Ritvélin á Héraðsbókasafni Reykhólahrepps er búin að leggja upp laupana eftir langa og dygga þjónustu. Tölvur og tölvuprentarar eru líklega búin að leysa ritvélarnar góðu af hólmi á flestum heimilum. Ekki er ósennilegt að ýmsir séu með ágæta ritvél geymda á góðum stað og hafi ekki viljað henda henni alveg strax.
...
Áhöfnin á Húna (sem þarf víst ekki að kynna frekar) verður með tónleika í Flatey á Breiðafirði síðdegis á laugardag (hefjast kl. 17.30). Eyjasigling (Björn Samúelsson á Reykhólum) verður með ferðir frá Staðarhöfn út í Flatey frá klukkan eitt eftir hádegi og fram eftir degi eins og þörf krefur og síðan til baka um kvöldið.
...
Ný sýning verður opnuð í Ólafsdal við Gilsfjörð kl. 14 á laugardag á efri hæð skólahússins sem eitt sinn hýsti fyrsta búnaðarskóla á Íslandi. Sýningin er samstarfsverkefni Ólafsdalsfélagsins og Byggðasafns Dalamanna og fjallar um nám og störf kvenna í Ólafsdal á dögum skólans (1880-1907). Við opnunina mun Sigríður Hjördís Jörundsdóttir spjalla um efni sýningarinnar. Klukkan 15 verður síðan opnuð kynning á verkefni um matarhefðir við Breiðafjörð og á Ströndum.
...
Þess má geta í framhaldi af frétt hér á vefnum í morgun um ársreikninga Reykhólahrepps og stofnana hans fyrir árið 2012, að nokkur meginatriði í reikningum hafnarsjóðs, leiguíbúða Reykhólahrepps og Barmahlíðar eru samandregin í fundargerðum skipulagsnefndar og stjórnar Barmahlíðar í fyrradag. Fundirnir voru haldnir á undan aukafundi hreppsnefndar þar sem reikningar umræddra fyrirtækja Reykhólahrepps voru samþykktir.
...
Halldóra Guðjónsdóttir frá Gröf í Þorskafirði, sem andaðist í Barmahlíð á Reykhólum 4. júlí, verður jarðsungin í Reykhólakirkju á laugardag, 13. júlí. Athöfnin hefst kl. 14. Boðið er til erfisdrykkju í íþróttahúsinu að henni lokinni. Blóm eru afþökkuð en þeir sem vilja minnast hinnar látnu eru beðnir um að láta Hjúkrunar- og dvalarheimilið Barmahlíð njóta þess.
...
Ársreikningar Reykhólahrepps og stofnana hans fyrir árið 2012 voru samþykktir við síðari umræðu á aukafundi hreppsnefndar í fyrradag. Reikningana er að finna undir Stjórnsýsla - Ársreikningar og áætlanir í valmyndinni hér vinstra megin. Fram til þessa hefur Ársreikningur Reykhólahrepps og stofnana hans verið í einu skjali en núna eru reikningar hafnarsjóðs, leiguíbúða hreppsins og Barmahlíðar hver í sínu lagi eins og þarna má sjá.
...
Atvinnuþróunarfélag Vestfjarða (AtVest) hefur efnt til happdrættis meðal fólks sem búsett er á Vestfjarðakjálkanum, þar sem vinningurinn er iPad mini. Það eina sem þarf að gera er að skrá sig ásamt nafni og sveitarfélagi. Netföngin verða notuð til að senda út íbúakannanir meðal fólks á Vestfjörðum. Hægt er að afskrá sig hvenær sem er. Dregið verður úr innsendum netföngum 29. júlí.
...
Þær Guðlaug Jónsdóttir og Ása Björg Stefánsdóttir, mágkonur í Árbæ á Reykjanesi í Reykhólasveit, fóru núna fyrir nokkru eins og svo oft áður í dúnleit í Skútunaustahólma rétt inn með Þorskafirði. Þær Ása og Gulla hafa alla tíð verið í nánum tengslum og kynnum við æðarfuglinn og stundað dúntekju í áratugi, en þarna sáu þær nokkuð sem þær höfðu aldrei séð fyrr: Sambýlishreiður sem tvær kollur hafa gert sér, fullt af dún og allt í sátt og samlyndi hjá þeim. Kannski þær séu eineggja tvíburar, segir Ása. Væri víst kallað parhús ef mannfólkið ætti í hlut.
...
Aðstoðarmatráður starfar í eldhúsi við matargerð og þrif og vinnur sjálfstætt eftir fyrirmælum matráðs við bakstur og matargerð. Reynsla og þekking á eldhússtörfum og matreiðslu eru skilyrði. Starfshlutfall er um 80%. Unnið er aðra hverja helgi.
...
Sveitarstjóri Reykhólahrepps verður í sumarfríi frá 15. júlí til 9. ágúst. Ef um mjög aðkallandi erindi er að ræða, sem ekki má bíða, er hægt að hafa samband í síma 896 3629. Skrifstofa Reykhólahrepps verður lokuð í tvær vikur eða frá 29. júlí til 9. ágúst. Verður opin á ný mánudaginn 12. ágúst.
...
