Aðsókn að Grettislaug á Reykhólum hefur í sumar verið meiri en nokkru sinni fyrr enda hefur veðurblíðan verið alveg einstök. Núna um verslunarmannahelgina (frá föstudegi til mánudags) voru gestir laugarinnar 649 á móti 311 á sama tíma í fyrra. Mest munar þar um laugardaginn þegar 247 gengu til laugar á Reykhólum. Í maímánuði voru laugargestir 454 (358 í sama mánuði í fyrra), í júní 1.498 (1.509) og í júlí 2.573 (2.052). Alls voru því laugargestir 4.720 frá júníbyrjun og þar til lokað var klukkan tíu í gærkvöldi en voru 3.872 á sama tímabili í fyrra....
Meira

„Þar sem jökulinn ber við loft hættir landið að vera jarðneskt, en jörðin fær hlutdeild í himninum ...“ Myndin var tekin í dyrunum á upplýsingaskrifstofu ferðafólks á Reykhólum um hádegisbil á frídegi verslunarmanna.

 

Þó að óvenjumargir bílar hafi verið við Hólakaup á Reykhólum á fjórða tímanum í dag (mynd nr. 1) segir Guðrún Guðmundsdóttir að samt hafi öllu fleiri komið í búðina í gær. Hún segir að jafnan komi margir sem eru að fara út í Breiðafjarðareyjar með Eyjasiglingu og síðan komi aftur dálítil skriða að lokinni eyjaferðinni. Myndir nr. 2 og 3 eru frá tjaldsvæðinu við Grettislaug í jaðri þorpsins á Reykhólum, þar sem er prýðileg aðstaða fyrir tjaldvagna og húsbíla og slíkt. Það sem af er þessari helgi hefur verið meiri almenn umferð ferðafólks á Reykhólum en nokkra aðra helgi í sumar. Aftur á móti er ekkert ættarmót á Reykhólum að þessu sinni en á samkomum af því tagi geta gestir skipt hundruðum....
Meira

Verslunin Hólakaup á Reykhólum er opin eins og venjulega núna yfir helgina. Opið er til kl. 22 í kvöld, laugardag, en á morgun (sunnudag) og mánudag er opið frá kl. 9 til 20. Mikill straumur ferðafólks hefur verið í búðinni í dag enda fæst þar nánast allt sem þarf á ferðalagi.

 

Magnús Sigurgeirsson á Reykhólum keypti um áramótin gróðurhúsin í Görðum rétt neðan við Reykhólaþorp af Kristni Bergsveinssyni frá Gufudal, sem ákvað að hætta garðyrkju þegar hann var kominn yfir áttrætt. „Mest eru þetta tómatar, svolítið af gúrkum og ofurlítið af salati og öðru smálegu", segir Magnús. Mestan hluta framleiðslunnar fær Mata í Reykjavík en auk þess eru hótelin í næstu héruðum fastir viðskiptavinir og Kaupfélag Steingrímsfjarðar kaupir líka töluvert. Gestum og gangandi er velkomið að kíkja í gróðurhúsin hjá Magnúsi. Hann kveðst þó ekkert hafa auglýst það enda fáist framleiðsla hans í Hólakaupum á Reykhólum. „Aftur á móti er ekkert mál að selja fólki ef einhver er við á annað borð. Það er svona einn og einn sem kemur ...

...
Meira

„Þetta hefur farið versnandi með hverju ári", segir Aðalsteinn Valdimarsson á Reykhólum um lundaveiðina í Breiðafjarðareyjum. Hann er nýkominn úr árlegri lundaveiðiferð ásamt félögum sínum og segir að mjög lítið hafi verið af lunda og mun minna en í fyrra. „Eins og Ævar Petersen sagði núna um daginn hafði sílið greinilega horfið og lundinn farið frá og nokkuð af kofunni drepist", segir Aðalsteinn. Þeir félagar fóru út í eyjar á föstudag og voru við veiðar frá laugardegi og fram á miðvikudag. „Framan af sáum við fáa fugla með síli. Síðasta daginn fórum við snemma um morguninn og þá var talsverður vindur og gott flug og miklu meira af lunda en fram að því. Fuglinn var áberandi betur lestaður og virtist vera með mikið og gott síli. Það stóð þó ekki nema þrjá-fjóra tíma og þá hvarf fuglinn aftur að mestu...
Meira

Yfir sumarið lenda smávélar á flugbrautinni á Reykhólum nánast á hverjum degi. Stundum eru það einhverjir að heimsækja vini eða ættingja en miklu oftar eru það einhverjir sem hafa brugðið sér í „sunnudagsbíltúr". Í fyrrasumar voru hér einn daginn sex fisvélar samtímis - og reyndar tvívegis þann dag. Þá hafði hópur fisflugmanna ákveðið að skreppa til Ísafjarðar og komu þeir við á Reykhólum í báðum leiðum. Í gær kom Elvar Antonsson frá Dalvík á fisvél sinni á leiðinni kringum landið. „Þetta var tuttugu ára gamall draumur hjá mér", segir hann. „Ég var alla tíð með sparibaukinn að safna fyrir vélinni." Það var loksins í hitteðfyrra sem draumurinn rættist en þá keypti hann vélina beint frá Bandaríkjunum....
Meira

Erpur og Atli sjá um fjörið á dansleik í Bjarkalundi á laugardagskvöld og fram á nótt. Eins og áður um þessa helstu ferðahelgi sumarsins verður svolítil brenna þar sem fólk safnast saman að loknum málsverði en síðan byrjar ballið. Á hlaðborðinu bráðum þjóðkunna verður úrval fiskrétta og kjötrétta og síðan verður kveikt í bálkestinum á slaginu klukkan níu....
Meira

Hinn nýi sýslumaður Barðstrendinga, Úlfar Lúðvíksson, verður til viðtals á skrifstofu Reykhólahrepps á morgun, föstudag, milli kl. 14 og 15. Þetta er í fyrsta sinn sem Úlfar er með viðtalstíma á Reykhólum en hann tók við embættinu núna um miðjan mánuðinn. Forveri Úlfars, Þórólfur Halldórsson, hafði þann hátt að koma á Reykhóla einu sinni í mánuði....
Meira

Ágúst G. Atlason áhugaljósmyndari og margmiðlunarhönnuður á Ísafirði brá sér út í Breiðafjarðareyjar í veðurblíðunni – eins og fleiri – og tók myndir í safnið. Þetta var annar ljósmyndaleiðangur hans í Reykhólahrepp á stuttum tíma, en fyrr í mánuðinum ferðaðist hann um fastalandið og tók einkum landslagsmyndir í héraðinu. Líka myndaði hann starfsmenn Þörungaverksmiðjunnar við vinnu sína. „Það var ákveðið í samstarfi við Markaðsskrifstofu Vestfjarða að fara út í eyjar með Birni Samúelssyni og ég ákvað að enda sumarfríið með allri fjölskyldunni þannig að við skelltum okkur saman í ferð", segir Ágúst. „Við byrjuðum á því að koma í Skáleyjar þar sem við hittum Jóhannes Geir Gíslason og fengum kaffi og köku ...

...
Meira