Eins og myndirnar hér bera með sér fór því fjarri að einungis aldrað fólk hafi sótt hinn árlega Dag aldraðra hjá Breiðfirðingafélaginu syðra fyrir skömmu. Að vanda var á borðum veglegt kaffihlaðborð, sem er sameiginlegt verkefni Félags breiðfirskra kvenna, stjórnar og skemmtinefndar Breiðfirðingafélagsins og Breiðfirðingakórsins.
...
Vakin skal athygli á nýjum og nýlegum myndum í myndasafni Árna Geirssonar verkfræðings frá Reykhólum og úr Reykhólahreppi hér á vefnum. Annars vegar eru það nokkrar sólarlagsmyndir (Reykhólar í sólarlagsglóð) og hins vegar nokkur fjöldi loftmynda sem teknar eru á svæðinu sunnan Reykhólaþorps og niður að höfn. Tvær þessara mynda fylgja hér sem sýnishorn.
...
Enda þótt annar í hvítasunnu sé „rauður dagur“ á almanakinu verður Héraðsbókasafn Reykhólahrepps á Reykhólum opið kl. 17-19 eins og venjulega á mánudögum.
...
Ljóst má vera af meðfylgjandi myndum, að ekki hefur öllum leiðst æfingin í meðferð slökkvibúnaðar í Flatey á Breiðafirði í gær. Guðmundur Ólafsson slökkviliðsstjóri Reykhólahrepps og Guðmundur Bergsson eldvarnaeftirlitsmaður fóru þá út í Flatey ásamt fulltrúum úr brunavarnanefnd og slökkviliði Reykhólahrepps. Haldinn var fundur með heimafólki og húseigendum sem staddir voru í eynni og farið yfir brunavarnir, helstu áhættuþætti og mikilvægi fyrirbyggjandi aðgerða.
...
Grettislaug á Reykhólum verður lokuð um tíma frá og með næsta þriðjudegi, 21. maí, vegna hinnar árlegu viðhaldsvinnu. Ekki liggur fyrir hvenær hún verður opnuð á ný en ef að líkum lætur verður það nálægt mánaðamótum en tíðarfar hefur þar eitthvað að segja. Frá því verður greint hér þegar þar að kemur.
...
Sumarið horfir ekki á almanakið og mætir ekki alltaf samkvæmt því. Núna á hvítasunnudag má hins vegar fullyrða að sumarið sé komið í Reykhólasveit. Fíngerð rigning í hlýju logni, bændur að slóðadraga grænkandi túnin. Sjö tjaldar settust á Hellisbrautina miðja og stóðu þar um hríð kjólklæddir og ræddu saman steinþegjandi. Að fundi loknum vippuðu þeir sér út á tún og þá komu fjórir í viðbót og bættust í hópinn. Kannski sjö manna bæjarstjórn tjaldanna og fjórir varamenn.
...
Þjóðlagatvíeykið Funi, þau Bára Grímsdóttir og Chris Foster, verða með skemmtilega og fræðandi dagskrá um hrafninn fyrir börn í samkomuhúsinu Baldri á Drangsnesi á miðvikudagsmorgun. Bára og Chris eru reynsluboltar þegar þjóðleg tónlist er annars vegar, þau syngja bæði og leika á íslenskt langspil, kantale og gítar. Til er fjöldinn allur af íslenskum alþýðulögum um krumma, sum þeirra eru mjög vel þekkt en önnur minna, og verða mörgum þeirra gerð skil í þessari dagskrá.
...
Orkubú Vestfjarða (OV) mun framvegis í kjölfar aðalfundar halda opinn upplýsingafund, Ársfund, sem opinn er öllum sem vilja kynna sér málefni fyrirtækisins. Fyrsti Ársfundur OV verður kl. 17 á miðvikudag, 22. maí, í Edinborgarhúsinu á Ísafirði og verður öllum opinn. Framsögumenn eru:
...
Harpa Eiríksdóttir ferðamálafræðingur á Stað í Reykhólasveit, framkvæmdastjóri Báta- og hlunnindasýningarinnar á Reykhólum, var kjörin í stjórn Ferðamálasamtaka Vestfjarða á aðalfundi samtakanna í Árnesi í Trékyllisvík. Þar var einnig kosinn nýr formaður, Ásgerður Þorleifsdóttir hjá Borea Adventures á Ísafirði, fyrrum verkefnastjóri hjá Atvinnuþróunarfélagi Vestfjarða. Sigurður Atlason á Hólmavík, framkvæmdastjóri Galdrasýningar á Ströndum, baðst eindregið undan endurkjöri.
...
Vestfjarðavegur nr. 60 verður opinn um Kjálkafjörð í dag [laugardag] en lokast aftur um miðnætti aðfaranótt sunnudags 19. maí um óákveðinn tíma vegna hættu á skriðuföllum. Þetta kemur fram á vef Vegagerðarinnar. Vegfarendum skal bent á að fylgjast með tilkynningum á heimasíðu Vegagerðarinnar þar sem jafnóðum eru birtar upplýsingar um stöðu mála.
...
