Jens Kr. Guðmundsson skrautskriftarkennari ætlar að halda námskeið á Reykhólum fyrstu helgina í nóvember. „Við verðum að ná minnst tíu manns til að hann komi,“ segir Guðrún Guðmundsdóttir á Reykhólum, sem tekur við skráningum í síma 865 5237. Námskeiðið hentar ungum jafnt sem öldnum, örvhentum sem rétthentum. Krakkar allt niður í níu ára aldur eru velkomnir.
...
„Já, allt mitt hér á Reykhólum er til sölu ef viðunandi verð fæst“, segir Aðalsteinn Valdimarsson, betur þekktur sem Steini Vald. Þarna er um að ræða sérbýlið hans við Maríutröð, bátinn, verkstæðisgám ásamt öllum verkfærum, tjaldvagn og tveggja hásinga flatvagn.
...
Skólahald í grunnskóladeild nýsameinaðs skóla á Reykhólum hefst í fyrramálið. Skólasetning verður klukkan hálfníu en síðan hefst kennsla með venjubundnum hætti. „Ég óska öllum nemendum Reykhólaskóla farsældar á skólaárinu og hlakka til að taka þátt í áframhaldandi góðu starfi skólans. Líka hlakka ég til samstarfs við foreldra barnanna í Reykhólaskóla,“ segir Anna Greta Ólafsdóttir, hinn nýi skólastjóri á Reykhólum.
...
Vonir standa til þess að viðgerðir á málverkum Baltasars Sampers í kirkjunni í Flatey á Breiðafirði hefjist í haust eða þá snemma næsta sumar. „Nú er búið að endurnýja kirkjuna og einangra en verkin hafa í gegnum tíðina skemmst vegna raka. Því er tímabært að lagfæra verkin núna þegar aðstæður í kirkjunni verða ekki til þess að þau liggi undir skemmdum,“ segir Gunnar Sveinsson sóknarnefndarmaður í samtali við Morgunblaðið.
...
Báta- og hlunnindasýningin á Reykhólum er lokuð fram eftir þessari viku. Hún verður síðan opin á föstudag, laugardag og sunnudag (24.-26. ágúst) milli kl. 13 og 17. Eftir það verður hún lokuð fram á vor nema e.t.v. fyrir hópa samkvæmt sérstökum óskum.
...
Minnt skal á „kaupfélagshittinginn“ í Króksfjarðarnesi á morgun, þriðjudag, milli klukkan hálffjögur og fimm. Núna verður hann í þriðja sinn. Að sögn Möggu á Gróustöðum var prýðileg mæting á fyrsta hittingnum fyrir hálfum mánuði þegar meðfylgjandi myndir voru teknar.
...
Aðalfundur Sambands breiðfirskra kvenna (SBK) verður haldinn í matsal Reykhólaskóla í kvöld, fimmtudag, og hefst kl. 20. Fundurinn er í boði Kvenfélagsins Kötlu í Reykhólahreppi. Kvenfélögin þrjú innan SBK skulu tilnefna tvo fulltrúa hvert á fundinn og leggja fram skýrslu sins félags. Jafnframt mega allar kvenfélagskonur sitja fundinn og eru sem flestar hvattar til að mæta. Auk þess eru allir boðnir velkomnir, karlar jafnt sem konur, til að hlýða á erindi Hildar Jakobínu félagsmálastjóra, sem hefst um kl. 21.
...
Villisveppirnir í súpuna á Reykhólum í kvöld voru tíndir í dag í landi Hyrningsstaða við Berufjörð í Reykhólasveit, rétt innan við Barmahlíðina fríðu. Að því verki stóðu Árni Baldvinsson á Hyrningsstöðum (þar er nú einungis sumardvöl á síðari árum) og Steinar Pálmason í Álftalandi á Reykhólum, sem eldar súpufundarsúpuna eins og svo oft áður. Að sögn Steinars verða í súpunni einar sex tegundir af sveppum úr Reykhólasveit. „Núna er ég búinn að skræla sveppina og fer svo að þvo þá og sjóða,“ sagði hann á fimmta tímanum í dag.
...
Súpufundur ágústmánaðar í Reykhólahreppi verður annað kvöld, þriðjudag, í matsal Reykhólaskóla. Þar segir Harpa Eiríksdóttir frá því sem hún hefur verið að fást við frá vordögum í fyrra sem ferðamálafulltrúi Reykhólahrepps í starfsnámi sínu í ferðamálafræðum frá Oxford Brookes á Englandi.
...
Eins og stundum áður er óskað eftir sjálfboðaliðum annað kvöld, þriðjudagskvöld, til aðstoðar á Héraðsbókasafni Reykhólahrepps í gamla íþróttasalnum í Reykhólaskóla. Störfin þar hefjast strax að loknum súpufundinum sem verður í matsal skólans og stendur væntanlega eitthvað fram eftir áttunda tímanum.
...
