Ingibjörg Benediktsdóttir, Litlu-Brekku í Geiradal, andaðist á Heilbrigðisstofnun Vesturlands laugardaginn 6. júní, 83 ára að aldri. Útför hennar verður gerð frá Reykhólakirkju kl. 14 á morgun, þriðjudaginn 16. júní.
...
Í samstarfi Kvenfélagsins Kötlu og Hótel Bjarkalundar verða hátíðarhöld í tilefni af þjóðhátíðardeginum í Bjarkalundi á miðvikudag. Dagskráin hefst kl. 14 og verður með hefðbundnu sniði; skrúðganga, ávarp fjallkonu, leikir og gaman úti á túninu og kaffihlaðborð að hætti Bjarkalundar. Helíumblöðrur og sælgæti verða til sölu, andlitsmálun verður í boði fyrir börnin og hoppkastalar þar sem krakkarnir geta hoppað af hjartans lyst.
...
Jens Valbjörn Hansson, bóndi í Mýrartungu í Reykhólasveit, er fimmtugur á morgun, sunnudaginn 14. júní. Allir eru velkomnir í rabarbaragraut, kaffi og kökur fram eftir degi á afmælinu.
...
Halldóra Játvarðardóttir á Miðjanesi í Reykhólasveit (Lóa á Miðjanesi) hefur rekið bændagistingu í hálfan annan áratug. „Þetta hefur gengið alveg þokkalega öll þessi ár,“ segir hún. Gestum á Miðjanesi stendur til boða sextíu fermetra íbúð með sérinngangi á neðri hæð hússins hennar. Lóa segir að fólk sem gistir hjá henni fari mikið í gönguferðir, bæði niður að sjó og upp að fossi, til að njóta náttúrunnar og skoða fuglalífið, sem er óvíða ríkulegra en í Reykhólasveit. „Margir og þó sérstaklega þeir sem eru með börn hafa fengið að fara í fjós og fjárhús og heilsa upp á búpeninginn.“
...
Hjalti Hafþórsson á Reykhólum hefur verið ráðinn umsjónarmaður fasteigna Reykhólahrepps. Þetta var ákveðið á fundi sveitarstjórnar í dag. Egill Sigurgeirsson á Mávavatni á Reykhólum hefur gegnt þessu starfi í mörg ár en sagði því lausu í vor. Umsækjendur um starfið voru fjórir en einn dró umsókn sína til baka. Hinir tveir voru, auk Hjalta, Guðlaugur Einarsson, Sauðárkróki, og Ísak Leifsson, Reykjanesbæ.
...
Sveitarfélögin yfirtóku frá ríkinu þjónustu við fatlað fólk í ársbyrjun 2011. Í samantekt verkefnastjóra Byggðasamlags Vestfjarða um málefni fatlaðs fólks, sem lögð var fram á fundi sveitarstjórnar Reykhólahrepps í dag, segir að framlög frá ríkinu gefi til kynna, að fari fram sem horfir þurfi sveitarfélögin á Vestfjörðum að greiða 118 milljónir króna með málefnum fatlaðra á þessu ári. Þar af greiðist 4,5 milljónir króna af Reykhólahreppi. Vegna þessa máls var eftirfarandi bókun gerð á fundi sveitarstjórnar Reykhólahrepps í dag:
...
Aðalsafnaðarfundur Reykhólasóknar verður haldinn í Reykhólakirkju kl. 20 í kvöld, fimmtudaginn 11. júní. Gerð grein fyrir starfsemi og rekstri sóknarinnar á liðnu starfsári. Afgreiðsla endurskoðaðra reikninga sóknar og kirkjugarðs fyrir síðasta ár. Önnur mál. Kaffisopi og kökubiti.
...
Kvennahlaup ÍSÍ verður núna á laugardag, 13. júní. Á Reykhólum verður eins og venjulega hlaupið frá Grettislaug og lagt af stað kl. 11. Sú nýbreytni verður í hlaupinu að þessu sinni, að hlaupið verður út á Reykjanesið en ekki upp Miðhúsabrekkuna. Velja má um 2 km, 3 km, 5 km og 7 km. Frítt í sund fyrir þátttakendur og verður laugin opnuð kl. 12. Ungmennafélagið Afturelding í Reykhólahreppi sér um hlaupið og nýtur góðs af því.
...
Aðstoðarmatráð vantar í mötuneyti Reykhólahrepps sem allra fyrst. Starfshlutfall 100%. Hæfnisskilyrði: Góð þjónustulund, lipurð í samskiptum. Reynsla af matseld æskileg. Nánari upplýsingar um starfið og allt sem því viðkemur gefur Ingvar Samúelsson matráður í síma 898 7783 eða sveitarstjóri í síma 430 3200.
...
„Nú er komið að því að halda svona eins og einn súpufund og kynna það starf sem verður hjá Báta- og hlunnindasýningunni í sumar, sem og þá viðburði sem verða á svæðinu, alla vega þá viðburði sem sýningin tekur þátt í,“ segir Harpa Björk Eiríksdóttir, framkvæmdastjóri sýningarinnar. „Endilega koma með góða skapið og fullt af hugmyndum hvað ykkur langar að sjá gerast hjá okkur í sumar,“ segir hún. Súpufundurinn verður í húsnæði sýningarinnar við Maríutröð. Kynningin hefst kl. 20 í kvöld, þriðjudag, en húsið verður opnað hálftíma fyrr.
...
