana í síma í fríinu.

Póstkassi í Reykhólahreppi um vetur. Verra þegar rignir.

Íslandspóstur mun í sumar standa að átaki um rétta staðsetningu póstkassa í dreifbýli. Pósti er dreift til um 6.000 heimila í dreifbýlinu og fer dreifingin þannig fram að almennum bréfapósti er dreift í póstkassa en skráðum sendingum ekið heim til íbúa. Í tilkynningu frá Íslandspósti segir að dreifing pósts um dreifbýli landsins fari fram með landpóstum sem séu eins konar pósthús á hjólum. Árlega aki þeir um 3,5 milljónir kílómetra fimm daga vikunnar. Til að tryggja öryggi og áreiðanleika í póstafhendingu sé mikilvægt að póstkassar séu bæði rétt staðsettir og vel merktir með nafni íbúa og bæjarnafni. Þá sé mikilvægt að tæma póstkassa daglega.

Jón Einar Jónsson hefur lokið fyrri talningu sumarsins á æðarungum við Breiðafjörð á vegum Rannsóknaseturs Háskóla Íslands á Snæfellsnesi. Meðaltal unga á hverja kollu hefur ekki verið lægra síðan hann fór að fylgjast með fuglunum árið 2007 eða um 0,21 ungi á hverja kollu. Meðaltal síðustu ára var 1,67 ungi á hverja kollu. Hlutfallið núna er því aðeins áttundi hluti af meðaltali undanfarinna ára. Í ár sáust 987 kollur og 205 ungar en meðaltal síðustu ára var 882 kollur og 1.338 ungar. Svæðið sem Jón Einar skoðaði nær frá Vatnsfirði að Gilsfirði eða rúmlega allur Reykhólahreppur og frá Stykkishólmi að Hellissandi á Snæfellsnesi.

Frá Vestfjarðavegi nr. 60.

Ögmundur Jónasson innanríkisráðherra og þar með jafnframt samgönguráðherra er á þriggja daga ferð um Vestfirði, einkum til að kynna sér stöðu vegamála. Með í förinni eru Hreinn Haraldsson vegamálastjóri og fleiri. Einn helsti tilgangur ferðarinnar er að leita lausna á margra ára þrasi um nýtt vegstæði fyrir Vestfjarðaveg nr. 60 um Reykhólahrepp, en þar er Teigsskógur við Þorskafjörð í brennidepli. Á síðasta degi ferðarinnar á morgun verður komið á Reykhóla og rætt þar bæði við fulltrúa í stjórn Fjórðungssambands Vestfirðinga og sveitarstjórnarfólk í Reykhólahreppi.