Rjómaísframleiðsla er hafin á Erpsstöðum í Dölum undir vöruheitinu Kjaft-æði og undir kjörorðinu Beint frá býli. Jafnframt hefur verið opnuð heimasíða þar sem starfsemin á bænum er kynnt. Í sumar taka Erpsstaðir þátt í Opnum landbúnaði og getur ferðafólk og aðrir sem vilja komið þar og kynnt sér kúabú, skoðað byggingarnar og heilsað upp á húsdýrin. Opið verður laugardaga og sunnudaga kl. 13-17 nema á morgun, miðvikudag, þegar kýrnar verða látnar út í fyrsta sinn eftir langa inniveru. Það verður gert kl. 16.30 og þá munu þær spretta úr spori og sletta úr klaufunum eins og nautgripa er siður við slík tækifæri. Allir eru velkomnir að koma á Erpsstaði og fylgjast með þessum viðburði og jafnframt verður ísbúðin opin kl. 16-18.
...
Meira

„Önnur eins nýburasprenging held ég að hafi ekki orðið áður hérna á svæðinu“, segir kona flestum hnútum kunnug í Reykhólahreppi. Eftir því sem næst verður komist hafa sjö barnsfæðingar orðið hjá fólki í sveitarfélaginu það sem af er þessu ári, sem þó er ekki hálfnað, þar af þrjár núna í byrjun júní. Þetta eru jafnmörg börn og fæddust allt árið 2007, sem var þó með allra mesta móti. Að auki fæddist Reykhólabúum barn á síðasta degi hins síðasta árs, eins og hér kom fram, og var það jafnframt síðasta barnsfæðing ársins hérlendis, eftir því sem best er vitað. Fæðingarnar það sem af er þessu ári eru eins og fram kemur hér fyrir neðan.
...
Meira

Framkvæmdir við nýjan veg um Arnkötludal eru enn á áætlun og reiknað með því að vegurinn verði afhentur þann 1. nóvember. Sögusagnir hafa gengið þess efnis að undirlag vegarins hafi reynst gallað og fresta yrði verklokum vegna þess. Lítið er til í þessum orðrómi, að sögn Kristins Lyngmo hjá Vegagerðinni. „Það er alltaf eitthvað sem kemur upp á við vegarlagningu sem þessa, það er alveg við því að búast“, segir Kristinn. „Við skoðuðum námur fyrir efni í veginn og það gerist oft að sú áætlun stemmir ekki og það er ekki nóg efni. Þetta er bara eitthvað sem gerist í vegagerð en hefur ekki mikil áhrif á framkvæmdirnar sjálfar.“
...
Meira

Það fór ekki á milli mála að ýmsum brá í brún þegar enginn fugl var sjáanlegur í arnarhreiðrinu um liðlega tveggja klukkutíma skeið um hádegisbilið í dag. Tölvupóstar bárust og spurningar vöknuðu hvort arnarparið væri búið að yfirgefa hreiðrið. Enginn ungi, aðeins fúlegg? Svo hittist á, að fuglinn hvarf af hreiðrinu nokkru áður en útsendingin frá Formúlu eitt byrjaði. En - nokkru eftir að keppninni lauk birtist fuglinn aftur. Má það vera að hjónakornin hafi verið að fylgjast með kappakstrinum í sjónvarpinu?
...
Meira

Fjórðungssamband Vestfjarða ítrekaði nauðsyn þess að Vestfirðir yrðu settir í forgang í samgöngumálum á Íslandi, á fundi stjórnar sambandsins með Kristjáni Möller samgönguráðherra á Ísafirði á föstudag. Fjórðungssambandið boðaði til fundarins með ráðherra, sem staddur var á Ísafirði, til að ræða samgöngumál Vestfjarða og hverjar áherslurnar væru í þeim efnum. „Þetta var mjög góður fundur“, sagði Birna Lárusdóttir, varaformaður Fjórðungssambands Vestfirðinga. „Við lögðum þunga áherslu á að Vestfirðir yrðu settir í forgang í samgöngumálum á Íslandi. Brátt munum við reka lestina hvað landið varðar í samgöngum. Hingað til höfum við nokkurn veginn verið jöfn Norðausturlandi í samgöngum en með framkvæmdum á því svæði núna er ljóst að við drögumst aftur úr.“
...
Meira

Jóhann Hjartarson stórmeistari, stigahæsti meistari íslenskrar skáksögu, verður meðal keppenda á Minningarmóti Guðmundar Jónssonar frá Stóru-Ávík, sem haldið verður í Djúpavík á Ströndum laugardaginn 20. júní. Athygli er vakin á því, að Minningarmót Guðmundar tekur aðeins einn dag en skákhátíðin í Árneshreppi stendur frá föstudegi til sunnudags. Mótið er öllum opið og þátttaka ókeypis. Keppendur eru hvattir til að skrá sig sem fyrst.
...
Meira

Orkubú Vestfjarða varði einni milljón króna til rannsókna á straumum og sjávarföllum við Flatey á Breiðafirði á síðasta ári. Raforkukerfið í eynni er ekki tengt landskerfinu með sæstreng. Markaðurinn er lítill, um 50 megavattstundir á ári, og öll raforkan framleidd með dísilvélum. Kostnaðurinn er því mikill og áhugavert að finna nýjan orkugjafa. Í Breiðafirði er mesti munur á flóði og fjöru á landinu og fyrst núna er kominn kraftur í þróun á hverflum sem hægt er að setja niður í sjóinn og vinna raforkuna beint úr straumum. Með góðum þekkingargrunni er unnt að koma af stað tilraunaverkefni í Flatey, minnst 100 kW, með styttri fyrirvara en ella, bjóðist hentugur búnaður.
...
Meira

Rekstrartruflanir í raforkukerfi Orkubús Vestfjarða urðu alls 205 á árinu 2008. 121 þeirra voru fyrirvaralausar eða fyrirvaralitlar og 84 vegna skipulags viðhalds. Ellefu truflanir urðu frá orkugjafa að rafalaúrtaki, 139 frá rafalaúrtaki á lágspennuvafi dreifispennis og 55 frá lágspennuvafi dreifispennis að raflögn notenda. Auk truflana á kerfum Orkubúsins urðu 34 truflanir í 66 kV og 132 kV kerfi Landsnets sem höfðu áhrif á raforkusvæðið á veitusvæði Orkubúsins.
...
Meira

Líkt og flest annað hefur það bæði kosti og galla að fermast í lítilli sveitakirkju. Fermingarsystkinin eru færri en almennt gerist en athöfnin er hins vegar persónulegri. Þetta gerist ekki gleggra en við fermingarmessu í kirkjunni gömlu og hlýlegu í Garpsdal við Gilsfjörð á hvítasunnudag þar sem einn piltur var fermdur, Jósep Friðrik Guðbjörnsson, sonur Rannveigar Harðardóttur og Guðbjörns Jóseps Guðjónssonar. Garpsdalskirkja var fullsetin og um hundrað manns sátu síðan fermingarveisluna sem haldin var í Bjarkalundi, elsta sveitahóteli landsins, sem tekið var í notkun fyrir sextíu og tveimur árum.
...
Meira

Biskup Íslands, herra Karl Sigurbjörnsson, byrjar í dag ellefu daga yfirreið sína (vísitasíu) um Vestfirði. Með honum í för verða séra Agnes M. Sigurðardóttir, prófastur Vestfjarðaprófastsdæmis, og séra Þorvaldur Karl Helgason biskupsritari. Í Reykhólaprestakalli verður vísiterað annars vegar dagana 7.-9. júní og hins vegar dagana 13. og 14. júní. Í vísitasíu (heimsókn) biskups felast fundir með prestum og sóknarnefndum, skoðun á kirkjum og þátttaka í messum og helgihaldi á hverjum stað. Séra Elína Hrund Kristjánsdóttir sóknarprestur á Reykhólum hvetur fólk til að fjölmenna í messurnar og helgistundirnar í Reykhólaprestakalli. Dagskrá vísitasíu biskups er eins og hér segir:
...
Meira