Guðmundur Sveinsson, Mundi í Gröf, andaðist á Dvalarheimilinu Barmahlíð á Reykhólum 24. mars, níræður að aldri. Hann verður jarðsunginn í Reykhólakirkju kl. 14 á morgun, laugardag, og jarðsettur í kirkjugarðinum á Reykhólum, þar sem hann verður í félagsskap margra systkina sinna. Hann var síðastur í þeim stóra hópi að kveðja þennan heim. Systkinin voru tólf og þar af komust tíu til fullorðinsára og náðu góðum aldri.
...
Meira

Félagið Skelrækt, landssamtök skelræktenda, gengst fyrir ráðstefnu um skelræktarmál, sem haldin verður í Háskólanum á Akureyri á morgun undir heitinu Umhverfisvæn atvinnusköpun. Rektor skólans setur ráðstefnuna en síðan mun rúmur tugur vísindamanna og sérfræðinga flytja erindi. Um tuttugu ræktendur eru í Skelrækt, bæði fyrirtæki og einstaklingar. Formaður stjórnar Skelræktar frá 2009 og áður stjórnarmaður er Bergsveinn Reynisson á Gróustöðum í Reykhólahreppi, sem á og rekur Nesskel ehf. ásamt Signýju M. Jónsdóttur konu sinni. Bergsveinn hefur lagt stund á kræklingarækt frá 2007, aðallega í Króksfirði en einnig í Gilsfirði.
...
Meira

Atkvæðagreiðsla utan kjörfundar í Reykhólahreppi verður þriðjudaginn 5. apríl kl. 13-15. Kosið verður á skrifstofu Reykhólahrepps við Maríutröð á Reykhólum. Nánari upplýsingar veitir sýslumaður í síma 450 2200. Auk þess er hægt að kjósa utan kjörfundar hjá embætti sýslumannsins á Patreksfirði og hjá öðrum sýslumönnum.
...
Meira

Nítján manns auk leikstjórans taka þátt í söngleik sem verið er að æfa hjá Leikfélaginu Skruggu í Reykhólahreppi - „alveg frábært og skemmtilegt fólk“ segir Sólveig Sigríður Magnúsdóttir leikstjóri (Solla Magg). „Upphaflega ákvað ég að leita til Steinunnar Rasmus til að vera með mér að setja upp svolítinn söngleik og fyrir valinu urðu ljóð og lög þeirra bræðranna Jónasar og Jóns Múla Árnasona. Ég fékk kirkjukórinn með í þetta og líka fólk sem ekki er í kórnum. Steinunn Rasmus leikur undir á píanó af sinni snilld.“
...
Meira

Kjörskrá Reykhólahrepps vegna þjóðaratkvæðagreiðslunnar 9. apríl liggur frammi á skrifstofu Reykhólahrepps við Maríutröð á Reykhólum til og með 8. apríl. Skrifstofan er opin virka daga kl. 10-15.
...
Meira

Vestfirskir verktakar ehf. á Ísafirði hefjast í dag handa við undirbúning að stækkun og breytingum á stöðvarhúsi Mjólkárvirkjunar í Arnarfirði, en verksamningur við Orkubú Vestfjarða (OV) var undirritaður í gær. Meðal annars verður stöðvarhúsið lengt um 6,3 m til að koma fyrir nýrri 7 MW vélasamstæðu sem leysir af hólmi gamla 5,7 MW vél, nefnd Mjólká II. Verklok eru áætluð í haust. Orkubúið á og rekur átta vatnsorkuver á Vestfjarðakjálkanum auk varaaflstöðva (dísilstöðva) á mörgum stöðum, þar á meðal á Reykhólum.
...
Meira

Félag eldri borgara í Dalabyggð og Reykhólahreppi stendur fyrir samverustundum alla fimmtudaga mikinn hluta vetrar, ýmist í húsi Rauða krossins í Búðardal eða félagsheimilinu Vogalandi í Króksfjarðarnesi. Dagskráin er fjölbreytt og hefst alltaf kl. 13.30 og stendur til kl. 16. Kaffi og meðlæti kostar kr. 300. Allir eldri borgarar 60 ára og eldri eru velkomnir, hvort sem þeir eru í félaginu eða ekki. Komið verður saman í Vogalandi á morgun, 31. mars. Að sögn Jónu Valgerðar Kristjánsdóttur í Mýrartungu, ritara félagsins, verður þar meðal annars félagsvist og verðlaunin vegleg og „sérlega nytsamleg“.
...
Meira

Þriðja Húmorsþing Þjóðfræðistofu verður haldið á Hólmavík á laugardag og sunnudag. Þingið er í senn vetrarhátíð og málþing um húmor sem fræðilegt viðfangsefni. Fræðimenn varpa ljósi á nýjustu rannsóknir og miðlun á húmor. Rætt verður um ólík form húmors, svo sem brandara, uppistand, satíru og íroníu og margvíslega iðkun þeirra í daglegu lífi. Fjallað verður um húmor sem valdatæki í baráttu þjóðfélagshópa og ýmsar birtingarmyndir húmors í bókmenntum, fjölmiðlum, ljóðlist og myndlist. Í sérstakri málstofu verður rætt um húmor jaðars og miðju, þéttbýlis og dreifbýlis, valdahópa og þeirra valdaminni.
...
Meira

Símenntunarmiðstöðin á Vesturlandi minnir á fjölbreytt námskeið, sem haldin eru á ýmsum stöðum þótt aðsetur hennar sé í Borgarnesi. Mörg þeirra standa aðeins eitt kvöld. Af slíkum námskeiðum á næstunni má geta tveggja sem haldin verða í Auðarskóla í Búðardal. Annars vegar námskeið 18. apríl, þar sem nemendur læra grunnhandtök við þæfingu og útbúa sjal eða trefil úr merinóull og silki. Hins vegar námskeið 4. maí, sem byggist á slökunarnuddi á baki, hálsi og handleggjum. Markmið þess er að koma þátttakendum á sporið að nudda sína nánustu. Einnig má geta um tveggja kvölda námskeið í Auðarskóla í apríl, þar sem kennt verður að hekla og setja saman barnateppi, svokallað ömmuteppi.
...
Meira

Mokstur stendur yfir á Hrafnseyrarheiði og Dynjandisheiði. „Við vonumst eftir að báðar heiðarnar verði færar síðdegis í dag“, segir Geir Sigurðsson, rekstrarstjóri Vegagerðarinnar á Ísafirði. Þar með verður leiðin milli norðursvæðis og suðursvæðis Vestfjarða opin í fyrsta skipti á þessu ári, nokkru fyrr en venjulega. Góð veðurspá átti þátt í því að ákveðið var að ráðast í moksturinn núna.
...
Meira