„Við erum frjáls að því að velja okkur leið, án utanaðkomandi þvingana. Og við getum haft áhrif og styrkt stöðu okkar, í góðu samstarfi við Evrópusambandið án aðildar, á grundvelli EES-samningsins. Þetta er kjarni þingsályktunartillögu sem ég var fyrsti flutningsmaður að á Alþingi ásamt 13 öðrum þingmönnum, sem nú sitja í þremur þingflokkum.“
...
Ráðuneyti atvinnuvega og nýsköpunar hefur veitt Hjalta Hafþórssyni á Reykhólum tveggja milljóna króna styrk til smíði á báti þar sem hann mun styðjast við teikningu í íslensku handriti frá 15. öld. Styrk þennan fær Hjalti í beinu framhaldi af mun lægri styrk sem ráðuneyti mennta- og menningarmála veitti honum fyrir réttu ári til smíði á endurgerð Vatnsdalsbátsins svokallaða frá 10. öld, en leifar hans fundust fyrir um hálfri öld í kumli í Vatnsdal við Patreksfjörð. Vegna aðstöðuleysis á Reykhólum smíðaði Hjalti þann bát á Siglufirði á liðnu sumri og vakti sú vinna mikla athygli bæði heimamanna og ferðafólks.
...
Taizémessan sem boðuð hafði verið í Reykhólakirkju annað kvöld, sunnudagskvöld, fellur niður vegna slæms veðurútlits.
...
Álagning fasteignagjalda í Reykhólahreppi hefur farið fram. Álagningarseðlarnir verða sendir út en eru einnig birtir rafrænt á www.island.is. Álagningarákvæðin eru aðgengileg hér á vefsíðu Reykhólahrepps. Allar nánari upplýsingar um álagningu fasteignagjalda eru veittar á skrifstofu Reykhólahrepps í síma 434 7880. Einnig má senda fyrirspurnir á netfangið reykholar@reykholar.is.
...
Alþjóðlegi hrósdagurinn er í dag, 1. mars. Í Reykhólahreppi gekk Eiríkur Snæbjörnsson bóndi á Stað á undan með góðu fordæmi þegar hann færði einum sveitunga sínum gjöf í viðurkenningarskyni fyrir unnin störf. Hér er um að ræða smíðisgripi Eiríks sjálfs, þrjá hluti í öskju (penna, pappírshníf og lyklahring með tannstönglageymslu), en viðurinn í þeim er hlynur.
...
Nemendur og „ofvirkir velunnarar“ Auðarskóla standa fyrir félagsvist í félagsheimilinu Tjarnarlundi í Saurbæ í kvöld, fimmtudag. Byrjað verður að spila kl. 20. Sjoppa á staðnum. Enginn posi. Aðgangseyrir 500 krónur.
...
Árleg saltkjötsveisla og bókmenntavaka Lions í Reykhólahreppi verður í matsal Reykhólaskóla föstudagskvöldið 8. mars. Samkvæmt hefðinni er hverju sinni kynning á einu skáldi úr héraðinu og verkum þess. Núna er komið að Guðmundi Arinbirni Jónssyni frá Hyrningsstöðum. Von er á góðum gestum frá Lionsklúbbnum í Búðardal sem endranær og verður sitthvað á dagskránni auk kynningarinnar.
...
Símenntunarmiðstöðin á Vesturlandi minnir á enskunámskeið í fjarkennslu, sem hefst 4. mars og stendur í tíu vikur. Samskiptin við kennara fara fram gegnum netið. Námskeiðið byggist á úrvinnslu verkefna og heimalestri. Málnotkun fer fram munnlega eftir samkomulagi við kennara. Allir nemendur fá námskeiðsmat í lokin.
...
Þriðja barnið og jafnframt þriðja stúlkan sem fæðist í hóp íbúanna í Reykhólahreppi á þessum vetri leit dagsins ljós á fimmtudag, 21. febrúar. Foreldrar hennar eru Ólafía Guðrún Sigurvinsdóttir og Eyvindur Svanur Magnússon, sem settust að á Reykhólum fyrir tæpum þremur árum og reka verslunina Hólakaup. Hálfsystkini stúlkunnar litlu, börn Eyvindar, eru Lovísa Oktovía, f. 1991, Karen Hrönn, f. 1993, og Bjarni Salvar, f. 1998. Alsystkini hennar eru Sara Dögg, alveg að verða níu ára, og Sigurvin Helgi, sem er á sjöunda ári.
...
Snæbjörn Kristjánsson frá Breiðalæk var endurkjörinn formaður Breiðfirðingafélagsins á aðalfundi þess á fimmtudag. Aðrir í aðalstjórn eru Alvilda Þóra Elísdóttir, Hörður Rúnar Einarsson, Sæunn G. Thorarensen, Júlíana Ósk Guðmundsdóttir, Kristjón Sigurðsson og Finnbjörn Gíslason.
...
