Biðröð eftir bensíni við Hólakaup.

Frá og með deginum í dag og til 12. ágúst er verslunin Hólakaup á Reykhólum opin alla sjö daga vikunnar frá tíu á morgnana til tíu á kvöldin. Þó með þessum fyrirvara: Reynslan sýnir að yfirleitt er opnað miklu, miklu fyrr á morgnana, hvað sem hinum formlega afgreiðslutíma líður. Allir eru velkomnir í Hólakaup hvort heldur klukkan er sjö, átta eða níu að morgni ef Eyvi er kominn til vinnu á annað borð eða hans fólk.

Fjallkonan í fyrra var Eydís Sunna Harðardóttir - á afmælisdaginn sinn.

Kvenfélagið Katla í Reykhólahreppi stendur fyrir hátíðarhöldum á þjóðhátíðardaginn í Bjarkalundi sem fyrr. Hátíðin hefst kl.14 með ávarpi fjallkonu, skrúðganga verður að venju og að henni lokinni stjórnar Hrefna Jónsdóttir leikjum. Hoppukastalar verða á svæðinu og kvenfélagið hefur gasblöðrur og sælgæti til sölu. Hið margrómaða kaffihlaðborð Hótels Bjarkalundar verður á sínum stað.

Kvennahlaupshópurinn á Reykhólum 2011.

Kvennahlaup Íþróttasambands Íslands verður á sínum stað á Reykhólum á morgun, laugardag. Lagt verður af stað frá Grettislaug kl. 11 og verður um fjórar vegalengdir að velja: 2 km, 3 km, 5 km og 7 km. Frítt verður í sund fyrir þátttakendur að hlaupi loknu. Þátttökugjald er 1.250 kr. og verður tekið við greiðslu í afgreiðslu sundlaugarinnar. Söfnunarkassi fyrir gömlu brjóstahaldarana og önnur undirföt verður á staðnum (RKÍ).

Sparisjóður Strandamanna á Hólmavík.

Sveitarstjórn Reykhólahrepps harmar að eina bankaútibúið í héraðinu, útibú Landsbankans, skuli hafa verið lagt niður. Þetta kemur fram í bókun hreppsnefndar á fundi hennar í dag. „Sveitarstjórnin lýsir vanþóknun sinni á framkvæmd lokunarinnar og framkomu bankans við íbúa sveitarfélagsins“, segir einnig í bókuninni. Jafnframt var samþykkt tillaga Gústafs Jökuls Ólafssonar um að sveitarstjórn Reykhólahrepps flytji viðskipti sín frá Landsbankanum yfir til Sparisjóðs Strandamanna.

„Undirritaður leggst alfarið gegn hvers konar mannvirkjagerð á lóð sem merkt er V3 neðan við Langavatn. Þetta svæði er viðkvæmt varpsvæði ýmissa fugla og samrýmist illa ásýnd Reykhóla að byggja þar, enda eru nægar aðrar byggingalóðir í boði.“ Þannig hljóðar bókun Eiríks Kristjánssonar á fundi hreppsnefndar Reykhólahrepps í dag, þegar ákvörðun skipulagsnefndar sl. mánudag um úthlutun iðnaðarlóðar neðan við Langavatn var til afgreiðslu. Meirihluti sveitarstjórnar tók hins vegar jákvætt í bókun nefndarinnar og fól sveitarstjóra að hefja undirbúning málsins.

Fasteignamat á landinu öllu hækkar að meðaltali um 7,4% um næstu áramót en hækkunin er mjög mismunandi eftir sveitarfélögum og eftir hverfum á höfuðborgarsvæðinu. Hækkunin í Reykhólahreppi er 4,5%. Á höfuðborgarsvæðinu er hækkunin að meðaltali 8,3% en er þessi í öðrum landshlutum:

Karlsey leggur úr Reykhólahöfn í síðasta sinn og skríður framhjá Gretti.

Næsta stopp Hafnarfjörður.

« 1 af 2 »

Karlsey, flutningaskip Þörungaverksmiðjunnar, hefur loksins núna kvatt heimahöfn sína á Reykhólum, um hálfu ári seinna en til stóð og rúmu ári eftir að hún „settist í helgan stein“ þegar Grettir kom og leysti hana af hólmi. Í fyrsta áfanga var farið til Hafnarfjarðar og skipstjóri í þeirri ferð var hinn gamalreyndi Gylfi Helgason á Reykhólum. Með honum í áhöfn voru þrír menn á vegum kaupandans.

Trúbadorinn gamli og síungi Gylfi Ægisson verður með tónleika og uppistand á Café Riis á Hólmavík kl. 21 í kvöld, fimmtudag. Þar syngur hann og leikur mörg af sínum vinsælustu lögum og jafnframt lög af diski sínum Á frívaktinni sem var að koma út. Einnig fer Gylfi með gamanmál eins og honum er lagið.

« 1 af 5 »

„Þegar við komum í land á Reykhólum í kvöld á Blíðunni SH 277 var einum orðið svo heitt eftir daginn að hann varð að kæla sig í höfninni,“ segir Halldór Jóhannesson skipstjóri, sem sendi vefnum þessar myndir.

Áheyrendur kjósa besta lagið af þeim sem bárust í sönglagakeppni Reykhóladaganna 2012 á tónleikum í íþróttahúsinu á Reykhólum núna á föstudagskvöld, 15. júní. Skilmálar í keppninni voru þeir, að bæði lag og texti yrðu að vera frumsamin og hefðu ekki verið flutt opinberlega áður. Nöfnum höfunda verður haldið leyndum þar til úrslitin liggja fyrir.