Bærilegt rennirí var á fyrri degi jólamarkaðarins í Króksfjarðarnesi, sem haldinn er núna um helgina, og salan alveg eftir væntingum. Fyrir utan heimafólk komu gestir bæði af Ströndum og úr Dölum enda veðrið með ágætum. Markaðurinn verður opinn kl. 13-17 í dag, sunnudag.
...
Á jólamarkaðinum í Króksfjarðarnesi á morgun, sunnudag, mun Karl Kristjánsson á Kambi flytja ljóð eftir móður sína, Guðbjörgu Karlsdóttur (Guggu í Gautsdal). Vísurnar sem hann ætlar að lesa upp eru tækifærisvísur, aðallega stökur, þar sem hún yrkir meðal annars um barnabörnin, afmælisvísur, önn dagsins og lífið og tilveruna. Myndin af Guðbjörgu sem hér fylgir (mynd nr. 2) var tekin í Hornstrandaferð 2009, nánar tiltekið í húsinu í Búðum í Hlöðuvík.
...
Kirkjubrall verður í Reykhólakirkju kl.11 á morgun, sunnudag. Allir þurfa að vera í fötum sem málning má fara í. Stundin er opin öllum, margþætt verkefni, jólaföndur og síðan hádegisverður á eftir í boði kirkjunnar.
...
Sveitarstjórn boðar til íbúafundar um fjárhagsáætlun Reykhólahrepps fyrir árið 2017 miðvikudaginn 30. nóvember. Fundurinn verður í matsal Reykhólaskóla og hefst kl. 17. Þar verður farið yfir fjárhagsáætlun fyrir árið 2017 og kynntir helstu málaflokkar í rekstri sveitarfélagsins. Íbúar eru hvattir til að mæta, kynna sér málefni sveitarfélagsins og taka þátt í umræðum.
...
„Gils rekur ættir sínar í forystufjárræktun Signýjar og Bergsveins á Gróustöðum í Gilsfirði. Ræktun þeirra byggir að stórum hluta á forystufé sem Halldór Gunnarsson átti og ræktaði meðan hann bjó í Gilsfjarðarmúla og var hans fé að hluta ættað frá Haraldi Jónssyni á Hólmavík. Gils er einn þeirra fjölmörgu hrúta sem teknir hafa verið á sæðingastöð til varðveislu þessara erfðadjásna íslenska sauðfjárins sem forystuféð er.“ – Þannig er komist að orði í Hrútaskránni 2016-2017. Þar er hrútum að venju skipt í ýmsa flokka, fyrst og fremst kollótta og hyrnda, en í skránni að þessu sinni er einn með yfirskriftinni ferhyrndir hrútar, einn feldfjárhrútur og síðan tveir forystuhrútar, og Gils er annar þeirra. Í skránni er honum lýst þannig:
...
Starfsmenn Orkubús Vestfjarða hafa hannað smáforrit fyrir snjallsíma (OV-appið) sem gefur almenningi aðgang að öllum tilkynningum frá fyrirtækinu beint í snjallsímann. Forritinu er sérstaklega ætlað að mæta þörf fyrir hraða og hnitmiðaða upplýsingagjöf, t.d. við straumrof eða þegar miðla þarf upplýsingum varðandi rekstur dreifikerfisins og viðhald. Þetta kemur fram á vef Orkubúsins. Þar segir ennfremur:
...
Pítsudeginum sem vera átti í síðustu viku var frestað vegna mjög slæmrar veðurspár. Í staðinn verður hann núna á miðvikudagskvöld, 23. nóvember, og veðurspáin ólíkt betri. Pítsurnar verða reiddar fram í borðsal Reykhólaskóla kl. 18-21 og verður bæði hægt að borða þær á staðnum eða taka með sér heim. Tekið er við pöntunum bæði í síma og tölvupósti, sjá nánar hér fyrir neðan.
...
Árlegi jólamarkaðurinn okkar verður haldinn í Kaupfélaginu í Króksfjarðarnesi fyrstu helgina í aðventu, 26. og 27. nóvember. Opið kl. 13-17 báða dagana. Til sölu verður ýmiss konar handverk, bækur, jólakort, jólapappír, dagatal Kvenfélagsins, salernis-pappír og svo margt, margt fleira. Kaffi og meðlæti verður til sölu. Posi á staðnum og hægt að borga eftir mánaðamót. Nikkólína spilar jólalög á laugardeginum.
...
Þörungaverksmiðjan á Reykhólum ætlar að stokka upp heimasíðuna sína. Af því tilefni vantar góðar myndir (svona 1-2 MB að stærð) frá nágrenni verksmiðjunnar og frá starfsemi hennar, einkum myndir af eyjum, fjöru, sjó, prömmum, skipum og fólki að störfum til sjávar og sveita. Einnig mega þetta vera myndir af skepnum af öllu tagi úr Reykhólahreppi. Þær mega einnig vera af jurtum, fuglum, húsdýrum, tófum og landslagi eða ferðamönnum að vetri eða sumri.
...
Dilkar voru að meðaltali 16,7 kg í nýlokinni sláturtíð, liðlega hálfu kílói þyngri en í fyrra. Er meðalvigtin sú mesta sem sést hefur. Fyrra Íslandsmet var sett haustið 2014. Að auki komu óvenjumörg lömb til slátrunar. Þetta tvennt gerði það að verkum að lambakjötsframleiðslan jókst um 460 tonn á milli ára. Fjölgun sláturfjár vegna góðrar frjósemi og lítilla vanhalda skilar sér ásamt meiri meðalþyngd lamba í stóraukinni lambakjötsframleiðslu. Út úr slátruninni komu 8.767 tonn af dilkakjöti, sem er um 5% aukning frá síðasta ári.
...
