Aðalfundur Vinafélags Barmahlíðar verður haldinn miðvikudaginn 27. júlí kl. 20 í föndursal á efri hæð Barmahlíðar, segir í fundarboði frá stjórn vinafélagsins. Á dagskrá verða venjuleg aðalfundarstörf og önnur mál. Heitt verður á könnunni.
...
Vegna sumarleyfa verður skrifstofa Reykhólahrepps lokuð síðustu vikuna í júlí (næstu viku). Byggingafulltrúinn og bankinn verða hins vegar á sínum stað og tíma. Eins og hér hefur áður komið fram er félagsmálastjórinn í fríi til 3. ágúst.
...
Hreppsnefnd Reykhólahrepps samþykkti á fundi sínum 9. júní 2011 að auglýsa tillögu að breytingu á Aðalskipulagi Reykhólahrepps 2006-2018, um er að ræða breytingar á Vestfjarðavegi nr. 60 frá Vattarfirði í Kjálkafjörð. Samkvæmt 31. gr. skipulagslaga nr. 123/2010 er hér með auglýst eftir athugasemdum við tillögu að breytingu á aðalskipulagi Reykhólahrepps. Skipulagsuppdrættir, greinargerð og umhverfisskýrsla liggja frammi á skrifstofu Reykhólahrepps og hjá Skipulagsstofnun, Laugavegi 166, Reykjavík, frá 11. júlí til 29. ágúst 2011. Ennfremur eru gögnin aðgengileg hér á heimasíðu sveitarfélagsins.
...
Það sem af er ári hefur heildarframleiðsla kúabúa landsins á mjólk legið allmikið undir framleiðslunni á síðasta ári, segir á vef Landssambands kúabænda. Þegar litið er til sölu síðustu 12 mánaða kemur fram að hún hefur verið að dragast saman á heildina litið. Einstakir vöruflokkar úr mjólk hafa þó verið með söluaukningu, svo sem ostar og duft. Þar á vefnum segir einnig að hverjum kúabónda megi vera ljóst, að takist ekki að auka söluna verulega á síðari hluta ársins stefni allt í það að skerða þurfi greiðslumark mjólkur.
...
Bryggjuhátíðin, bæjarhátíðin á Drangsnesi við Steingrímsfjörð, er haldin í dag sextánda árið í röð. „Ef þú hefur ekki prófað að fara á okkar árlegu Bryggjuhátið á krúttlegasta sjávarþorpi á Íslandi skaltu skella þér í djammgallann (eða sjógallann), kippa með þér ísköldum öllara og upplifa íslenskt sveitadjamm eins og gerist best. Einhvern tímann er allt fyrst!“, segir í tilkynningu.
...
Nýlega keyptu hjónin Hjalti Hafþórsson „þúsundþjalasmiður“ og Ingibjörg Birna Erlingsdóttir sveitarstjóri Reykhólahrepps húsið Hóla á Patreksfirði, sem skráð er Mikladalsvegur 5, ásamt meðfylgjandi skúrabyggingum. Í mars í fyrra gerði ofsarok á Patreksfirði og þá stórskemmdist hluti íbúðarhússins. Húsafriðunarnefnd komst að þeirri niðurstöðu að ekki mætti rífa húsið, sem byggt var árið 1900. Skúrarnir voru hins vegar byggðir árið 1910 og eru þannig líka orðnir meira en aldargamlir. Í kaupsamningnum er ákvæði þar sem áskilið er að búið verði að lagfæra byggingarnar að utan fyrir 1. ágúst.
...
Fimmtán manns komu á fund sem Harpa Eiríksdóttir ferðamálafulltrúi Reykhólahrepps efndi til varðandi Reykhóladagana 2011, en þeir verða haldnir 4.-7. ágúst (fimmtudag til sunnudags). Þar var rætt hvað fólk legði til að hafa á dagskránni og hvernig ætti yfirleitt að standa að þessari byggðarhátíð. Meðal annars var samþykkt á fundinum að hafa aldurstakmarkið 10 ára og eldri á spurningakeppninni árlegu og 16 ára og eldri á matnum og balli á laugardagskvöldinu. Ein af nýjungunum á Reykhóladögum verður kassabílakeppni. Krakkar eru hvattir til að afla sér verkfæra og ýmislegs annars sem til þarf og hanna og smíða flotta kassabíla og taka þátt í aksturskeppni. Þarna verður líka frumlegasti kassabíllinn valinn og verðlaun veitt.
...
Ingibjörg Smáradóttir frá Borg í Reykhólasveit annast í sumar veitingasölu í Reykhólaskóla á vegum Bjarkalundar. Einkum eru það hamborgarar og samlokur fyrir utan kaffi og bakkelsi og fleira. Opnað er fyrir hádegi og opið er eitthvað fram á kvöld eftir traffíkinni, sem er nokkuð misjöfn. Þriðja ættarmótið sem haldið er í Reykhólaskóla og á húsbílasvæðinu þar hjá á þessu sumri var um síðustu helgi, en ættarmótin þar eru núna í höndum Bjarkalundar í fyrsta sinn. Árni Sigurpálsson hótelstjóri lætur annars alls ekki vel af gestakomum í veitingarnar á Reykhólum það sem af er sumri þó að Bátadagarnir hafi verið nokkur undantekning.
...
Sláttur er hafinn eða um það bil að hefjast á hverjum bænum á fætur öðrum í Reykhólahreppi. Þetta er nokkru seinna en venjulega enda hefur veður lengst af verið kalt og þurrt. Eftir því sem best er vitað var Gústaf Jökull fyrstur til að hefja slátt á Miðjanesi á fimmtudag. Á laugardaginn byrjaði sláttur a.m.k. á Stað og Gróustöðum en margir telja góða venju að byrja á laugardegi. Að sögn Stefáns bónda á Gróustöðum er ágætlega sprottið og grasið komið langt upp fyrir hvítu röndina á gúmmískónum. Reyndar eru túnþjófarnir farnir að hverfa í háliðagrasið sem Sumarliði Guðmundsson afi hans sáði í þetta tún upp úr 1960. Háliðagras getur verið mjög snemmsprottið.
...
Hreppsnefnd Reykhólahrepps samþykkti á fundi sínum 9. júní 2011 að auglýsa tillögu að breytingu á aðalskipulagi Reykhólahrepps 2006-2018. Samkvæmt 31. gr. skipulagslaga nr. 123/2010 er hér með auglýst eftir athugasemdum við tillögu að breytingu á aðalskipulagi Reykhólahrepps. Skipulagsuppdrættir, greinargerð og umhverfisskýrsla liggja frammi á skrifstofu Reykhólahrepps og hjá Skipulagsstofnun, Laugavegi 166, Reykjavík, frá 11. júlí til 29. ágúst 2011. Ennfremur eru gögnin aðgengileg hér á vef sveitarfélagsins (sjá neðar). Athugasemdum skal skila skriflega á skrifstofu Reykhólahrepps að Maríutröð 5a eða á netfangið skrifstofa@reykholar.is merkt „Aðalskipulag“. Þeir sem ekki gera athugasemdir innan tilskilins frests teljast samþykkir tillögunni.
...
