Elfar Logi Hannesson sem Sigvaldi Kaldalóns.

Saga tónskáldsins Sigvalda Kaldalóns, sem á sínum tíma var læknir í Flatey og líka við Ísafjarðardjúp innanvert (kenndi sig við Kaldalón í Inndjúpi), er rakin í leikverki sem flutt verður í Tjarnarlundi í Saurbæ í kvöld, síðasta vetrardag. Sýningin hefst kl. 20.30. Höfundur verksins og leikari er Elfar Logi Hannesson frá Bíldudal (Kómedíuleikhúsið á Ísafirði) en hljóðfæraleikari og leikkona er Dagný Arnalds.

Skriðan í Kjálkafirði.

„Þetta er eins og þrír snjóflóðavarnargarðar. Gárungarnir sögðu að nú væri kominn flottur ofaníburður fyrir vegina. En þetta eru hræðilegar hamfarir. Það er skelfilegt að sjá þetta. Það þurfti að setja á aukaferð með ferjunni Baldri því margir eru á ferð og flugi núna, kirkjukórinn er að fara til útlanda og kórfélagar ætluðu að leggja af stað í gær og í dag. Margir ætluðu að keyra svo ferjan þurfti að fara aukaferð,“ segir Ásthildur Sturludóttir, bæjarstóri í Vesturbyggð, en Vestfjarðarvegur 60 um Kjálkafjörð lokaðist í gær þegar skriða féll á veginn og lokaði honum.

Einar Kristinn spjallar við fundargesti.

Frambjóðendur Sjálfstæðisflokksins komu á Reykhóla í fyrrakvöld og héldu fund í SjávarSmiðjunni. Þar voru vegamálin í héraðinu mjög til umræðu eins og vænta mátti. „Hérna brann mjög á fundarmönnum sú óvissa sem ríkir um fyrirhuguð vegstæði í Gufudalssveitinni. Ég er eindregið þeirrar skoðunar að það eigi að setja svokallaða B-leið út með Þorskafirði að vestanverðu í umhverfismat. Það er besti kosturinn, það er ódýrasti kosturinn og það er sá kostur sem heimamenn vilja“, sagði Einar K. Guðfinnsson alþm. eftir fundinn.

Vestfjarðavegur nr. 60 í Kjálkafirði skammt austan Flókalundar er lokaður um óákveðinn tíma vegna skriðufalla. „Það er lokað suður. Þeir segja að lauslega áætlað hafi farið um 150 þúsund rúmmetrar af stað. Vegurinn er ófær, það er um 30 metra þykkt ofan á veginum. Byrjað er að ryðja á fullu og það verður auglýst þegar vegurinn verður opnaður,“ segir Eiður Thoroddsen, rekstrarstjóri Vegagerðarinnar á Patreksfirði.

Hjúkrunar- og dvalarheimilið Barmahlíð.

Hátíðahöldin á Barmahlíðardaginn, sem haldinn er á Reykhólum á sumardaginn fyrsta ár hvert, verða með veglegra móti að þessu sinni. Ástæðan er 25 ára afmæli Hjúkrunar- og dvalarheimilisins Barmahlíðar, en fyrsta heimilisfólkið fluttist inn snemma árs 1988. Fyrir utan dagskrá og afmæliskaffi í Barmahlíð verður opið kaffihús í Reykhólaskóla ásamt bingóspili.

« 1 af 2 »

Umf. Afturelding í Reykhólahreppi hyggst leigja út auglýsingaskilti innan á skjólveggnum við Grettislaug á Reykhólum. Ætlunin er að þau verði uppi í eitt ár en síðan verður hægt að borga á ný fyrir að hafa þau áfram. Skiltin fást í tveimur stærðum: Hæðin er í báðum tilvikum 90 cm en breiddin getur verið einn metri eða tveir metrar. Verðið fyrir árið er kr. 43 þúsund fyrir minni skiltin en kr. 63 þúsund fyrir stærri skiltin.

Kjörstjórn Reykhólahrepps auglýsir kjörfund í Reykhólahreppi vegna þingkosninganna á laugardag, 27. apríl. Kjördeildin í hreppnum verður í Bjarkalundi og stendur kjörfundur kl. 10-18. Ýmsar fleiri upplýsingar koma fram í auglýsingunni og má lesa hana hér í heild.

Starf ritara á skrifstofu Reykhólahrepps er laust til umsóknar. Ritari hefur umsjón með almennri þjónustu við íbúa á skrifstofu sveitarfélagsins. Um er að ræða hlutastarf frá kl. 10 til 14. Umsækjandi þarf að geta hafið störf 2. maí. Umsóknarfrestur hefur verið framlengdur eins og fram kemur hér fyrir neðan.

Guðbjartur Hannesson velferðarráðherra og Ólína Þorvarðardóttir alþingismaður, sem skipa efstu sætin á lista Samfylkingarinnar í Norðvesturkjördæmi, halda almennan fund í SjávarSmiðjunni á Reykhólum kl. 17 á morgun, mánudag. Þar spjalla þau við gesti og svara fyrirspurnum.

Atkvæðagreiðsla utan kjörfundar í Reykhólahreppi vegna komandi þingkosninga verður á morgun, mánudag, milli kl. 12 og 14. Kosningin fer fram á skrifstofu Reykhólahrepps við Maríutröð. Kjörfundurinn í Reykhólahreppi í kosningunum á laugardag verður hins vegar ekki á Reykhólum heldur í Bjarkalundi og stendur frá kl. 10 til 18.