Reykhólaskóli / Árni Geirsson.

Anna Greta Ólafsdóttir skólastjóri Reykhólaskóla biður vefinn að koma því á framfæri, að vegna brunans á Reykhólum í gærkvöldi hefur verið ákveðið að fresta foreldrafundinum sem halda átti í kvöld. Hins vegar verður pítsukvöld unglinganna í skólanum eins og ekkert hafi í skorist. Bæði er hægt að koma og taka pítsuna með sér heim eða borða hana í matsal skólans. Sjá hér nánar allt um pítsuveisluna:

Garðar Jónsson framleiðslustjóri (t.h.) afhendir Þorgeir Samúelssyni starfsmanni á vélaverkstæðinu ný öryggisskilti sem þar voru sett upp.

Þörungaverksmiðjan á Reykhólum hefur gert samning við Heilsuvernd ehf. í Reykjavík um velferðarþjónustu við starfsmenn fyrirtækisins og tekur hann til trúnaðarlæknisþjónustu, fjarveruskráninga, heilsuverndar starfsmanna og aðgengis þeirra að þjónustuveri Heilsuverndar. Að sögn Einars Sveins Ólafssonar framkvæmdastjóra færir samningurinn stjórnendum og starfsmönnum aukið aðgengi að heilbrigðisstarfsfólki og upplýsingum um heilsuvernd. „Hann hefur líka forvarnargildi því markmiðið er að draga úr líkum á óþægindum, sjúkdómum og slysum sem geta tengst störfum hjá fyrirtækinu.“

Frá Reykhólum. Ljósm. Árni Geirsson.

Tveir slökkviliðsmenn á Reykhólum voru seint í gærkvöldi fluttir með sjúkrabíl suður á Akranes vegna gruns um að þeir hefðu orðið fyrir reykeitrun við slökkvistarf. Þetta var gert í öryggisskyni en mönnunum heilsast vel. Milli kl. tíu og hálfellefu var Slökkvilið Reykhólahrepps kallað út vegna mikils elds í bílskúr við Hellisbraut. Greiðlega gekk að slökkva en jeppi af gerðinni Nissan Terrano II eyðilagðist sem og ýmis verkfæri sem þarna voru og líka hurðir og gluggar á bílskúrnum sem er steinsteyptur.

Afmælisbarn þemadagsins með myndarlegt um hálsinn. Nánar um mann þennan í meginmáli.

Fyrsti föstudagur í nóvember er núna á föstudaginn, fyrsta dag mánaðarins, og þar með þemadagur í Reykhólahreppi hvað klæðaburð varðar. Að þessu sinni er þemað hálstau af einhverju tagi, hvort sem um er að ræða hálsbindi, þverslaufur, slæður eða trefla nú eða eitthvað annað. Fólk er hvatt til að taka þátt í þessum leik og lífga upp á skammdegið með skemmtilegu hálstaui og kalla kannski fram stöku bros á förnum vegi.

Fyrsta evrópska dreifbýlisþingið (European Rural Parliament eða ERP) kemur saman í Brüssel 13. nóvember. Þátttakendur verða fulltrúar um sjötíu mismunandi dreifbýlissamtaka frá liðlega þrjátíu löndum og svæðum í Evrópu. Af hálfu Íslendinga taka samtökin Landsbyggðin lifi þátt í þinginu og munu fimm íslenskir fulltrúar sitja það. Tilgangurinn er að koma málefnum hinna dreifðu byggða á dagskrá Evrópusambandsins og hafa áhrif á stefnumörkun sem mun snerta lífið í dreifbýli. Fulltrúar stefnumótandi yfirvalda verða með á ERP-þinginu og taka þátt í umræðunum og eiga hlut að þeim hugmyndum sem frá þátttakendum koma.

Sjúkrabílar í Búðardal. Ljósm. Búðardalur.is / Steina Matt.

Um áramótin verður sjúkrabílum í Búðardal, á Hvammstanga og í Ólafsvík fækkað úr tveimur í einn á hverjum stað. Ef hann er í útkalli verður því enginn tiltækur á meðan. Þórður Ingólfsson yfirlæknir í Búðardal, en hérað hans spannar Dalabyggð og Reykhólahrepp, hefur áhyggjur af stöðunni. „Hér eru vegalengdir miklar og tímafrekt getur verið að komast á milli staða og þess vegna höfum við áhyggjur af því ef fækka á sjúkrabílum á svæðinu. Meðalútkall er eitthvað í kringum fjórir klukkutímar og þau geta farið upp í allt að átta tíma. Þess vegna teljum við mikilvægt að hafa hér sjúkrabíl til vara,“ segir Þórður í samtali við Morgunblaðið í dag.

María Játvarðardóttir félagsmálastjóri verður ekki með viðtalstíma á skrifstofu Reykhólahrepps í dag eins og venjulega á mánudögum. Þess í stað verður hún með viðtalstíma þar fyrir hádegi á morgun, þriðjudag. Æskilegt er að panta tíma í síma 842 2511.

Skyndihjálparnámskeið verður haldið í Auðarskóla í Búðardal á vegum Búðardalsdeildar Rauða krossins (sem spannar einnig Reykhólahrepp) dagana 4.-7. nóvember kl. 18-22 hvert kvöld (mánudag til fimmtudags í næstu viku). Leiðbeinandi Árný Helgadóttir. Markmiðið er að auka þekkingu og færni þátttakenda í að beita á öruggan hátt einföldum aðferðum í skyndihjálp og auka færni í því að meta einkenni algengra sjúkdóma og áverka.

Þaramjöli skipað út í flutningaskipið Hauk. Nær er Grettir, flutningaskip Þörungaverksmiðjunnar.

Á dögunum lagðist flutningaskipið Haukur að bryggju í Reykhólahöfn og lestaði 1.600 tonn af lausu þara- og þangmjöli sem dælt var úr sílóum Þörungaverksmiðjunnar og flutt til Noregs. Um ákveðin tímamót var að ræða í tvennum skilningi, segir í tilkynningu frá verksmiðjunni. Annars vegar var um að ræða stærsta einstaka farm sem skipað hefur verið út á vegum verksmiðjunnar og hins vegar komu undirverktakar í fyrsta sinn að útskipun fyrir fyrirtækið.

Aðalfundi Skruggu sem vera átti á Reykhólum núna í kvöld og greint var frá hér á vefnum í gær (næsta frétt hér á undan) hefur verið frestað af óviðráðanlegum orsökum. Stefnt er að því að hann verði haldinn mjög fljótlega þó að tímasetning liggi ekki fyrir á þessari stundu.