Lionsfólk efnir sem endranær til skötuveislu í borðsal Reykhólaskóla milli klukkan 12 og 14 á Þorláksmessu. Viðeigandi meðlæti og útálát (hnoðmör og hamsatólg). Viðvaningar og viðkvæmt fólk geta fengið saltfisk. Verð ...

Reykhólahreppur óskar eftir að ráða í 100% stöðu bæjarstarfsmanns. Starfið felst í vinnu undir stjórn umsjónarmanns fasteigna við ýmis viðhaldsverkefni, fram-kvæmdir og umhirðuverkefni á vegum sveitarfélagsins, svo sem við gatnakerfi, opin svæði og veitur.

Eins og í fyrra eru allir velkomnir í svolítinn gleðskap í Hólabúð kl. 20-22 á Þorláksmessukvöld. Á boðstólum verður jólaglögg og piparkökur með gráðosti og hunangi ásamt hangikjöti og ýmsu öðru góðgæti. Og jólatónlist, að sjálfsögðu.

Heilsugæslustöðin á Reykhólum.

Næsta mánudag (sem er reglubundinn læknisdagur á Heilsugæslunni á Reykhólum) ber upp á annan í jólum. Þess vegna verður læknirinn í staðinn á Reykhólum daginn eftir, þriðjudaginn 27. desember.

Þórir Bergmundsson háls-, nef- og eyrnalæknir verður með móttöku á Heilsugæslustöðinni í Búðardal miðvikudaginn 28. desember.

Námskeið í útvarpsþáttagerð sem Kol og salt á Ísafirði (Elísabet Gunnarsdóttir arkitekt) stendur fyrir í samstarfi við prófessorsembætti Jóns Sigurðssonar og Fræðslumiðstöð Vestfjarða verður haldið í janúar og febrúar. Um er að ræða fjarkennslu, heimaverkefni og staðkennslu. Ferðastyrkir í boði. Afraksturinn verður kringum hálftíma langir þættir. Búin verður til hlaðvarpssíða sem vistar alla þætti og verður úrvali þeirra útvarpað á Rás eitt. Þáttagerðin verður í höndum fólks af Vestfjörðum eða sem tengist menningarsvæðinu sterkum böndum. Leitað verður til þátttakenda sem ljúka námskeiðinu um áframhaldandi þáttagerð fyrir útvarp.

Reykhóladeild Lions beinir því til héraðsfólks að henda ekki kertavaxi sem til fellur um hátíðarnar, kertastubbum og slíku. Endurnýting er í athugun. Þetta skýrist með nýju ári.

Síðustu tvö þriðjudagskvöld hafa menn komið saman að tefla skák í föndurstofu Barmahlíðar á Reykhólum. Að sögn upphafsmannsins Guðjóns D. Gunnarssonar (Dalla) hefur mæting verið „hófleg“ eða sex og sjö manns, en sigurvegarar þessi kvöld voru Eiríkur Kristjánsson og Hlynur Þór Magnússon. „Til stendur að halda þessu áfram og mættu gjarnan fleiri mæta,“ segir Dalli.

Jólaball Kvenfélagsins Kötlu verður miðvikudaginn þann 28. desember í íþróttahúsinu á Reykhólum og hefst kl. 16. Allir velkomnir og frítt inn. Við hlökkum til að dansa saman kringum jólatréð og hitta jólasveinana, segja kvenfélagskonur.

Núna fyrir jólin fást á skrifstofu Reykhólahrepps umbúðakassar (rauðu kassarnir frá Íslandspósti), umslög og frímerki fyrir jólasendingarnar á sama verði og hjá Póstinum. Þetta er ný aukaþjónusta fyrir íbúana sem skrifstofan ákvað að veita. Eftir sem áður þarf fólk að annast sjálft að koma sendingunum á póstbílinn. Hjá Íslandspósti er líka aukaþjónusta nú fyrir jólin. Póstferðir í Reykhólahrepp verða alla virka daga í næstu viku eða dag hvern frá mánudegi og fram á föstudag, Þorláksmessu.