Mannskapurinn ásamt kennaranum Heiðu Jónsdóttur við Landróver Heimamanna. Nánar í meginmáli.

Námskeið í fjallamennsku fyrir Björgunarsveitina Heimamenn í Reykhólahreppi var haldið núna um helgina. Kennd voru grunnatriði í ferðalögum um fjalllendi að vetri til, farið yfir helstu hættur og margt fleira. Farið var í Borgarlandið þar sem farið var yfir notkun ísaxar, mannbrodda og snjóýla ásamt helstu snjótryggingum. Beggi á Gróustöðum fræddi um það hvernig hægt er að skoða snjólög til að meta hættu á snjóflóðum. Sunnudagurinn fór í klettaklifur.

Landsbankinn minnir á, að auk viðveru í dag verður afgreiðsla hans í húsi hreppsins við Maríutröð líka á morgun, fimmtudag, kl. 10-14.

Frá starfinu á Hjallahálsi. Af heimasíðu Björgunarsveitarinnar Heimamanna.

« 1 af 2 »

Björgunarsveitin Heimamenn í Reykhólahreppi hefur opnað heimasíðu, sem er undirsíða hér á Reykhólavefnum. Til að fara inn á hana er smellt á rauða kassann (merki sveitarinnar) í dálkinum hér hægra megin. Efst á nýju síðunni eru helstu upplýsingar, svo sem útkallssími, nöfn og símanúmer stjórnarmanna og reikningsnúmer fyrir þá sem vilja styrkja starfið. Þar fyrir neðan er fréttadálkur með sama sniði og þessi, þar sem inn eru settar fréttir og myndir frá starfi Heimamanna.

Myndir: Björgunarsveitin Heimamenn.

« 1 af 4 »

Flutningabíllinn sem valt á Hjallahálsi á föstudagskvöldið var réttur við í gær. Farmurinn var tíndur úr honum, selfluttur á kerrum niður í Djúpadal og settur þar í annan bíl. Nokkuð á annan tug manna úr Björgunarsveitinni Heimamönnum í Reykhólahreppi var að þessum störfum í allan gærdag. Engin leið var að athafna sig þarna á sunnudag vegna óveðurs, en eins og hér kom fram var aðgerðum hætt á laugardagskvöld vegna veðurs og myrkurs. Ætlunin er að flytja bílinn burt á vagni í dag. Hann er mikið skemmdur og eitthvað af farminum var skemmt.

Hreindýr á Svalbarða / Wikipedia.

Sigurður Ingi Jóhannsson umhverfis- og auðlindaráðherra hefur skipað starfshóp til að fjalla um hreindýraeldi og hreindýraræktun sem nýja búgrein á Íslandi. Hópnum er falið að fjalla um málið frá öllum hliðum og draga fram þau atriði sem gætu skipt máli fyrir villt hreindýr hér á landi, verndun og veiðar, búfjársjúkdóma, landbúnað og landnýtingu. Ísland er hið eina Norðurlandanna þar sem hreindýrarækt er bönnuð.

70 ára afmælisfagnaður Barðstrendingafélagsins verður haldinn laugardaginn 15. mars í Lionssalnum Lundi, Auðbrekku 25-27, Kópavogi. Húsið verður opnað með fordrykk kl. 19 og síðan er veisluhlaðborð og opinn bar. Skemmtiatriðin eru ættuð að vestan. Hljómsveit Marinós Björnssonar leikur fyrir dansi að loknum kvöldverði.

Bíllinn á hliðinni á Hjallahálsi. Myndirnar tók Hrólfur Árni Borgarsson.

« 1 af 2 »

Flutningabíll valt á Hjallahálsi í gærkvöldi, í S-beygjunum svokölluðu Djúpadalsmegin. Ökumaðurinn mun hafa meiðst nokkuð en þó ekki alvarlega. Menn úr Reykhólahreppi fóru í morgun til að skoða aðstæður og meta hvað hægt væri að gera til að rétta bílinn við og ná honum upp. Snjóblásari sem hefur verið á Þröskuldum kom og blés frá honum og líka var komið með beltagröfu. „Okkur skildist að farmurinn væri eitthvert smáræði, en það reyndust vera líklega um tólf tonn af timbri og sementi og fleiru,“ sagði heimildamaður.

Ingibjörg Birna Erlingsdóttir sveitarstjóri skorar á starfsmenn Reykhólahrepps að skora á starfsmenn Þörungaverksmiðjunnar í motturæktarkeppni. Tilefnið er Mottumars, árvekni- og fjáröflunarátak Krabbameinsfélagsins í baráttunni gegn krabbameinum hjá körlum, sem hófst í dag.

Bolludagsbollurnar í verslunina Hólakaup á Reykhólum verða sóttar suður í Borgarnes eins og undanfarin ár. Hafið samband og pantið og komið séróskum á framfæri. Nánar hér.

Eins og hér hefur komið fram hefur venjubundin viðvera afgreiðslu Landsbankans á Reykhólum á miðvikudögum ítrekað fallið niður í vetur, ýmist vegna lögmætra forfalla eða vegna óveðra og ófærðar. Samkvæmt tilkynningu frá bankanum verður afgreiðslan hins vegar tvo daga á Reykhólum í næstu viku.