Skjáskot af vef N1 17. mars 2014.

Tankarnir hjá N1 á Reykhólum eru, það ég best veit, á svipuðum aldri og tankarnir í Króksfjarðarnesi, og því fer væntanlega að styttast í að eitthvað þurfi að gera fyrir þá. Þess vegna vil ég hvetja þá sem málið varðar að sjá til þess, að sem allra fyrst verði farið í þær framkvæmdir sem þarf á Reykhólum til að þar geti verið eldsneytissala til frambúðar, svo að einn daginn verði ekki búið að loka þar líka. Þetta eru framkvæmdir sem gætu verið upp á 15 milljónir eða meira, og ekkert víst, núna eftir að N1 var skráð í Kauphöllinni, að hluthafarnir séu spenntir fyrir því að henda peningunum sínum í eitthvert krummaskuð út á landi og tapa þeim.

Afgreiðsla Landsbankans verður á Reykhólum núna á þriðjudaginn að þessu sinni en ekki á miðvikudag. Staðir og tímasetningar verða með sama hætti og vanalega: Á dvalarheimilinu Barmahlíð kl.11.30-12 og skrifstofu hreppsins við Maríutröð kl. 13-16.

Kassinn til að smella á (dálkurinn hægra megin á síðunni).

Á álagningarseðlum Reykhólahrepps, sem eiga að birtast í heimabönkum fólks núna eftir helgina segir, að álagningarákvæðin sé að finna hér á heimasíðu Reykhólahrepps. Þau eru í dálkinum Gjaldskrár allra neðst á síðunni og undir Stjórnsýsla - Gjaldskrár í valmyndinni vinstra megin. Jafnframt hefur verið komið fyrir kassa til að smella á hér hægra megin, fyrir neðan tengilinn inn á heimasíðu Björgunarsveitarinnar Heimamanna.

Myndin er fengin af vef skólans.

Nemendur í 3. og 4. bekk Reykhólaskóla hafa að undanförnu verið að yrkja og ætla að taka þátt í ljóðasamkeppni meðal vestfirskra grunnskólanema í tengslum við Bókahátíðina á Flateyri í lok þessarar viku. Ekkert ákveðið þema er í keppninni og mega skáldin ungu yrkja um hvað sem andinn blæs þeim í brjóst.

Skjáskot af vef N1.

Í gærkvöldi var stofnað til undirskriftasöfnunar, þar sem því er beint til N1 að fresta lokun eldsneytisafgreiðslunnar í Króksfjarðarnesi fram á haustið. Þegar þetta er ritað hefur nokkuð á fimmta tug fólks skrifað undir. Þeir sem það gera geta valið hvort nöfn þeirra birtast opinberlega eða ekki. Þegar skrifað hefur verið undir kemur til baka í netfangið sjálfvirkur póstur sem staðfesta þarf.

Vísir 13. september 1945.

Barðstrendingafélagið í Reykjavík var stofnað þennan dag, 15. mars, árið 1944 og fagnar sjötugsafmælinu í Lionssalnum Lundi í Kópavogi í kvöld. Fagnaðurinn hefst með fordrykk á undan veisluhlaðborði og skemmtiatriðum ættuðum að vestan en síðan er dansleikur. Tilvalið gæti verið að óska félaginu til hamingju með afmælið og árna því heilla í framtíðinni á Facebooksíðu þess.

Eldsneytisdælum N1 í Króksfjarðarnesi verður lokað á mánudaginn. Tímasetningin á þessari nánast fyrirvaralausu lokun hefur vakið megna óánægju, einkum hjá þeim sem eru með rekstur í kaupfélagshúsinu gamla yfir sumartímann. Tankarnir í Nesi eru komnir á aldur og þyrfti annað hvort að skipta um þá ef þarna ætti að vera eldsneytissala til frambúðar, eða grípa til annarra aðgerða og fá frekari undanþágu til notkunar þeirra fram á haustið. Tankarnir eru rétt við kaupfélagshúsið en þar verða Handverksfélagið Assa, nytjamarkaður, kaffihús, Arnarsetur Íslands og upplýsingaþjónusta fyrir ferðafólk starfandi í sumar eins og undanfarin ár. Búið er að skipuleggja starfið og ráða starfsfólk.

Hér er lesið af miklum áhuga.

Dugnaður nemenda í 1. og 2. bekk er með ólíkindum. Ég hef varla haft undan að útvega þeim ný verkefni í vetur, hvort sem það er í íslensku eða stærðfræði. Ekki líður sá dagur að ekki komi nemandi til mín og tilkynni mér að annað hvort vanti hann nýja lestrarbók eða nýja stærðfræðibók heim. Í vetur eru nemendur mínir búnir að lesa a.m.k. 110-120 bækur samanlagt, ýmist heima eða í skólanum. Þarna er ekki verið að telja þær sögubækur og blöð sem lesin eru í frjálsum lestri heima eða í skólanum. Reyndar er þetta afskaplega ánægjulegt verkefni og ég er lánsöm að fá að kenna svona duglegum krökkum, takk fyrir mig krakkar.

Skrifstofa Reykhólahrepps hefur sent álagningarseðla fyrir árið 2014 á island.is og birtast þeir í heimabönkum fólks eftir helgi. Greiðsluseðlar verða á rafrænu formi og birtast í heimabanka greiðanda. Áfram verða þó greiðsluseðlar sendir út í hefðbundnum pósti til þeirra sem eru 67 ára og eldri.

Mæðgurnar Hrefna Hugosdóttir hjúkrunarfræðingur og fjölskyldumeðferðarfræðingur og María Játvarðardóttir félagsráðgjafi MA halda hjóna- og paranámskeið í borðsal Reykhólaskóla mánudagskvöldin 17. og 24. mars kl. 20.30- 22. Markmið með námskeiðinu er að styrkja og efla hjónabönd og parasambönd. Áhersla er á að fyrirbyggja vandamál. Alls ekki þurfa að vera nein vandamál til staðar til að fólk mæti. Markmiðið er að gera hjónabandið skemmtilegra og styrkja fólk í sambandinu. Einnig verður komið inn á styrkingu fólks í foreldrahlutverkinu.