Annar fundurinn í fjögurra funda röð um nýtingaráætlun fyrir strandsvæði við Vestfirði verður haldinn í íþróttahúsinu á Reykhólum á föstudagsmorgun, 20. nóvember kl. 10. Fyrsti fundurinn verður á veitingastaðnum Malarkaffi á Drangsnesi annað kvöld. Val fyrsta fundarstaðar er ekki tilviljun, segir í tilkynningu um fundina. „Hér er hrint af stað verkefni, hinu fyrsta sinnar tegundar á Íslandi, þar sem sjónum er beint að nýtingu strandsvæðisins og því er viðeigandi að sá fundur sé haldinn á fjörukambi við mynni Steingrímsfjarðar.“ Þessir fundir eru öllum opnir sem áhuga hafa.
...
Meira

Landssamtök sauðfjárbænda mótmæla því harðlega að ríkið hætti að niðurgreiða refaveiðar. Gangi það eftir sé hætta á því að sveitarfélög muni ekki lengur standa fyrir skipulögðum refaveiðum. Það hafi í för með sér verulega fjölgun á ref, með ófyrirséðum afleiðingum fyrir lífríkið í landinu. Sindri Sigurgeirsson, formaður Landssamtaka sauðfjárbænda, segir ákvörðun umhverfisráðherra alveg taktlausa.
...
Meira

Stjórn Menningarráðs Vestfjarða vinnur nú við að fara yfir og afgreiða styrkumsóknir sem bárust vegna seinni úthlutunar ráðsins á árinu 2009. Alls bárust 89 umsóknir um styrki að þessu sinni, jafnmargar og við fyrri úthlutun ársins í vor. Beðið er um framlög að upphæð tæplega 75 milljónir króna til fjölbreyttra menningarverkefna, en heildarsamtala í fjárhagsáætlunum verkefnanna hljóðar upp á 436 milljónir. Það er því ljóst að það er mikill hugur í Vestfirðingum á menningarsviðinu og mörg verkefnin eru býsna viðamikil þótt vissulega séu þau af öllum stærðum og gerðum. Til ráðstöfunar eru 18,5 milljónir að þessu sinni.
...
Meira

Pítsuveitingahús verður opið í matsal Reykhólaskóla í kvöld, þriðjudag, kl. 18-21. Hægt verður að snæða pítsurnar á staðnum eða taka þær með sér heim. Tekið er við pöntunum frá kl. 12 á hádegi. Fólk er beðið um að panta tímanlega í síma 895 6379. Pítsurnar eru tólf tommur í þvermál og kosta 1.700 krónur með tveimur áleggstegundum en aukaálegg kostar 200 krónur. Margaríta-pítsa (sósa og ostur) kostar 1.500 krónur. Þetta framtak er í höndum nemenda í 7.-10. bekk.
...
Meira

„Sveitarstjórn Reykhólahrepps mótmælir harðlega þeirri ákvörðun sem kemur fram í fjárlagafumvarpi 2010 að skera alfarið niður endurgreiðslur til sveitarfélaga vegna refaveiða fyrir tímabilið 1. september 2009 til 31. ágúst 2010.“ Þannig segir í bókun sem gerð var á síðasta fundi hreppsnefndar vegna bréfs frá Umhverfisstofnun þessa efnis, sem þar var lagt fram. Engar endurgreiðslur verða af hálfu ríkisins ef fer sem horfir.
...
Meira

Fjárframlög ríkisins til refaveiða verða felld niður, samkvæmt frumvarpi til fjárlaga. Hins vegar verða minkaveiðar styrktar áfram, á þeim grundvelli á minkurinn sé aðskotadýr í íslenskri náttúru. Sveitarfélög hafa til þessa greitt veiðimönnum fyrir að veiða bæði ref og mink en síðan fengið styrki á móti frá ríkinu. Þannig endurgreiðir ríkið sveitarfélögum allt að 3.500 krónur fyrir hvert refaskott á þessu ári.
...
Meira

Ungmennasamband Dalamanna og Norður-Breiðfirðinga (UDN) gekkst fyrir Hólafjöri á Reykhólum á föstudag og laugardag. Markmiðið með Hólafjöri er að gefa krökkum á sambandssvæðinu færi á samveru og samvinnu og tóku 34 krakkar þátt í fjörinu að þessu sinni. Komið var í Reykhólaskóla um miðjan dag á föstudag og heimferð var sólarhring síðar. Margt var brallað á þessum tíma sem leið þó afar fljótt. Hrefna Hugós hjúkrunarfræðingur kom í heimsókn og ræddi við krakkana um samskipti kynjanna, Egill Sigurgeirsson hjálpaði til við þrautakeppni í sundlauginni á föstudagskvöld og svo var diskó og bæði teflt og spilað fram eftir nóttu. Allir gistu síðan á heimavistinni og í kennslustofu. Reykhólahreppur lánaði aðstöðuna í skólanum.
...
Meira

Gistinóttum ferðafólks á Vestfjörðum hefur fjölgað mjög síðustu árin. Á síðasta ári voru þær 91.809 talsins eða tæplega 13 þúsund fleiri en árið 2007. Íslendingar hafa verið í meirihluta þeirra sem nýta sér gistingu í fjórðungnum en útlendingum fjölgaði mikið á síðasta ári. Voru þá Íslendingar 49.141 en útlendingar 42.668. Meirihlutinn gisti á hóteli eða gistiheimili, eða 50.542 manns, en 41.267 nýttu sér annars konar gististaði, svo sem orlofshúsabyggðir, farfuglaheimili, svefnpokagististaði, tjaldsvæði, skála í óbyggðum og heimagististaði.
...
Meira

Sala háhraðanettenginga í dreifbýli í Reykhólahreppi og víðar á Vestfjörðum og í hluta Dalabyggðar hófst í byrjun vikunnar. Alls er hér um að ræða 175 staði í Reykhólahreppi, Strandabyggð, Súðavíkurhreppi, Ísafjarðarbæ, Vesturbyggð, Tálknafjarðarhreppi og Dalabyggð. Í Reykhólahreppi eiga hér í hlut 37 býli og heimili ásamt Hótel Bjarkalundi. Auk símstöðvanna á Leysingjastöðum og Máskeldu í Dalabyggð verður settur upp ADSL-búnaður í símstöðina í Króksfjarðarnesi. Einnig verða víða settir upp 3G-sendar á þessum svæðum.
...
Meira

Fyrsti fundur Ferðamálasamtaka Vestfjarða um stefnumótun í ferðaþjónustu á Vestfjörðum fór fram í Bjarkalundi í Reykhólasveit á laugardaginn fyrir viku. Að sögn Sigurðar Atlasonar, formanns Ferðamálasamtaka Vestfjarða, var fundurinn mjög vel sóttur og lífleg umræða í gangi. „Mikill hugur er í mönnum og við bara gríðarlega ánægð með þátttökuna og hvernig þetta fór fram“, segir Sigurður. „Þarna var fólk úr báðum sveitum og skiptingin nokkuð jöfn á milli Strandamanna og þeirra sem búa á Reykhólum. Fólk úr öllum greinum innan ferðaþjónustunnar mætti og umræðurnar voru líflegar. Það kom ekkert nýtt fram, í sjálfu sér, en samræðan er svo gríðarlega mikilvæg og það að velta upp hugmyndum um hvernig við viljum sjá Vestfirði eftir fimm ár.“
...
Meira