SEEDS-liðarnir taka þátt í því að syngja lag Reykhóladaga. Sjá nöfn og þjóðerni í meginmáli. Ljósm. Sveinn Ragnarsson.

Carlos og Alfredo frá Spáni með súpuskálar í höndum á Reykhóladögum.

Carmen og Jannica aðstoðuðu krakka sem fóru á hestbak á Reykhóladögum.

« 1 af 3 »

Tólf sjálfboðaliðar á vegum SEEDS-samtakanna á aldrinum 18-35 ára voru við ýmis störf á Reykhólum dagana 18.-31. júlí en seinni vikuna bættist sá þrettándi við á vegum Markaðsstofu Vestfjarða. Verkefnin sem hópurinn fékk voru mörg og fjölbreytt - endalaust að raka saman grasi, taka til, snyrta í þorpinu, mála, taka niður girðingu, búa til skreytingar, hengja upp skreytingar og taka niður aftur, undirbúa Reykhóladaga og ganga síðan frá eftir hátíðina.

Sagt hefur verið að makríllinn sé eins og ryksuga í lífríkinu við landið. Þannig gekk kríuvarp í Ísafjarðardjúpi mjög vel og ungarnir voru komnir talsvert á legg þegar makrílvöðurnar komu í Djúpið. Skömmu seinna fór að bera á ungadauða - ungarnir sultu til bana þegar foreldrarnir gátu ekki lengur veitt handa þeim síli. Meðfylgjandi myndskeið voru tekin við Flatey á Breiðafirði fyrir stuttu. Sjórinn ólgar og kraumar eins og í suðupotti þar sem makríllinn rekur sílið upp í yfirborðið til að háma það í sig.

Ingibjörg Birna í góðum hópi í einstakri blíðu á Reykhóladögum 2012.

„Reykhóladagarnir tókust frábærlega og má þakka það ótakmörkuðum áhuga ferðamálafulltrúans Hörpu Eiríksdótttur og aðstoðarfólks hennar,“ segir Ingibjörg Birna Erlingsdóttir sveitarstjóri. „Þátttakan var glæsileg, Reykhólar skörtuðu sínu fínasta í sól og yndislegu veðri, stoltir íbúar tóku á móti gestum og áttu með þeim glaða daga.“

Greint var frá heimsókn í Sjávarsmiðjuna á Reykhólum í fréttum Stöðvar 2 í kvöld. Rætt var við Svanhildi Sigurðardóttur og þaraböðin skoðuð auk þess sem litast var um við útsýnisskífuna á Hellishólunum.

Hátíðin árvissa í Ólafsdal við Gilsfjörð verður haldin fimmta árið í röð á sunnudaginn eftir viku (12. ágúst). Undanfari hátíðarinnar er gönguferð upp í skálina í Ólafsdal um morguninn en dagskráin hefst kl. 13. Flutt verða ávörp og erindi og gamanmál, hljómsveitin Moses Hightower leikur og síðan kemur Leikhópurinn Lotta og sýnir Stígvélaða köttinn. Sýningar verða í skólahúsinu allan daginn og á markaði hátíðarinnar má kaupa Ólafsdalsgrænmeti, handverk, osta, Erpsstaðaís, krækling og ber og margt fleira.

Enn á ný er Árni Geirsson á ferð (og flugi) um Reykhólahrepp. Fyrir skömmu setti hann á myndavefinn frábærar Flateyjarmyndir en núna sveif hann yfir Árbæ og Stað og Staðarhöfn á Reykjanesi. Myndirnar þaðan eru komnar á vefinn - sjá Ljósmyndir / Ýmis myndasöfn / Árni Geirsson í valmyndinni hér vinstra megin.

Klettur fremst, Tindar í Geiradal fjær. Ljósm. Árni Geirsson.

Eins og hér kom fram var fyrir skömmu sett upp veðurstöð í Flatey á Breiðafirði. Sams konar veðurstöð hefur verið á Kletti í Geiradal í Reykhólahreppi í nokkur ár og hefur nú verið settur tengill á mælingar frá henni hér á vefinn. Hún er hugsuð fyrst og fremst til gamans fyrir húsráðendur á Kletti en öðrum er velkomið að nýta sér upplýsingarnar.

« 1 af 4 »

„Sumarið hefur verið mjög gott,“ segir Steinar Pálmason, sem rekur gistiheimilið Álftaland á Reykhólum. „Í júlímánuði vorum við með fullt inni nánast alla daga og á Reykhóladögunum um síðustu helgi voru hátt í tvö hundruð manns hjá okkur í gistingu, bæði í húsinu og á tjaldsvæðinu.“ Steinar segir að velgengni Reykhóladaga síðustu árin hafi leitt til þess að stöðugt fleira fólk komi á svæðið og nýti sér gistingu og þjónustu hjá honum og öðrum. „Þetta vindur upp á sig og sumir koma aftur og aftur og taka einhverja nýja með sér.“

Harpa Eiríksdóttir ferðamálafulltrúi.

Næsti súpufundur í Reykhólahreppi verður annað þriðjudagskvöld í mánuðinum (14. ágúst) en ekki það fyrsta eins og venja hefur verið. Á ágústfundinum sem verður í matsal Reykhólaskóla ætlar Harpa Eiríksdóttir frá Stað að segja frá því sem hún hefur verið að fást við í Reykhólahreppi í starfsnámi sínu frá Oxford Brookes á Englandi. Harpa fer enn á ný til Oxford í haust og verður þar þriðja og næstsíðasta veturinn í námi sínu í ferðamálafræðum.

Verslunin Hólakaup á Reykhólum.

Í sumar hefur verslunin Hólakaup á Reykhólum verið opin alla daga fram til klukkan tíu á kvöldin. Hér skal því komið á framfæri, að ekkert breyttist í því efni núna um mánaðamótin. Búðin verður opin um verslunarmannahelgina og líka á mánudag kl. 10-22 eins og verið hefur.