Reglulegum fundi sveitarstjórnar Reykhólahrepps, sem hefði með réttu átt að vera núna á fimmtudag, 13. mars, hefur verið frestað um eina viku eða fram til fimmtudagsins 20. mars.
...
Grímur Már Þórólfsson, 25 ára laganemi upprunninn á Reykhólum og líka ættaður úr Geiradal, tekur í næsta mánuði ásamt nokkrum skólasystkinum sínum við Háskólann í Reykjavík þátt í alþjóðlegri málflutningskeppni, sem nefnist upp á hollensku Willem C. Vis Int. Commercial Arbitration Moot. Lokakeppnin fer fram í Vínarborg 10.-17. apríl en áður verður keppt á nokkrum æfingarmótum í Frakklandi og Ungverjalandi. Um 250 skólar hvaðanæva úr heiminum taka þátt í keppninni en lið Háskólans í Reykjavík er eina liðið frá Íslandi.
...
Aðalfundur Kvenfélagsins Kötlu verður haldinn í matsal Reykhólaskóla 18. mars (þriðjudaginn í næstu viku) og hefst kl. 20. Á dagskránni eru venjuleg aðalfundarstörf. Nýir félagar velkomnir.
...
Víða eru tækifæri fyrir bændur til að auka verðmæti afurða sinna og fyrir nýsköpunarfyrirtæki að byggja á nýtingu landbúnaðarafurða, að sögn Bryndísar Geirsdóttur hjá kvikmyndafyrirtækinu Búdrýgindi. Hún átti frumkvæði að málþinginu Nýsköpun og framtíðarsýn í sveitum sem haldið var í Landbúnaðarháskólanum á Hvanneyri um helgina.
...
Hjalti Hafþórsson á Reykhólum hefur hlotið ráðuneytisstyrk þriðja árið í röð til bátasmíðaverkefnis síns Horfin verkþekking. Hér er um að ræða tveggja milljóna króna styrk frá ráðuneyti atvinnuvega og nýsköpunar, en hann fékk jafnháan styrk frá sama ráðuneyti fyrir réttu ári. Fyrsta styrkinn, sem var lægri, fékk hann fyrir tveimur árum frá ráðuneyti mennta- og menningarmála. Fyrir utan það að peningarnir skipta sköpum fyrir framgang verkefnisins verður að telja þetta mikla viðurkenningu á starfi Hjalta.
...
Nauðsyn veru beggja sjúkrabifreiða sem nú eru til staðar í Búðardal hefur sannað sig enn á ný, segir á vefnum Búðardalur.is, en þær voru báðar kallaðar út á sama tíma bæði á miðvikudag og fimmtudag. Í báðum tilfellum var annar bíllinn í hefðbundnum sjúkraflutningi þegar bráðaútkall kom á sama tíma og því hefði verið mjög bagalegt að hafa þá ekki hinn til taks, hefur vefurinn eftir sjúkraflutningamanni í Búðardal.
...
Ævar Petersen, sá ágæti fuglasérfræðingur og velunnari Flateyjar, hefur til margra ára safnað örnefnum í Flatey samhliða því að huga að fuglalífi. Hann hefur nú tekið saman stórmerkilega bók um þetta annað áhugamál sitt, sem vonast er til að komi út fljótlega, segir á vef Framfarafélags Flateyjar.
...
Um sextíu manns komu í hina árlegu saltkjöts- og bókmenntaveislu Lions á Reykhólum í fyrrakvöld. Þetta er svipað og í fyrra og verður að teljast góð aðsókn. Skáld kvöldsins að þessu sinni var Jóhannes Haukur Hauksson í Búðardal. Þórarinn Ólafsson í Stekkjarlundi tók fjölda mynda við þetta tækifæri (Ljósmyndir, myndasöfn - Myndasyrpur í valmyndinni hér til vinstri).
...
Hópur fólks í Félagi eldri borgara í Dalabyggð og Reykhólahreppi kom í rútu í heimsókn á Dvalarheimilið Barmahlíð á Reykhólum, spilaði bingó ásamt heimafólki, drakk síðdegiskaffi og söng nokkur lög við undirleik Halldórs Þórðarsonar. Meirihluti gestanna var úr Dalabyggð en fjórir úr Reykhólahreppi.
...
Markaðsstofa Vestfjarða hefur verið að skoða möguleika þess að kynna Vestfirði í afþreyingarkerfi í flugvélum Icelandair. Aðrir landshlutar hafa verið með kynningar í vélunum um skeið og má hér sjá innslagið frá Suðurlandi. „Þessar landshlutakynningar fá mikið áhorf í vélunum, sem og á netinu,“ segir í frétt frá Markaðsstofunni. „Ljóst er að til þess að geta verið með kynningu frá Vestfjörðum þurfa ferðaþjónustufyrirtæki að koma með í verkefnið, endilega hafið samband ef þið hafið áhuga á þessum möguleika.“
...
