« 1 af 2 »

Kvenfélagið Katla er komið með í sölu falleg dagatöl fyrir árið 2017 með myndum úr Reykhólahreppi, teknum af heimafólki. Þau eru til sölu hjá Össu í Króksfjarðarnesi og á Reykhólum á Báta- og hlunnindasýningunni og hjá Sjávarböðunum. Líka má hafa samband í netpósti (kletturr@simnet.is) og fá dagatalið sent (Málfríður). Verðið er 2.000 krónur.

Viðamesta og fjölbreyttasta dagskrá Reykhóladaganna er á morgun, laugardag, og stendur allt frá klukkan níu að morgni og fram á rauðanótt. Byrjað verður á hlaupinu, fjórar vegalengdir (nægir alveg að labba), bolir og medalíur. Síðan er dráttarvélarall, fjögurra tíma kaffihlaðborð (þar sem Jói í Skáleyjum ríður net), karnival í Hvanngarðabrekku, skottsala (Jóhanna Ösp veit allt um hana), uppboðið mikla á Seljanesi, grillveisla og brekkusöngur í Hvanngarðabrekku þar sem Skúli Gautason er veislustjóri, barnaball með Sniglabandinu, Happy Hour á Báta- og hlunnindasýningunni og loks stórdansleikur með Sniglabandinu. Sérstaklega skal á það minnt, að Hólabúð er opin laugardag kl. 10-21 og sunnudag kl. 13-18.

... það gefur meira.

Einn af sérstæðustu viðburðunum á Reykhóladögum þetta árið, og alger nýlunda, er uppboð sem haldið verður á Seljanesi kl. 17 á morgun, laugardag. Þar mun kenna ýmissa grasa, svo ekki sé nú meira sagt, og ýmislegt er sagt „grunsamlegt“. Sjón er sögu ríkari! Ágóðinn af uppboðinu rennur til Umhyggju, félags langveikra barna. Posi verður á staðnum og gos og snakk fyrir börnin. Mikill fjöldi fyrirtækja styrkir uppboðið (kannski eiga fleiri eftir að bætast við þau sem hér eru talin):

« 1 af 3 »

Aðkoman inn í Reykhólaþorp tók ótrúlegum breytingum á örfáum dögum áður en Reykhóladagar gengu í garð. Fyrir stuttu var „allt í hers höndum“, fólk og vélar á fullu og ótótlegt um að litast, umrót og moldarhaugar hér og þar. Núna er búið að steypa gangstéttar, koma minnismerki Jóns Thoroddsens á sinn nýja stað á torginu nýja, þökuleggja að mestu flagið mikla sem var þar hjá og gróðursetja bæði trjáplöntur og blóm. Fyrsta myndin sem hér fylgir var tekin í dag, mynd nr. 2 var tekin í fyrradag og mynd nr. 3 fyrir nokkrum dögum.

Nóg er um að vera á Reykhóladögum í dag, föstudag, eins og aðra daga. Nefna má sundlaugarfjörið í Grettislaug, hverfakeppnina í Hvanngarðabrekku, þaraboltann við Álftaland, pöbbkvissið, fótboltagolfið og dansleikinn sem stendur fram á nótt. Á pöbbkvissinu (Pub Quiz) á Báta- og hlunnindasýningunni eru skemmtilegir vinningar sem miðast við aldur vinningshafa. „Hlökkum til að sjá ykkur sem flest og auðvitað með góða skapið“, segir Harpa Björk Eiríksdóttir, framkvæmdastjóri sýningarinnar.

Guðrún Tryggvadóttur opnar sýningu sína Dalablóð í skólahúsinu gamla í Ólafsdal við Gilsfjörð á morgun, laugardag 23. júlí. Á sýningunni fjallar Guðrún um formæður sínar í beinan kvenlegg, þær sem fæddust og bjuggu í Dalasýslu og hinar sem fluttust suður, samtals ellefu kynslóðir. Markmið Guðrúnar er að tengjast formæðrum sínum, skapa þær með því að mála þær og gefa þeim þannig möguleika á að hittast án þess að tíminn geti skilið þær að. Leyfa þeim að horfast í augu og skoða hvað þær eiga sameiginlegt og hvað jarðneskt líf snýst raunverulega um.

Þórunn og Halli í Ögri við Djúp.

Dúóið góðkunna Þórunn og Halli heldur uppi fjörinu á balli á Báta- og hlunnindasýningunni á Reykhólum annað kvöld, föstudag. Þau eru mjög fjölhæf enda nauðsynlegt vegna gerólíkra verkefna. „Við spilum við öll möguleg tækifæri, svo sem á almennum dansleikjum, við brúðkaup og jarðarfarir, afmæli og aðrar athafnir sem þurfa á tónlist að halda, í hvaða formi og tónlistarstefnum sem er, allt frá gömlu dönsunum upp í þungarokk og allt þar á milli“, segir Halli, fullu nafni Jón Hallfreð Engilbertsson frá Tirðilmýri á Snæfjallaströnd, kennari og tölvuhönnuður á Ísafirði.

Jói í Skáleyjum að ríða net.

Í tilefni Reykhóladaganna er frítt inn á Báta- og hlunnindasýninguna á Reykhólum um helgina. Aftur á móti verður þar söfnunarbaukur sem gestir geta stungið einhverju í, ef þeir vilja styrkja sýninguna. Á laugardaginn ætlar Jói í Skáleyjum (Jóhannes Geir Gíslason) að ríða net á þeim tíma þegar kaffihlaðborðið verður (kl. 12-16). Hann verður ekki allan tímann, en ýmsir ættu þó að hitta á hann.

Boðið er í súpu á nokkrum stöðum milli kl. 11 og 12.30 á morgun, föstudag, líkt og venja er á Reykhóladögum. Mexíkó-kjúklingasúpa verður í Ási á Reykhólum, kjötsúpa á Litlu-Grund og bátasúpa á Báta- og hlunnindasýningunni.

Núna á Reykhóladögum verður Hólabúð opin föstudag og laugardag kl. 10-21 og sunnudag kl. 13-18. Ekki er úr vegi að minna á matarhornið notalega, þar sem alls kyns réttir eru framreiddir á skammri stundu.