Jens Kr. Guðmundsson skrautskriftarkennari heldur námskeið á Reykhólum núna um helgina (3. og 4. nóvember). Guðrún Guðmundsdóttir á Reykhólum tekur við skráningum í síma 865 5237. Námskeiðið hentar ungum jafnt sem öldnum, örvhentum sem rétthentum. Krakkar allt niður í níu ára aldur eru velkomnir.
...
Merki Reykhólaskóla var opinberað í dag eftir mikið starf nemendanna sem unnu myndir út frá einkunnarorðum skólans: Vilji er vegur. Myndirnar sem valdar voru í merkið komu frá Sindra Júlíusi í 9. bekk og Guðmundi Andra í Arnarhópi.
...
Finnur Kristjánsson bóndi á Skerðingsstöðum í Reykhólasveit, sem andaðist 15. október, var jarðsunginn í Reykhólakirkju í dag og jarðsettur á Reykhólum. Agnes M. Sigurðardóttir biskup Íslands jarðsöng, en Finnur heitinn var föðurbróðir hennar. Finnur fæddist á Skerðingsstöðum 11. apríl 1923 og átti því hálfu ári fátt í nírætt þegar hann lést. Hann var yngstur fjórtán barna hjónanna Agnesar Jónsdóttur og Kristjáns Jónssonar sem bjuggu á Skerðingsstöðum.
...
Enn skal minnt á notkun endurskinsmerkja þegar bæði börn og fullorðnir eru gangandi eða skokkandi eða á reiðhjólum á ferð á götum eða vegum í skammdeginu. Götur í sjálfu þorpinu á Reykhólum eru að vísu upplýstar en iðulega eru ýmsir á gangi eða að leik í grenndinni þar sem ekki er lýsing. Endurskinsmerkin eru mjög misjafnlega góð og ekki er alveg sama hvar fólk ber þau á sér. Þó að vissulega sé gott að bera merki ofarlega á líkamanum er kannski einna brýnast að hafa endurskinsbönd neðarlega á fótleggjunum þar sem bílljós grípa þau fyrst.
...
Félagsþjónusta Stranda og Reykhólahrepps auglýsir eftir starfsmanni eða starfsmönnum í 30% starf við félagslega heimaþjónustu í Reykhólahreppi. Markmið félagslegrar heimaþjónustu er að einstaklingar séu efldir til sjálfshjálpar og þeim sé gert kleift að búa sem lengst í heimahúsum við sem eðlilegastar aðstæður. Þjónustan felur í sér innlit ásamt þrifum í heimahúsum.
...
„Kjarni frumvarpsins felur það í sér að dreifingarkostnaðurinn á orkunni sé greiddur af öllum orkunotendum; ekki bara sumum eins og núna. Þetta yrði óneitanlega mikið framfaraspor. En um leið vonandi árétting á því að um sé að ræða verkefni sem við deilum ekki um á pólitískum vettvangi. Þvert á móti geti menn sameinast um að leysa úr þessu máli og leggi þannig sameiginlega af mörkum við að stuðla að betri lífskjörum fólks sem í dag býr við sligandi húshitunarkostnað sem við þekkjum öll og er algjörlega óviðunandi.“
...
Rjúpnaveiði og önnur skotveiði er stranglega bönnuð í landareignum margra jarða í Reykhólahreppi. Smátt og smátt hafa bæst við jarðir á bannlistann sem birtur er hér á vefnum. Skotveiðimenn eru minntir á að kynna sér listann og jafnframt að kynna sér landamerki áður en haldið er til veiða. Auk þess skal á það minnt, að óheimilt er að veiða án leyfis í landareignum annars fólks þó að bann við slíku hafi ekki verið tilkynnt opinberlega.
...
Símenntunarmiðstöðin á Vesturlandi gengst fyrir kennslu í því að prjóna jólaseríur í Auðarskóla í Búðardal á mánudagskvöld (29. október) kl. 18-21. Örfáa þátttakendur vantar til að hægt verði að halda námskeiðið.
...
Bogi Kristinsson Magnusen, byggingafulltrúi Reykhólahrepps, verður ekki með viðveru á skrifstofu hreppsins á mánudaginn eins og venjulega heldur daginn eftir, þriðjudag 30. október kl. 10-15.
...
Fræðslukvöldi um barnsmissi sem áformað var í Hólmavíkurkirkju annað kvöld hefur verið frestað til fimmtudagsins 1. nóvember á sama stað. Fræðsluerindi flytur Hildur Jakobína Gísladóttir, stofnandi samtakanna Litlir englar. Um er að ræða fræðslu- og spjallkvöld í notalegu umhverfi, ætlað foreldrum og öðrum aðstandendum svo og fagfólki. Flutt verður ítarlegt fræðsluerindi og síðan gefst færi á að spjalla, deila reynslu sinni eða fá svör við fyrirspurnum.
...
