Þjóðhátíðarskemmtun verður í Bjarkalundi á morgun á vegum Ungmennafélagsins Aftureldingar og hefst kl. 14 með skrúðgöngu og ávarpi fjallkonu. Leikir og þrautir verða á sínum stað ásamt sölutjaldi með sælgæti og blöðrum. Hið árlega kaffihlaðborð Hótels Bjarkalundar verður einnig á sínum stað. Umf. Afturelding hvetur fólk til að mæta og eiga saman skemmtilegan dag.

 

Sláttur hófst á Seljanesi í Reykhólasveit á þriðjudag, 10. júní, og hirðingu lýkur í dag. Bændurnir á Stað eru nú með túnin á Seljanesi annað árið í röð og var Eiríkur Snæbjörnsson að tína saman síðustu rúllurnar núna eftir hádegið. Hvorki hann né Dagný Stefánsdóttir á Seljanesi vissu til þess að sláttur væri byrjaður víðar í héraðinu enda er þetta með allra fyrsta móti. Þrátt fyrir það er heyfengurinn af túnunum á Seljanesi ámóta mikill eða meiri en venjulega þegar mun seinna hefur verið slegið enda hefur sprettan verið geysimikil...
Meira

Í dag, 13. júní, er hálf önnur öld liðin frá fæðingu tvíburasystranna og skáldkvennanna Herdísar og Ólínu Andrésdætra í Flatey á Breiðafirði. Þær voru „af hinni merku breiðfirsku skáldaætt, sem sjera Matthías gerði frægasta", eins og séra Jón Auðuns komst að orði. Í grein um þær systur í Lesbók Morgunblaðsins fyrir rúmum áratug (sjá neðst) segir Ármann Jakobsson bókmenntafræðingur:
Herdís og Ólína eru dæmi um að merk skáld Íslandssögunnar geta fallið milli stafs og hurðar bókmenntaumræðunnar. Þó að þær nytu virðingar meðal bókmenntamanna, þ. á m. Sigurðar Nordals og Guðmundar Finnbogasonar, í lifanda lífi hafa þær litla umfjöllun hlotið hin síðari ár... Vonandi mun þó koma að því að bætt verði úr...
Meira

Vegagerðin hefur sótt um framkvæmdaleyfi fyrir nýbyggingu vega í Gufudalssveit, en þar er um að ræða leið B sem liggur um Teigsskóg við norðanverðan Þorskafjörð. Vegarlagning um skóginn hefur verið umdeild. Kæra liggur fyrir gegn íslenska ríkinu og Vegagerðinni og verður aðalmeðferð í málinu í haust. Reykhólahreppur hefur tvisvar frestað afgreiðslu á erindi Vegagerðarinnar en hreppsnefnd ætlar að hitta landeigendur á morgun (föstudag) og heyra þeirra sjónarmið. Óskar Steingrímsson sveitarstjóri segist þó reikna með því að framkvæmdaleyfi verði veitt og í framhaldinu verði hægt að bjóða verkið út....
Meira

Meðfylgjandi myndir af Kvennahlaupinu 2008 á Reykhólum tók Óskar Steingrímsson. Lagt var upp frá Grettislaug og þar var ferðinni líka lokið og farið í sund. Hlaupið var á 90 stöðum um allt land og á um 20 stöðum erlendis. „Mikil og góð stemning var víða um land þar sem ömmur, mömmur, dætur og vinkonur hreyfðu sig og skemmtu sér saman", segir á vef Kvennahlaups ÍSÍ.

   

Gamla góða valtarann við enda flugbrautarinnar á Reykhólum prýða nú gríðarstórir límmiðar með áletrunum bæði á ensku og íslensku. Líklega eru skilaboðin ætluð fólki á leið hér um alþjóðaflugvöllinn. Stafsetningin bendir til þess að hvorki enskumælandi né heldur íslenskuskrifandi fólk hafi búið til þessa miða. En hvað sem því líður - boðskapnum er komið til skila!

       

Orkuráð hefur ákveðið að leggja fram fimm milljónir króna til leitar að heitu vatni í landi Hofsstaða við Þorskafjörð. Þetta er liður í úthlutun fjár til jarðhitaleitar á allmörgum stöðum á landinu þar sem hitaveitu nýtur ekki. Að sögn Arnórs Hreiðars Ragnarssonar á Hofsstöðum liggur ekki fyrir hvenær tilraunaboranir hefjast enda aðeins þrír dagar síðan fjárveitingin var ákveðin. Arnór telur að líkurnar fyrir því að þarna megi finna heitt vatn í nýtanlegu magni séu meiri en minni. Fyrir um tveimur áratugum voru boraðar tilraunaholur hér og þar í Reykhólasveit og þar virtust Hofsstaðir öllu vænlegri en aðrir staðir utan Reykhóla....
Meira

Nýsmíðaðri eftirmynd Staðarskektunnar svonefndu var í gær siglt til reynslu í þokkalegum byr og var lagt upp frá höfninni á Stað á Reykjanesi. Smíði bátsins hefur verið eitt af viðfangsefnum Félags áhugamanna um stofnun Bátasafns Breiðafjarðar á Reykhólum, sem hér var greint frá í fyrradag. Bátsverjar voru Hafliði Aðalsteinsson skipasmíðameistari og Eggert Björnsson, sem báðir unnu að smíði bátsins ásamt Aðalsteini Valdimarssyni skipasmið á Reykhólum og nokkrum öðrum í áhugahópnum. Til fylgdar út á Breiðafjörðinn var Aðalsteinn Valdimarsson á mótorbáti sínum Hafdísi og kom í hans hlut að bjarga þeim félögum úr sjónum eftir að þeir hvolfdu bátnum....
Meira

„Horfur í varpi eru mun betri en í fyrra", segir Kristinn Haukur Skarphéðinsson, fuglafræðingur hjá Náttúrufræðistofnun Íslands. Í fyrra hafi 34 pör orpið en í ár sé vitað um 43 hreiður. Þá hafi tíðarfar verið örnunum hagstætt en ungarnir séu mjög viðkvæmir fyrir hretum í upphafi varps. „Útlitið er gott", bætir hann við, en endanlega verði ljóst hversu margir ungar komist á legg í lok þessa mánaðar....
Meira

Félag áhugamanna um stofnun Bátasafns Breiðafjarðar á Reykhólum var stofnað fyrir bráðum tveimur árum eða 31. ágúst 2006. Stofnfélagar voru Aðalsteinn Valdimarsson, Hafliði Aðalsteinsson, Ásdís Thoroddsen, Hrafn Sigurðsson, Bergsveinn G. Reynisson og bræðurnir Jón, Skúli og Aðalsteinn Aðalsteinssynir. Nú er ætlunin að halda framhaldsstofnfund og safna fleiri félögum. Til fundarins er boðað komandi miðvikudag og verður hann haldinn í Reykjavík, eins og nánar kemur fram hér fyrir neðan....
Meira